Christmas a nopna ding ~ Hau Za Cin

Christmas a nopna ding ~ Hau Za Cin

Kum khat sung tawntung khua-ul sakai a na nasep khit ciangin December 25 niin Christmas hong tung biangbuang hi. Gim leh tawl zong dam manlo in Christmas hun kitung ahih manin lawp mahmah, nopsa mahmah ding cih a baihloh hun om thei hi. Lawm leh gual tawh kikhawl manlo, innkuanpihte tawh deihbangin hun zangkhawm manlo – khangnote biakinn puah, nupite thungen in a lawmte uh kikhawl cih bangin hun zang uh. Eima buaina lam ciat ah kibuai in Christmas hun nuamtak, tawldam tak manpha tak in kizanglo thei hi. Bangcih leng nuam in bangcih leng manpha ding hiam?

Inn ah om in na cassette player lui na lakhia a, na lenlai hun la hoih nono na kepte na ngai a, internet ah na lut a Youtube pan na lungzuanna la te na zonga na ngai hi. Na cim hong phawng mahmah taleh a lasak khit uh ciang na lungzuanna kibehlap in na cim hong behlapzaw tawh ‘kibang’ hi. CD na tengkhia a, na movie deih mahmahte na en a, a tawpna a tun ciang a ‘bei’ ahihna na phawk ziau hi. Na lawm na gualte na phone a, na hopih hangin amau zong amau masuan ciat ah manlah in nang lunglut lam hong hopih man kei a, na phone na ‘khia’ leuleu hi.

Hawhna ding na thei kei a, innkong peuh, lamdung peuh, sumbuk peuh na vak a, tua mun ah zong na lungnopna ding na mu tuan kei hi. Christmas muakna paak leh innzepna hoih nono te in na Christmas lungsim a nuamsak tuan kei a, na hun a mawkna tawh kibang hi. Na duh mahmah ann na ne a, na duh mahmah meh na huan zongin na nek khit ciangin ‘lel dih aw’ na ci lel hi.

‘Mi khempeuh a lungdamsakpa’ pian hun ah nang bek na lungdamna ding neilo in a om na kisa liang hi. Na deih mahmah, sumbuk ah minit 60 sung phial na velvel zawh ciang na lei tawh na kizem a, mite in ‘na kilawm na e’ hong ci khin ding na sak pen pawlkhatte bek in hong ci a, ‘a bangci ka le’ na kici sim giugiau hi. Lungnopna na zonzon hang na mu kei hi. A ‘piangpa’ tawh hun zanglo na hih manin na ‘lungnopna ding’ a omlo na himawk hi.

Tua manin hong piang CHRIST tawh hun nuamtak, lungnuam tak a na zat theihna dingin hih a nuai ate a kisam hiam cih ngaihsun khawm dih ni.

1. Kizepna: Ut bangbanga kizepna pen gam khangto leh minam khangto lak ah a kithupisak mahmah khat ahi hi. Ahi zongin ‘ut bangbang’ cih ciangin mite nopmawhsak ding, mite mitkhamsak ding kizepna hilo hi. A hun leh a mun tawh kituak a kilawm taka kizepna cihna hizaw hi. Nitumna lam ah nop ni in puanpak silh uh a, nisuahna lam ah nop ni in puan san leh naipak lam silh uh hi. Numei ading nik a singlua lo, ang a gollua lo, a kigallua lo silh ding a ngeina ahi hi. Pasalte adingin pheituamtual leh ngawng-awh, puanpak leh puan tungsilh, savun khedap tawh kilawm se hi. Jeans leh T-shirt, kaihseng or phanat, puan khedap cihte zatloh ding hoihzaw hi.

2. Hunlap ding: Kikhopna, kituahna, kimuhna ding hun a kigelsa a om leh a hun lapa tun ding, a hunlapa sep ding ahi hi. Christmas hun pen mi khempeuh in hun ‘hawmthawh’ tek a ni tom mahmah ahih manin mun tampi ah vak nuam, na tampi sem nuam, lawm tampi tawh kimu man nuam cih bang ahih manin hun dang sangin hun kigakzaw a, mite manlah zaw hi. Tua manin anne dinga hong kisam bek zong a hun ziakai cih ding kideihlo hi. Kikhopna hi in mimal kimuhna ding vai ah zong mite manlah tek hi cih theih ding ahi hi. Hun gelsa khat na neih leh tua hun sungin midang tawh vaithak na neihloh ding zong thupi ding hi.

3. Sum pua hamtang ding: Vakna khempeuh ah upmawh hetloh sum zatnopna om vat thei hi. Hun dang banga zingciang, thaiciang ci a kingaksak theihloh, ngak dinga kilawmlo om thei ahih manin zatpah theih ding sum nidang sang-a kicingzaw a puak ding ahi hi. Khualkhua ah zin na hih sem leh na khua sangin sum tamzaw na kiginkholh ding ahi hi. Na muhnop khat mu vat thei, na leinop khat mu vat thei cih bangin kiginkholh ding ahoih hi. Sum neilo banga om lah kilawmlo, nei napi neilo banga om pen mite’n a ‘ciil’ peuh hong sa thei ahih manin mite hong muan banga om theih ding a kilawm hi. Mi’n hong lui leh nang zong na lawmte aluikhia zo dingin hanciam in, kigingsa in om in.

4. Nek cian tam nelua kha kei in: Nek leh dawn a kiningcing mahmah hun hi a, a neilo pen innkuan in zong a neih zaha a hanciam nop hun ahi hi. Tua manin nek leh dawn paina peuh ah kingah a, kua inn peuh ah nek ding zong lecin hong kipiak ding hun ahi hi. Lawm leh gual tawh annek khop hun, niangtui dawnkhop hun, a lim a al khat peuh tawh kidiah hun ahi hi. Tua manin na nekna khat ah na nekgawp leh mun dang khat na pai ciang na neknop hangin na gil dimlua khin ding ahih manin na ne zo nawn kei ding hi. Na lawmkhat hong piak neksak kei lecin a kilawmlo suakthei ahih manin gilkiallua in na om kei nak leh munkhat ah tam neklua, gilvahlua cih bangin na om kei in. A khangto gamte cih bangin, ‘ciam’ kawikawi bek in!

5. Lawplua kei in: Mite tawh na kituah ciang na lungdamna hi in na dahna khat hileh na gen ciangin lawplua, vallua kei in. Na kam gen khat peuhpeuh hih hun sung nuamzaw mahmah ding cih mite theihsa hi. Ahi zongin lawplua in nang bek paupau, mite gen ngai manlo cih bangin om kha kei in. Midang lungdamna, midang dahna te zong ngaihsak, zaksak in. Uang gen nuam liangin ‘zuau’ peuh tawh behlap cih khat a omlohna dingin kidawm in. Na theihte zong a theilua bangin gen kha kei in. Mite’n nang bek a thei banga hong muh ding hoihlo hi.

6. Kitangvalsak lua ke’n: Na hatna zah thei in kitangvallua sak kei in. Na cidamna, na thahatna in a lelh ding zah in nasep hi in annekna hi in, vaksuk vaktohna ah hitaleh kidawm in. Zan sawtpi hak a pumpi gimlua tawllua in om kha cih bang kidawm in. Gualnuam lua in lu leh taw zong phawklo cih bang in om kha kei in. Hih hun nuam a bei ciang na maban na zop ding om hi cih phawk gige in. Na pumpi in a lelh ding nasep hi in nek leh dawn hita leh hanciamluatna kidawm in.

7. Lawm deihlua keiin: Nang guak na hih leh zong phamawh sakloh kisin in. Lawm deihlua in a ginalo lawm peuh tawh na kituah khak ding hoihlozaw hi. Nungak hiin, tangval hita leh lawmte a ‘cih simsimte’ uh tawh vak, kikhawl ciin nang kilungneusak in ‘nikteng khat peuh’ ‘pheituam teng khat peuh’ tawh kizop sawm teitei, lawm neih sawm teitei cih bangin na om ken, kisikna lianpi na tuakkha theizaw hi. Tua manin nang guak na hih leh zong thuaksiam kisin in.

8. Summetbawlna hun hilo hi: Christmas hun pen summetbawl hun hilo a, lungdamna leh lungnopna ding hun ahi hi. Na van neih khat peuh tawh metbawl theih ding hun hoih a hong om phial zongin kidawm mahmah in, Christ mangngilh in na lungsim ah sum lianzaw kha thei hi. Jesu Christ eite adingin hong kipiak khiat hun ahih manin a piakhia lam hizaw in. Piakkhiat hun a zangte in metbawlna hun tawh kipelh ding hi.

9. Mi tungah kinga lua kei in: Mite kipiakhiazo, kipiakhia ngam cih man tawh mi tung bek ah lametna nga kei in. Na dawn ding, na nek ding, na vakna ding, a silh na teen ding mite in hong pia nuam kha mah dingi hi, nang zong mite piaksawm in; mi tung bek ah kinga lua kei in. Nang zong hanciamna nei hamtang in. Piakkhiatna ah a lianlua omlo a, a neulua zong omlo hi. Muamkhum khat piakhia te leh mawtaw khat a piakhiate lungsim pen ‘piakkhiatna’ mah ahi hi. Na piaktheihzah a tuam hi a, na piaknopna lungsim thupi zaw hi.

10. A nuam thei pen in zangin: Hun nuam penpen hun a hih mah bangin na it na ngaih, na lawm na gual tawh na zang in. A nuam thei penpen in na zang in. Na duh na ne in, na deih na lei inla, na ut bangin na om in. Hih bang hun nuam kum khat a bei kik mateng na mu kei ding hi.

A nuam mahmah Christmas Lungdambawl Pawi hun ah nang leh na innkuanpihte, na lawm na gualte thupha pia in na lungdamna na kota in. Amau tawh nuamsa in hun nuam, hun pha na zangta un. A sim khempeuh Christmas thupha kong khak hi, Hau Za Cin (Phuitong Liim)