China in tukum sungin Space Mission 30 vei neihsawm

China in tukum sungin Space Mission 30 vei neihsawm

Jan. 6, 2016: China in tu kum sungin Long March-5 leh Long March-7 rockets zangin space mission 30 vei neih dingin ngimna nei hi ci-in zanhal in China Aerospace Science and Technology Corporation in gen hi. China in space mission neihna dingin rocket kaptohna ding space station kici nung kum November kha-in Hainan province ah sitna (test launch) nei ta ahih manin hih bangin geelna lian nei thei hi. Long March-5 kici pen Chinate’ rocket puate lakah a lian pen ahi hi.

China in nung diakin zong space mission tawh kisai official white paper panin a pulakna ah 2018 ciangin khapi tawh kisai kanna (lunar probe) leh Mars kanna kinei ding hi ci hi. Long March-5 programme general-director Wang Yu in 2017 ciangin new generation of carrier rockets kici leh Long March-5 rockets zangin space kanna nei dingin Chang’e-5 probe kici kikap dinga, Chang’e-5 probe khapi zong va pha dinga, khapi a leite hong la-in leitungah hong ciah kik ding hi ci hi.

Tua loin Long March-2 sanga hoihzaw Long March-7 zangin tu kum kim pawlin China in space ah amasa pen dingin cargo spacecraft Tianzhou-1 kici sawl ding hi ci-in China Manned Space Engineering Office director Wang Zhaoyao in gen hi. Tianzhou-1 in Tiangong-2 space lab vante pua dinga, space ah propellant supplement kici experiment nei ding hi. China in 2015 in space mission 19 vei nei a, 2016 in 22 vei nei hi.

More: Mihing hamphatna kepcingna (Human Rights Minitoring) ~ Tual Khan Suan

China in Long March-7 rocket pen nung kum June kha-in sitna a neih ahi hi. Hong tung ding kum nga sungin China in gamdangte tungah (One Belt and One Road kici a sumbawlna a kizoppih gamte tungah) space and aviation-related services kicite zangsak dinga, satellite communications, navigation leh weather forecasting analysis lamsang huhna pia ding hi. Source: The Hindu/ Thang Khan Lian