China gamah Suangmeihol tawhna khuk puakkham

China gamah Suangmeihol tawhna khuk puakkham

Nov. 1, 2016: China leitaw-nitumna lam-a om Yongchuan district sunga Chongqing Municipality sunga om Laisu khua-a Jinshangou kicihna a suangmeihol (coal) tohna khuk zan in puakkham a, suangmeihol tote 15 a sih banah 18 mang uh hi ci-in state media in suaksak hi.

Hih tuahsiatna munah tuahsiatna tuakte zong ding leh hunkhia dingin rescue workers kici 200 kipawl – firefighters, armed police leh mine experts kici ten Jinshangou suangmeihol khuk nasia takin zong lai uh hi ci-in Xinhua news agency in suaksak hi.

Hih bang tuahsiatna pen suangmeihol tote mi 35 ten na a sep lai takun leinuai-a huih puakkham (gas explosion) a pian’na hang hi kici a, suangmeihol tote nih bek suakta man uh hi. Hih suangmeihol khuk pen private company aa hi a, hih thupiang hangin Chongqing Municipality sunga suangmeihol khukte bit mah hiam cih sitna nei lai uh a, suangmeihol khuk khempeuh ah nasep khakcip phot uh hi. Chongqing Municipality sunga suangmeihol khukte panin kum simin suangmeihol tons 60,000 a pian’khiat sakna dingun kumpi in phalna (license) pia hi.

China pen leitung adingin suangmeihol tam a pian’khiatna pen gam hi a, suangmeihol khuk-ah tuahsiatna zong piang mun mahmah hi. September kha in zong Ningxia Hui Autonomous Region leilu-nitumna lamah suangmeihol khuk puakkham a, mi 18 in sihna tuak hi.

March kha in zong Shanxi ah suangmeihol khuk na puakkham a, mi 19 in sihna tuak hi. China ulian ten a beisa kum 10 sangin tuahsiatna tuak-a si nakpi takin kiam suk a, kum sim a si pen mi 1,000 nuai hi ta hi a cih hangun right groups pawl khat in ulian ten tuahsiatna thu khempeuh report loin pawl khap imcip uh hi ci uh hi. Source: Pulse.ng Thang Khan Lian