Myanmar gamsung ah lungmuanna omlo semsem ahih manin, Chin State galtai te UNHCR ii kepbitna kisamlai

Myanmar gamsung ah lungmuanna omlo semsem ahih manin, Chin State galtai te UNHCR ii kepbitna kisamlai

Myanmar gamsung, adiakdiak in Southern Chin State sungteng ah lungmuanna omlo semsem, Security hoihlo semsem ahih manin Chin State pan Refugee galtai tepen leitungbup ii kepbitna kisam suaksuaklai hi ci’n UNHCR te’n genkhia uhhi. Tua ahih manin UNHCR te’n Chin State galtai te ii galtaimi ahihna “Refugee Status” pen kepcing suaksak laiding uhhi.

Tulaitak UNHCR tawh akizom, Register akibawlsa Chin Refugee bekbek akigawm in mimal 18,000 valbang pha uhhi. Tualak ah 15,000 sangin atamzaw pen Malaysia ah om uh a, tualo adang pawlkhat tepen India, Thailand, Nepal cihbang gamtuamtuam ah om uhhi.

Abeisa 2018 kumsung in Chin State leh Sagaing Region huamsung teng nuntakzia dinmunte etcianna kinei a, tua tungtawn in UNHCR te’n Chin State panin Refugee galtai te ii galtaimi ahihna athute limtak etphatna leh sitcianna nei uhhi.

Tuahun akipan Chin State leh Sagaing Region huamsungteng kikhelna tampi piangin, amasa in UNHCR te ii khentatna tawh akituak nawnlo thuthak leh kancianna akibawl pawlkhat UNHCR te tungah kipuak hi. Tuaban ah minam kipawlna Community leh Civil Society Organization tuamtuam paninzong UN Agency tungah lunghimawhna ki pulaktek hi.

Southen Chin State sungah lungmuanna omlo semsem ahih manin UNHCR tezong lunghimawhna mahmah uhhi. Tua ahih manin UN Agency te’nzong mipi theihdingin pulakna Public Statement khat khahkhia uh a, ngongtatna kizomzomlai in galtai tampi omlai ahih manin, mihing te nuntak khuasakzia nawngkaisaklai mahmah cih lunghimawhna pulakkhia uhhi.

Tua ahih manin, Chin State pan Reguee galtaite ii galtai hihna thu sitcianna abawl uhpen kikhawlbawl photding hi ci’n UNHCR te’n khentatna nei uhhi.

“Gamsung bitna leh lungmuanna kician omnai hetlo ahih manin, Chin State pan Refugee galtai tepen leitungbup in kepbitna kisamlai mahmah hi” ci’n UNHCR Protection lamsangah ulian ahi Volker Türk ngiat inzong genkhiata hi.

Malaysia UNHCR zumpi ngiatpan inzong tuni (15 March 2019) in mipi tungah zaksakna nei uh a, Myanmar gampan Chin State Refugee tevai tawh kisai in mimal in thusit etphatna tepen ki khawlbawl photding hi ci’n pulakkhia uhhi. Tuaban ah UNHCR panin athu akicingzaw in mailam ah hongki zasak totoding hi ci’n pulakkhia uhhi. Ref: unhcr.org

More: UNHCR vaitawh kisai in Senator Dean Smith leh UNHCR, Australia Embassy ulian te kimuding

(Behlapna: Abeisa in Chin State pan galtai te ii galtaimi hihna tawh kisai in thusit etphatna Interview hongbawl uhciangin, mawhna leh khialhnading bekbek hongkizong kawikawi in, anunung ah Card laksakkik dinmun vive ah hongtungsak hamtang uhhi. Tuabangin Card kilaksakkik dinmun hong tungsakthei thusit thudotna Interview cihtepen omnawnlo photding ahih manin, alungdamhuai mahmah thukhat ahihi.

Hihbangin UNHCR te ii ngaihsutna hongkihel, hongki heitheihpen Malaysia UNHCR zumpi ah makaipi akilaih manzong hithei, ih minam kipawlna Community tuamtuamte ii hanciam khopna zong hithei, mipi ii thungetna leh thuumna tauna kahna awte Pasian in hongdawngzong hikhathei dinghi.) Sawltak #zomidaily