Chin leh Zomi atom in ~ Dr. Dongno

Chin leh Zomi atom in ~ Dr. Dongno

Chin leh Zomi cih tawh bangcih ding ci aa alunghimawh leh athei nuam tampi ki om ahih manin, tawm kong kuppih nuam hi. Hih min nihte hangin lunghimawhna pen ii tangthu i theih lohna pan ong piang khia lunghimawhna hi aa i tangthu i kan phot ding kisam kasa hi.

CHIN : Chin cih ong pian khiatna thu nih om hi. Khatpen tanglai pupate upna tawh aki bawltawm, pianna khangthu, mythology, hi aa khat pen midangte ong piak, min aki pat khiatna bulpi, etymology ahi hi.

Mythology : India gam lam aa om Marte, Lushaite, Gangte in “Leitung mihingte, ‘Ciinlung, Tsinlung, Sinlung, Jinlung, Chinglung’, kici suangpi khat, kuahawm khat ahk leitung gil sung panin mihing ong piang khia hi”ci aa upna ahi hi. Hih panin Chin akici min ong piang hi ci uh hi. (L H Sakhong ‘s In Search of Chin Identity. 2003 p 1) Hih pen, ei Kawlgam lam ah kiza ngei lo-in, Falam khua gei aa Lailun kuahawm leh Tedim gei aa Khuul khuahawmte bek i pian khiatna ci-in tangthu kigen i za ngei hi. Hih pen khanglui thu upna hi aa, kuahawm sung pan mi piang ngei lo hi.

Etymology: Tanglai Kawl Kumpi masate-in Thet (Sak) kici (tu’n Manipur leh Tripura) galte adal dingin deih uh ahih manin, Khamtungmite (the tribes) bangmah nawngkai sak see lo-in amau gam ah nuamtakin na om sak uh hi. Tua hi aa, galdal uh ahih manin ‘ lawm, zawl, allies or comrades’ ci-in na sam uh hi. (Prof. Gordon Luce, Old Kyaukse and the Corieing of the Burmans 1959, Journal of the Burma Research Society 42, 1:75-109).

Kawl pau-in ‘tha nge chin’ , ‘ a chin chin’ na ci uh aa, tua panin Chin kici ong piang hi. Ahih hangin Chin akilawhna bulpi athei lo mi pawlkhatte-in Khamtungmite-in bawm zangh uh ahih manin ‘Bawm’ ci-in zong asam uh hi. A taktakin Chin leh Bawm a aw akibat hangin a at dan laimal kibang lo hi. ( Prof. F K Lehman, The Real Facts from Linguistics and Anthropology. P 92-93)

Pagan ah mualsuang nih tung ah ‘Chin’ ci-in kigelh: 1048-1113 hun sungin Pagan Kumpi Kyanzittha uk sungin mualsuang tung ah ‘Chin’ cih laimal ki at hi. Hih pen lai tawh kiciapteh masakpenna ahi hi. Mi pawlkhatte-in “ Hih mualsuang tung aa ki-at lai-in eite Chin i hihna ong lak hi” ci-in agen, lai aa at zong om hi. A taktakin ei at hi lo-in Kawl Kumpi-in eite ‘Lawm’ ci aa onng ciaptehna uh hi bek aa, ei, ‘Chin’ akici i hi peuhmah kei hi. Cikmah hunin ei leh ei Chin i kici ngei kei hi. I pu/pate-in na saang lo bek tham lo-in na zadah uh hi. ( Sir George Scott, Burma and Beyond 1932 p 187)

Hi bangteng hi aa, Chin pen, 1. Tanglai upna hi-in tudong, Chinlung a omna ki thei lo hi. 2. Kawl Kumpi masate-in “Lawm aw, Zawl aw…” ci aa ong sapna hi bekin ei leh ei, i pu/pate hun aa kipan cikmah hunin Chin i kicihna tangthu sung ah om ngei lo hi. Midangte ong lawhna uh hi bek aa, pawl khatte bangin “Bawm” ci-in kona in ong nei zaw lai uh hi. (Lehman).

Zandiak mahmahin, facebook sung ah Zomi khat Vice President ong ngahna a lungkim lo midangte-in bawm kisuai lim khat tawh ciamnuihna-in aki suaksak i mu lai hi. Tua ahih ciangin, i minam min, national min hi lo hi. 3. Chin pen ‘Chinlung’ suangtum pan piang cihna ahih teh, Pasian thu um mite adingin Minam Min National Name aa zat huai het lo hi. Leisung, suangtum, kua hawm sung pan khawng aa piang hi thiam bek lo-in Pasianin ong piansak, ong it, Pasian’ tate i hi hi.

ZOMI : Zomi cih kammal pen Pagan mualsuang tung ah Chin cih aki at maa kum 250 hun lai pekin Sen gam Tang Dynasty Kumpi’ taangmi, Ambassador pa-in 862 AD kumin na ciamteh khin zo hi. I pianna Tibet gam sung ah AD kipat kiimin Zo-thang ciang i bul kikan kik thei hi. Dalai Lama a 5 na-in “ ‘Zo’ pen ‘Lord – Topa’ cihna hi aa, ‘Thang’ pen ‘The perfect – ‘Genbaanglo Pa’ cihna ahi hi”ci hi. I pianna min hoih mahmah khat ahi hi.

Mikang kumpi nasem uliante, Sangmangte leh mipil tampi-in i pu/pate-in Kawlgam laizang ah kum 800 sung bang kumpi-in na om ngei uh aa Zo mah na kici uh ahihna limtak na ciamteh tiuteu uh hi. (a kicingzawin magazine ah ong suak lai ding hi) Tua hun lai-in zong Zomi mah na kici uh hi.

Tua zawh, gal lelin 1550 AD khit ciangin ki theh thaang mang uh aa, pawlkhat nisuahna lam tai-in, Laos, Kambodia gam ciangtung uh aa mi namdangpi asuah uh hangin, tuni dong i pau tampi kibang lai hi. Pawlkhat Kawlgam sung mah ah minamdangte tawh kihelzau-in kikan zo nawn lo hi. Pawlkhatte nitumna khanglam dongin lal uh aa, tu-in Asho kici Zanggam Zomite ahi uh hi. Pawlkhat ahon in Khamtung mualtung lam lal to hi.

Khamtung ah i kah toh maa ciang pen, Khuul aa piang, Ciimnuaimi, Lailun aa piang, Laimi, Tedim, Falam, Haka, Matupi, Mindat, Kanpetlet leh Paletwa cih bang om nai lo hi. I vekpi-in Zomi i hi khin hi. (Col. TH Lewin, Baiyue, Carey & Tuck, U Thein Pe Myint, Daw Khin Myo Chit, om lai)

Kawlzangpanin Khamtung i tun ciangin, ki om khawm kik nawn lo aa, ngaihsutna leh upna tuamtuam ki nei in, “Lailun kuahawm pan i piang aa Laimi ihi hi “ aci tawh “ Khuul pan aa piang ihihi” aci tawh i om hi Pawl khat leuleuin i minam min mangngilh kikeuhin midangte ong sapna, Chin peuh i minam min asa zong om aa, pawl khatin, Zomi mahin kici napi, Khumi, Cho, Zaw ci-in i awsuah tawmtawm ki lamdang ta hi. Ahih hangin pawlkhat leuleu-in taangtawng aa i min laigil na pom kinkenin tudong mah Zomi akici tampi i om hi.

Khamtung mual dawn itun ciangin kizopna haksatna tawh ngaihsutzia, huihdiikzia kilamdangin midangpi i kisa kha thei hi. I kan loh hang bek hi-in Zomi akicite beh leh phung tampite Chin a kicite lak ah tampi om hi. Mi lian minthang pawlkhatin i beh min mah ana keng lai uh hi. Mun tuamtuam ah zong Zo mah na kici lai uh hi.

Tua ahih ciangin i tangthu limtak kan lehang, Chin akici a khauhpai mahmah i sanggam south Hakate bang Khuang Cawi ahk. Lawng Tuk, Khuado abawl uh ciangin, aphuisam uh teh, “ Kawlte hauh leh nopsakna bangin ko, Zo Ram ong pia in” ci phaphain a innsung tawng ah phuisam uh hi. Chin Ram ci lo uh aa, Lai Ram zong ci loin, “Zo Ram” ci ngiat uh hi. A taanglai kam ciik uh ahi hi. Mun leh mual minte ah zong Zo min mah tu ciangdong na lolo lai uh hi. A minam minte uh zong Zotung, Zophei, Zokhua ci-in ahi zongin, a min mahmah uh zong tampi mah, Zo, ci-in min kiphuak lai uh hi. Chin cih min koimah ah ki za lo hi.

‘Chin’ cih min tawh kibang lo-in, Zo/Zomi pen midangte ong sapna hi lo-in tangtawng pek aa kipan ei leh ei i kisapna min ahi hi. Zo cih min pen a khanghaam pen, min hi aa, tanglai Sente tangthu sung ah zong, Zo dynasty om ngei-in, Kawl gam laizang ah zong i pute-in Zo kingdom a nei ngei minampi khat i hi hi. Chin cih pen ipu/pate Kawlgam atun khit uhteh ong piangpan , Kawl Kumpite ong sapna min ahi hi. Cikmah hunin, Chin kingdom cihbang kiza ngei lo hi.
‘Zomi’ lo buang ong gawmtuah ding ong tawisaang ding, ki saktheihpih ding adang minam min, national name, om lo hi.

Bangbang ahi zongin, Mangkangte-in Zogam ong uk ding uh 1896 kum, Chin Hills Regulations, ki-uk dan a bawl uh ciangin a kamphen ding ei mualtungmi om lo i hih manin, midangte in Chin ong cihna uh tungtawnin Chin akici paisuak ihi hi. Tua pen akikhial hi ci-in phawk kik saam uh aa, The Chin Hills Gazetteer sung ah hibangin gen uh hi. “ Ahun-aphaatin Kuki (Chin) kici kammal pen Kawlgam, Bangladesh leh Assam kikaal aa om, mi nam tuamtuamte kilawhna, amaanpen min ahi Zo tawh kilaih hi zen leh tu’n thu siang khin mah ding hiven” na ci ngeungeu uh hi. Tua hun lai-in ipu/pate-in ong ki minvawh lam zong na thei nai lo, zong ki thei sak lo ahih manin tu dong apai toto suak kha hi lel hi.

Bangbang hitaleh, Kumpi ong min vawh hi phot ahih ciangin, ki paai khia thei pah nai lo aa i tangthu i sutsut, i sasa ding aa i ki hilhhilh ding hi. I theih kim hun ong tun ciangin a maanpen i minam min ding ngaihsut kik theih ahi hi. Kuakua-in i tangthu i theih masak phot limlim ding thupi kasa hi. Dr Dong No, Sydney Australia