Canada ngahte leh a lunglut te theihhuai thu

Canada ngahte leh a lunglut te theihhuai thu

Gam thumna tun ding a lamen Zomi a kua mapeuh, A lamdang Pasian’ angvanna hangin Zomi hizah tak gamdang tung thei dinga, cik mah hun a ih lamet ngam loh kawmkal ah tampi, gam thumna ih cih Kawlgam sanga nuntakna a nuam zawdeuh gamte ah ih tung ciat hi. Tuate’ lakah gam thupi pen a ih ngaihsut ahi, USA ah tam ki tung pen hi. Tua mah bangin a om laite in zong amau utna tel thei hi leh a theihsa uh USA mah tel dingin ih lamen hi. Ahi zongin thu khat peuhpeuh a hunhun in ki khel thei zel ahih manin na lamet lohna mun zong hong ki puak thei hi. Gam tuamtuam dangte zong ih theih nai loh man hi bek a, US zah mah a a hoih zongpawl khat om thei ahih manin US a ngah zolo te zong nang aading a hoih zaw Pasian geelna zong om thei khading ahih manin khasiat ngaihsut pah ding hilo hi. Tua gamdangte’ thu ken thei tello ka hih manin kei omna ka theih gam thu tawm kong gen nuam hi.

Mi pawl khatte in UN te muang lua in gam thumna tung peuhpeuh leng hong ki ngek bawl mahmah dinga, nuam salel ding ka hih manin ka tun nading gamah eimi om in om kei leh zong phamawh kei ci-in kuamah contact khollo thei uh hi. A tun taktak ciangin zinmuak te leh tavuan neite in a tuncil tawm vei sung huh in ngekbawl mah uh hi. Kha khat kha nih hong sawt ciangin na khempeuh a theileh ki khuasathei dingin ngaihsun ahih manin a tuncil lai bangin ngek bawl zo nawnlo uh hi. Pau lah siam nailo banah mihing ih hih manin lawm leh gual ngai in lungleng mahmah uh a, tua ciangin Zomite omna koi teng hiam ci-in hong kan pan uh hi. A diakin nopna dahna a om ciangin ei kia guak nuam gelgal tuanlo hi. Minam dangte peuh lawm bawl a ih om hangin ih lungkim taktak zolo a, cihmawh tunna bang dan peuh hilel hi.

A sawtlo a Zomi omna ah ki suan pah ding cih zong lah tawmvei om khit ciangin hoih ta kei leh mite piak a kipan van nengneng hong hau uh a,thangpaih lak pianin ki suan ding hamsa sa uh hi. Tua a tunna mun mah uh ah nuamin nuam kei ta leh tai lah hang tang cih bangin om gega pong mawk uh hi. Tua lai mun ah ih pianna lah hilo, business a nei cih zong hi tuanlo in tun masakna ahih teh ci-in inn peuh lei in ki om zelzul ciat hi. Hih bangdan theih kholh dinga kilawm thu pawl khat om thei ahih manin na pem veve na lungkimna munah a thu omzia ahi ciang khat thei khol in ih om ding kong deih sak hi. Pawl khat te bang mangpau ki zat lohna gam leh state khawng a tun ciangin sawtpi nasep ngah lo in om uh a, gam thumna a tun hangin kumpi huhna tawm bek ngahin nek tawm bek tawh nungta uh hi.

Pawl khatte a tun kuan ahih kei leh a tun zawh a sawtlo in Zomite’omna ah hong ki suan pah nuam ahih manin hamsatna tampi om a, immigration te leh a sponsor te tawh nasep ding tampi tak om hi. Tua ahih manin a zenzen in Canada a ngahte leh a lunggulh te in na theih masak pen hun in Canada ah Zomite om hiam ci-in na theih bangin kan pahin kalsuan lecin na ma vang pen ding hi. A diakin na gam telna ah na address piak ding khua pen Zomite’ omna khua ahih ding thupi hi. Tua hi kei leh ih ki huh nop hangin ki gamla ahih manin hamsa hi. Hih thute tawh ki zui-in USA pai nuam napi a ngah khalote aadingin a ki nai pen Canada ahih manin na theih nop khak leh ci-in Canada thu a nuai ah tawm kong gelh suk hi.

Kumpi khuasak zia (Governance):

Canada gam pen leitungah gam gol pen nihna ahih hangin mi pen million 35 khawng bek pha hi. Mikangte’ gam mah hi a, minamkim tenna ahi hi. Kampau pen mangpau(English) leh French(Piantit) pau official in ki zang hi. French pen Quebec Provice(State) ah ki zanga, tualo a dang State 12 te ah English( mangpau) ki zangzaw hi. Sum pen Canadian Dollar zang uh hi. Economy pen USA mah tawh kibang a, a sum pen US leh Canada, Dollar khat ciangin 5 Cents(Pya nga) bangin ki khia a, US sum pya nga in lian zaw hi. A gam ki uk zia pen Full Democracy hi a, British te’ ii Back up policy a hih manin a min in Queen Elizabeth hi lai a, Politics ah Priminister a thu nei pen ahi hi.

Sum ngahna lam (Economy):

Nai tha pen a tawm pen in Canda ah nai khat lawh sum $10.25 hi. Nasep pen a khua zui-in a haksa leh a baih mun om hi. A zaw diakin khua liante ah nasep baih zaw a, Cash leh Check tawh ki sem thei hi. Naupang huhna pen leitungah a khauhpai pen gam khat ahi hi. Tu laitakin ko Province ahi, Ontario ah naupang khat in $ 500 bang ngah a, naupang thum a nei nupa khat in amau nupa aa tawh kigawmin kha khat in $3050 ngah hi. A nupa in sang kah leh a nau cin man zong ki piak sak ahih manin sangkah kawm a $3050 a sangsang hong suak hi. Sang sawtpi kah nuam a, nasep neilote leh nasem thei napi na sep neilote in Welfare ci-in sawtpi kumpi huhna khasim in $625 bang ngah thei uh hi.

Nuntakna Sumbeite (Living Cost):

Khua neu leh khuapi tawh ki zui-in innsap leh an neek man tawm ki lamdang hi Khuaneute ah innsap tawm zawdeuhin annek man leh vanman tam leuleu hi. Gentehna in, a khuaneute ah innsap pen lupna khan khat $650 bang manin a khua lian pen ahi, Toronto bangah $700 bang man hi. Tua zong inn hoih leh hoihlo, khuapi sung tawh ki nai, ki gamla zong tawh ki sai lai hi. .Annek man pen khuaneute ah kha khat in $150 bang a bei leh khua liante ah $100 bang bei hi. Hih tawh ki sai -in ki bang kawikawi lel cih ding hi a, a dangte tungtawnin en lai dih ni.

Mel theih omna (Community):

Tuni ciangciang Canada gam buppi ah Zomi 300 bang om khin ta hi. A gam lian ahih manin pawl khat a khua ki gamla a, tu laitakin eimi tam zawdeuhna khua pen khua nga bang om hi. Canada ah khua lian pen Toronto hi a, milip million 7 val omin, North America ah khuapi lian a 4 na ahi hi. A khuapi(Capital city) pen Ottawa hi a, milip million khat val bang om hi. Canada ah Zomi a tam nai loh hangin US ut napi a ngah lo te’ aadingin Zomite’ tamna tawh a kinai na pen gam ahih manin mel theih omna zuan te’ aading a hoih pen gam khat ahi hi. US leh Canada ki gamgi ahih manin Political Policy lo buangah gam khat banga vaihawm theihna gam ahi hi.

Canada nong tun cil vanleng tual ah (Green Card(PR) hong ki pia pah dinga, nong tun zawh kum thum ciangin gammi suah theihna (Citizenship) ngah theihna ki siau thei ta hi. Citizen ngah peuh lecin US pen visa kul lo in na ut hunhun in ki hawh thei a, ki ciah thei hi. Tua bek thamlo in leitung na utna peuhah visa kullo a zin theihna gam tampi na pai thei ding hi. US leh Canada pen gam khat bangin phone tawh kiho theihna ahi hi.

Mundang pan hong lal Zomite leh hong tung thak Zomite, Social Department makai in zum paina leh zato paina a kipan a kisam khempeuh ah ki huh hi. Nopna leh dahna a kipan a ki sam khempeuh ki pawlna kiptakin ki nei a, a kisam bangin ki huai hi. Zomi Community Canada(ZCC) ci-in Canada a om Zomite ki pawl khopna ki phuan zo hi. Canada Zomi Khawmpi, Khuado ni, Zomi namni, Lungdam bawl leh kum thak te a kipan pawi tuamtuam ki bawl hi.

Khuahun Omzia (Weather Condition):

Khuahun pen a tangpi in US gam a tamzaw tawh kibang hi. Khuahun thum bang om a, nitumna leh ni suahna ki gamla ahih manin nisuah ni tumte ki lamdang hi. Nitum nisuah a ki gamla tawh ki zui-in gam khat hinapi, hun guk in ki khen a, ni suahna pan nitumna nai khat ciat in ki lamdang hi.

Canada’s Time Zones:

Phalbi hun pen December pan March Kha huam sung hi a, a votna pen 5C pan -40C dong nisuahna leh nitumna zui-in vot hi. Kum khat leh kum khat kibang lo a, vuk sah hun zong om in a om khol loh hun zong om thei hi. Tukum bang vuk tamlo kum a hih manin US tawh ki gamgi nisuahna lam bang khuahun nuam bek lel hi. Khuahun a vot hangin inn sungah a vot leh a sa piakna set omkim ahih manin nuam lel hi. Zomite pen tulai takin hih a nuailam state tengah ki om kim dildial hi.

Pilna Lam (Education):

Canada pen leitung gam khangtote’ lakah khat ahih mah bangin pilna lam zong a sang pen gam khat ahi hi. Leitunga University minthangte’ lakah ki hel hi. Khuapite ah sang lian University leh college tam a, khuaneute ah tawm hi. High School ciang pen khua khempeuh a vengkim ah om hi. Khua liante a tengte aadingin nute’ an huan sa tawh a hanciamte’ aadingin Ph,D/Dr a kila thei ding hi. High School ciang pen kupite in a mawkna in kah sak a, College leh University pen a kisam zahzah kumpite in a met omlo in a sang man dong leitawi in, a sang man zawh kha 6 ciangin a sum bat ii seh thum suah seh khat maisak a, a om lai teng, a met tawm ni cik ah sawtpi lohsak kik uh hi. A hanciam nuamte’ aading leh sum neilo te aading a ki ciangtanlo pilna ngah theihna gam hi.

Cidamna Lam (Health):

Cidamna lam tawh kisai-in Canada pen leitungah cidam na ding ki kepna(Health Care) ah a hoih pente’ lakah khat ahi hi. Cinat ki velna pen a zawng a hau cih deidan omlo in, Canada sunga gamdang mi nasemte leh Canada gam mi peuh mah a mawkna in vel in sit uh hi. Zato lum mi ahih leh bangtan lum in bangzah a bei zongin kumpi in a mawkna in a dam dong bawl uh hi.

Zato lup a kullo, clinic a ki lakte pen a ki vel man beilo a, a zatui man ding pen cinate in pia uh hi. Ahi zongin a sum lut tawmte leh pensen(Retired), kum 65 tungsiahte in kumpi tungah siau in zatui man ding zong kumpite in sik ta uh hi. Nau paai a kipan appointment paina khempeuh leh nausuahna dong a khawnkhong ahi hi.

Tua banah kum 65 a cing nailo, senior citizen ahih nai loh hangin natna lian nei a sum tawmno a kipan a tenga sim dong tampi bei dingte a hih leh Premium Foundation ci-in kumpi makaihna tawh ki pawlna lianpi khat om a, tua ah ki siau-in a bei khempeuh piak sak uh hi. Zatui zaha tawh ki sai-in, lungno that thei zatui nam(Antibiotic) peuh mah pen ei ut banga lei theih hilo in Siavuante’ letmat bek tawh ki lei thei hi.

Canada Gamah Pem Theihna (Immigration to Canada):

Canada ah pen a nuaia thu teng bulphuh in ki pem thei hi.
1. Refugee(Galtai)
2. Skill Worker(Pilna tawh, a tawm pen siamna certificate ciang nei-in kum 4 sung nasem khinsa hiding)
3. Nanny/Caregiver(Inn nasem, naucing) hih pen ei lam a siamah te in ngah baih thei hi.
4. Student (Sang naupang hihna tawh)
5. Visitor(Khual zin pak a om suak nop leh Work permit a hih kei leh Asylum ki siau thei hi)

Canada kumpi in kum khat in gamdang mi 250,000 bang la den uh a, tua lak pan US pan a lal bekbek zong a tam 4 na ahi hi. Chinese te, India te, Philippine te leh mivom lamte zong tam mahmah hi. Tua lo Asia lam pan Japan, Korea, Thailand, Vietnam, Lao, Cambodia, Hongkong, Myanmar, Russia leh Europe lamte khempeuh zong kim uh hi.

Biakna Lam (Religion):

Biakna lam tawh ki sai-in leitunga biakna nam khempeuh om hi. Tu ciang Laipian biakna om lam za nai keng. Zomite zong omna ciat ah pawlpi dinna om kawikawi a, ko omna Toronto khua, Ontario Province ah Zomi Christian Church,Toronto(ZCCT) ci-in ka na ding uh hi. Background tuamtuam pan hi a, Fundamental Basic Doctrine bulphuh in kikal suan hi.

Mundang pan hong lal Zomite leh hong tung thak Zomite Social Department makai in zum paina leh zato paina a kipan a kisam khempeuh ah ki huh hi. Nopna leh dahna a kipan a ki sam khempeuh ki pawlna kiptakin ki nei a, a kisam bangin ki huai hi. Canada Zomi Khawmpi, Khuado ni, Zomi namni, Lungdam bawl leh kum thak te a kipan pawi tuamtuam ki bawl hi.

Thukhupna (Conclusion):

Hih kong zaksak teng pen Canada hong tung lecin nuam pah in, na daupai pah in teh ci-a, kong zolna hilo a, Canada a om Zomi makai khat hihna tawh ih mipihte’ theih kholh dinga kilawm teng a hun lap a, theih sakna le ut ta kei lecin Pasian’ geelna tawh Canada gam ngah kha zenzen lecin, buai dinga ki lawmlopi buai loh nading cih deihna tawh kong zaksak ahi hi. A zenzen in Canada gam tawh kisai theih nop ahi zongin, Address leh Contact number theih dingte a nuai ah hong gelh suk ing.

Address:

Mang Khan Khup Kaam Naulak
1580 Major Oaks Road 911-1 Fountainhead Road
Pickering, Ontario, L1X 2J7 Toronto, Ontario, M3J 1K6
Canada. Canada.

Home Ph:(416)907-6205
Cell Ph: (416)875-8406(Hotline)
Email:[email protected]

Thang Guite: Cell Ph: (647)404-2996 Joseph Mung: Cell Ph:(647)965-5712 A kisapna bangin a zang siam dingin Pasian in thupha hong pia hen. Zomite’ aading Deih sakna tawh, Mang Khan Khup (Canada)