USA, California gamsung meikang hangin misi 29 phakhin, mimangcip zong tampi om
USA, Northern California gamsung meikang hangin asi bekbek pen mi 29 phakhinta ci’n Thursday ni in Reuters pan kiza hi. Gamsung meikang pen lauhuailua, nasialua mahmah ahih manin, khuasung mipi te ahonhon in Mass Evacuation ki hemkhiasak a, asi mi 29 banah tulaitak amangcip zong mi 100 valtham bang phading cisawnsawn hi.
Hih gamsung meikatna pen California State sunga lenggah aki limciin mahmahna “Wine Country” teng ahihi.
Hih California gamsung meikang pen abeisa kum 84 sungah mei kat khatin ahuaisia penpen in ki ciamteh hi. Hihzahliang in gamsung meikang asukgawp pen abeisa kum 84 sungah omngeilo hi.
Gamsung meikatna pen akigawm in 190,000 acres (77,000 hectares) sungbang kangtumgawp a, meikatna aliatzia azaina pen New York City ciabang phading cimawk hi. Santa Rosa City sungteng ahzong vutlehvai suakzihziah in, singkungte zong meiholtawn tawh kibang hi.
Hihzahliang in gamsung meikatna bangci bangin hongki pankhiahiam cihpen Official in genkhiatna taktak omnailo a, aki kanciansan laitak kici hi. Ahi zongin abeisa Sunday ni in Power Lines te panin huih ahatluat ciangin meikang akipan hiding kici hi.
Friday zanlam inzong huihpi in nawkkik theiding kicisawnsawn ahih manin, Northern California panin meiphelhding Firefighter bekbek 8000 bang ki sapbeh cihi.
Video: Firefighters face wind, exhaustion in battle against California fires
County 8 sungah gamsung meikatna pen mun 20 valbang himawk a, umpi thunei te’n asi zong ki behlap toto khatheiding hi ci’n genkhia uhhi. Banghanghiam cihleh Sonoma County sungpan bekbek inzong mimangcip pen akigawm in mi 400 bang phakhinta cimawk hi. Tua mimangcip tepen asi maw, ahingmaw cihpen gentheih omlo hiphot hi.
Related: Malaysia, Pudu vengsung aom vanzuakna saihonkhat meikang
California State sungaom Los Angeles ah abeisa 1933 kumin Griffith Park kici gamsung meikang nasiamahmah piangngei hi. Griffith Park Fire zong October khasung mahin gamsung meikang hi a, khuasungmi 29 takin sihlawh uhhi. Tua khuasungmi Civilian 29 asi tepen meiphelhding in ahanciamna panin asihlawh uh ahihi. Hih Griffith Park Fire pen US tangthu sungah mi tampi sihkhatin asipenpen Disaster khatin aki ciamteh ahihi. Sawltak #zomidaily
Comment piaknop aomleh...