California ah Tour Bus leh Truck kiphukha, mi 13 si, 31 liam

California ah Tour Bus leh Truck kiphukha, mi 13 si, 31 liam

USA, California State sungah Sunday ni in Tour Bus khatleh Truck mawtawpi khat kiphukha ahih manin mi 13 si cih AFP News pan kiza hi. Southern California aom Highway lamzikpi tungah aki phukha hi a, asi mi 13 banah adangzong mi 31 bang liam cihi.

California Highway Police Chief khat ii genkhiatna ah hih mawtaw te aki phutkhak laitak in Tour Bus tungah atuangkhempeuh ihmukha uh hiding hi ci’n genkhia hi. Tour Bus in Truck mawtawpi ii anunglam aphukha hihtuak a, Tour Bus pen amailamteng zanmanggawp hi.

Tour Bus in amailam tawh aphukha suak ahih manin, asi lakah atamzaw zong Tour Bus ii amailam ah atuangte hizaw uhhi.

Aki phutkhakdan aki theihcian taktak nailoh hangin Tour Bus pen hatsaklua mahmah in, amailam tawh Truck mawtawpi aphukha hiding in ki ummawh hi.

Tour Bus ahawlpa Driver papen sipah a, Truck Driver pa bel silo hi. Asi leh aliam te ii amin apuam te pen thunei te’n tangkokhiatna neinailo uhhi.

Hih Tour Bus pen Los Angeles aom Tour Company khat ahi USA Holiday kici te ii neihsa hi a, Customers te Casino kimawlna ah apainop uhciang in Ferry apuak kawikawi ahihi. ZD Sawltak #zomidaily