Boxing Day ~ Hau Za Cin

Boxing Day ~ Hau Za Cin

1. Boxing Day bang hiam? – Boxing Day pen Britain leh Ireland gam ah Christmas ni a ann khamval khempeuh uh a zingciang a lawm leh gual, meltheih tanau teng tawh a nek kik ni uh ahi hi. Christmas ni a zingciang ahih manin a gualnopna uh ni khat behlap cihna suak hi.

Tua banga Christmas ni a zingciang, December 26 ni a a zatkik uh, ni khat a tawlngak kik uh pen hua gam mite in nuntak sung gualnop hun a aamna uh, a behlapnopna uh hi a ci pawl zong om hi. Boxing Day pen Britain leh Ireland gam ah National Holiday ahi hi. [Britain = England, Scotland, Wales].

2. Banghangin Boxing Day kici hiam? – Gen dan a tuamtuam om hi. Pawlkhat ensuk ni:

1. ‘Christmas Box’ akicih ciangin Britain gamte ah Christmas present genna hi.

2. Boxing Day pen innteng (servant) te adingin tawlngakni (day off) hi a, tua ni in amau zong a inntekte tung pan ‘Christmas Box’ ngah uh hi. Amau inntengte mahmah zong tua ni inn ciah in a innkuanpihte kiangah ‘Christmas Boxes’ va pia thei uh hi. Innkuan a kimukhawm a deihsakna tawh van khat peuh kipia, kihawhtuah a anne khawm cih banga hun zat ni ahi hi.

3. Britain leh Ireland gam te ah pawlpi sunga a kisamzaw deuhte huhna dingin Christmas niin sumbawm (box) khat koih uh a, tua pen Christmas ni a zingciang hongin hawmkhia uh hi.

4. Khualzin Tembawpi te in khualzin a kipat ding ciangin sumbawm khat sungah sum bangzah hiam koih in khualzin kipan uh a, cidam taka a tupna phual uh a tun ciang lungdam takin tua sumbawm pen biakinn a siampite kiangah pia in siampite in Christmas niin hong uh a, a kisamzaw deuh mimal leh innkuan kiangah huhna in pia khia uh hi.

3. Boxing Day ni in bang hih uh hiam?

Christmas ni a kimulo, Christmas a zatkhoppih loh uh innkuanpih, lawm leh gual tawh kimuhna, kikholhna in zang uh hi. Tunai ciangin kimawlna hun in kilim zat diak hi. Sakol tungtuanna, football kidemna, leh gualnop kimawlna tuamtuam kilimzat diak hi. Gualnop kimawlna tuamtuam a neih zawh ciang anne khawm ngeingai uh hi.

Kum 2004 ciangciangin Fox Hunting ciin Gam-ui vai in ui tawh kuankhia uh hi. Ahi zongin kumpi in thaukap leh Gam-ui thah ding khamta ahih manin kizang nawnlo ci uh hi. Tua taang in sumbuk vakni in a zang tam tektek hi. Hunlui lai a innkuan leh lawm leh gual tawh gualnop ni pen tunai diak pan sumzuak sumlei kipat ni in kizang toto ta mawk hi. Sumbukte in zong a vanman uh tampi khiam in Kumthak ni ma in zuak mengmeng nuamta uh hi!

4. Ireland gam ah Boxing Day pen St. Stephen’s Day zong kici hi:

In Ireland gam ah Boxing Day pen “St Stephen’s Day” zong kici a, tua ni in “Wren Boys” kici te pawl kilaak mahmah uh hi. St Stephen pen Jesu thu a up man, Jesu nungzui a suah manin suang tawh kidenglum ahi hi (Lai Siangtho sungah).

Ireland gama Wren Boys kicite in gamsungah pai in Wren kici vasa, Zokam in Daiva i cihte khat hi, suang tawh va dengkhia uh a, tua vasa tawi kawm in khuasung hong lut in inn khempeuh ah sum a dong uh hi. Tua a sum ngah khempeuh uh mizawngte huhna in a zang uh hi. Tunai ciang bel Daiva thah pen ganhing bawlsiatna hi ciin kumpi in phal nawnlo, khamcipta hi.

5. Boxing Day ah Nek leh Dawn tuamtuam thupi bawl:

Upmawhloh, lametloh, lawm hoih, lawm lui te zong hong lengla thei ahih manin Christmas ni sangin nek leh dawn ding a kuamah ciat kigingkholzaw ciat uh hi. Nek leh dawn ah zong uang bawlzaw, lim bawlzaw uh hi.

Ahang khat ah Christmas niin puanthak tawh kilawm taka kizem, kikhawl, kiholim, cih bang ahih manin nek leh dawn tampi hih leh puansilh nikten peuh ninsak thei cih tawh a uanglua in kibawllo zaw hi. Sa, mohkan (cake) leh Christmas Cake cihte lengla khempeuh nekding akicing, a tam theithei kikoih hamtang hi, ci uh hi.

Thukhupna:

Zomi te in bel Boxing Day cih bangin min tuam i puaksak loh hangin kilim zat mahmah a, pawlkhat in Christmas Ni Nihni kici ziau lel hi. Biakinn ah a zangkhawm lai om a, pawlkhat in lawm leh gual tawh, pawlkhat in innkuanpih, meltheih u leh nau tawh cih bangin hun nuam bawlna in a kizang veve ahi hi. Hau Za Cin (Phuitong Liim)