Billy Graham in hongnusia (kum 99)

Billy Graham in hongnusia (kum 99)

Leitung ah Pasian thugensiam minthang, Christian Evangelist Rev. Billy Graham in tuni Wednesday ni in hong nusiata cih Fox News pan kiza hi. Billy Graham pen North Carolina, Montreat khuasung aom ama innsung panin Wednesday ni in hongnusia ahihi.

Billy Graham pen November 7, 1918 kumin asuak hi a, February 21, 2018 in hongnusia ahih manin, leitungah kum 99 sung anungta ahihi.

Billy Graham pen leitung ah anuntaksung in mitampi in atheih mahmahkhat hi a, U.S. President tampi inzong thudotpi Adviser in aneihkhat ahihi. Fox News te genna ah asihna ahangpen bangmah lamdanglo, Natural Causes tawh asihi ci’n pulakkhia uhhi. Sawltak #zomidaily

John Hum in Rev. Billy Graham adamlai in agelh anuai ah hong suaksaksawn ung.

America te I kha lam ah Pa Dr. Billy Graham in kum 93 sung Topa maipha mu in cidam lai hi. Nunglam deuh in a awmsung bing a, khuh natna ngah a hih man in, North Calolina, Mission zato ah ki puak hi. A tunu in va en zel a, ka pu pen a cidam a, lungnuam mahmah hi. Ka pai ciangin Lai Siangtho sinna hong neih pih zel hi, ci-in gen hi. Zato nasem ten zong, Rev. Graham in mikhem peuh hopih in maitai zo hi, ci in gen uh hi. Christmas sung a inkuan te tawh hun zang dingin ciah zo ding cih a siavuan pa’n gen hi.

Billy Graham pen galpi nihna ven khit lam communist upna hong laan ciangin nakpi tak communist manlohna gen ahih man in mitampi lungsim la a, gamuk thunei te in zaktak mahmah uh hi. Kuamah maitang zahtak neilo in, Jesu leh singlamteh thu tangtak gen ahih man in Pasian a it, upna, pawlpi tuamtuam te in man sa in pan pih hi. Ahi zongin, fundamentalism upna anei te leh minam deidan nuam pawl te in langpan in gen sia uh hi. a laibu gelh khat sungah, ‘ka sanggam te mah in hong lang pan hi,’ ci-in khasiatna gen hi.

Billy Graham om non kei leh kua in hong makaih ding hiam? cih Christian makai lam ten lung kham uh hi. Billy Graham in Pasian in ama’ nasem ding mi khat bek nei lo hi. Khangno tampi hong khang ding hi cih gen hi.

Nasep a khawl khit in zong laibu gelh teeiteei lai hi. “Inn tawh kinai zaw: Nuntakna, Upna leh Nasep among dong zo” cih a laibu gelh pen a 30 veina ahihi. Tulai makai ta ding theih ding tampi tak om ahih man in ngah huai kasa hi. Amah pen mi pawlkhat te in kum zalom 20 sung a kamsang pa ci-in gen hi.

Kamsang acih ciangin mikhat mailam thudding gen thei, ahih kei leh mailam bang haksatna hong piang ding cih te gen hilo zaw in, taaglai kamsang te bang a, ‘mawhnei te aw, kisik kik in Pasian kiang zuan kik un,’ ci-a itna leh lainatna tawh thugen pa a ci nuam ahihi.