China, Beijing aom Shopping Mall sungah temtawh mi 1 kidawtlum, adang mi 12 liam

China, Beijing aom Shopping Mall sungah temtawh mi 1 kidawtlum, adang mi 12 liam

China, Beijing City sung aom Shopping Mall sungkhatah temtawh kidawtna piangin mi 1 in sihlawh a, adangzong mi 12 bang liamgawp cih CNA pan kiza hi. Beiing khuapi laizang Downtown sungaom aminthang mahmah Popular Shopping Mall sungkhatah tuni Sunday (Feb 110 ni in pasal khatin temtawh mi adawtgawp hi ci’n Police te’nzong genkhia uhhi.

Tua Shopping Mall pen “Joy City” kici a, Xidan Commercial Area sungah Sunday nitaklam 1pm hunpawl in thupiang ahihi.

Tua temta tawh mi adawtgawppa zong Police te’n mantheikhin uhhi. Tuapa pen amin Zhu cihciangbek in kigenkhiaphot a, kum 35 aphakhin khat ahihi. Henan Province sunga ateengkhat kici hi.

Tua Zhu kicipa in temtawh adawtpen keimah hi’ng ci’n genkhia khinta ci a, alungkim lohna lahna in hihbangin agamta cihi. Ahi zongin bang lungkim lohna cihpen akician in genbehna omnailo kici hi.

Beijing Radio te’nzong hih buaina vai apian ciangin WeChat sungah sisan vive tawh akidim Shopping Mall ii asualteng akizaih photo khahkhia uh a, mulkimhuai mahmah hi.

Twitter tungtawn inzong Video khat ki khahkhia in, Shopping Mall sungah vanlei vanzuak in aomte temtawh kidawtna apian ciangin patau in taikek ngeingai uhhi. Aliam pawlkhatzong asi taksuk ziahziahkawm in ataikhia pawlkhat ki muthei a, cikziat huai mahmah hi.

Hih Joy City akici Shopping Mall pen inndawl 13-storey Complex hi a, Xidan Area sungah Shopping Mall agolpepen ahihi. Hih Joy City sungah International Brand tuamtuam leh Digital Cinema cihte kikoih hi.

Police te’n hih temtawh kidawtna vaitawh kisai in athu akician in akansan laitak ahihi. China gamsung pen adang gamte tawh tehkakna in hihbangin gitloh gamtatna “violent crime” pen atawmzaw in akigen ahihi. Adiakdiak in khuapi, Major Cities te ah Security hoihtak kikoih, ki khauhsak mahmah ahih manin, gitloh gamtatna pen atawmzaw akici ahihi.

Ahi zongin tunailam ciangin temta tawh kidawtna, hei “Axe” tawh kitohna cihte hongomthei zelzel a, tuabang buaina aomciang in naupangte ngimbawl in agamta tamzawthei sawnsawn hi.

More: China ah innsangdawn Stunt kimawlmawl khat 62 Storey pan kia in si

2015 kumin Beijing City sungah temta, namsau atawi pasal khatin Chinese numei khat dawtlum in, adang French pasal khatzong dawtliam hi. Beijing khuapisung aom Sanlitun Shopping leh Entertainment District sungah thupiang ahihi.

2014 kumsung inzong Southwestern China, Kunming Train Station ah temtawh akidawtlum mi 31 tak pha kici hi. Tua aki dawtlumte pen Xinjiang Militants te ii gamtatna hi ci’n Government te’n genkhia uhhi. Tuabang in mipi adawtlum migilo Attackers mi 4 tezong Police te’n thautawh kaplum uhhi. Sawltak #zomidaily