Bawlungsiam Pele’ tapa thongkia dingin ki piakhiata

Bawlungsiam Pele’ tapa thongkia dingin ki piakhiata

Feb. 26, 2017: Leitunga “Tukpeng/bawlung Kumpi” a kici liang Pele’ tapa Edinho kici pen ni dangin bawlung kungpang ngei (former professional goalkeeper) hi a, 2005 in a man lopi-in sum tampi ngah in a sel sim (money laundering) leh khamtheih guihtheih zuak hi ci-in ngawhna tuak in kiman ngei hi. Ahih hangin Edinho in hih ngawhna pen 2014 in a kikhiamsakna dingin thumna/ngetna (appealed) bawl a, tua khit nungin kum 33 thongkia dingin thukhenna innpi in sehsak in kikhah kik hi.

Edinho in a tunga ngawhna khempeuh a nial hangin thukhenna innpi in kum 12 leh kha sawm thongkia dingin sehsak leuleu ahih manin peng zo nawn lo ding hi cih kithei a, hong kingawhna man hi cih lahna ding a om loh hangin kipiak khiat cih loh buang thudang om nawn lo hi ci hi ding hi ven Santos khuapi-a policete kiangah va kipiakhia ta hi.

Edinho in, “Thukhenna dan in hong that a, ka lungkia mahmah hi. A man loin sum ngah in ka sel sim ngei kei hi,” ci hi. Edinho bek hilo in mi dang li zong amah bangin ngawhna tuak uh a, gilbem bang zut khawm ding uh cihna suak hi. Hih banga khamtheih a zuakna uh pen Ronaldo Duarte Barsotti (Naldinho zong a kici) in a khamtheih zuakna mun a ukna Greater Santos kiim ahi hi.

Edinho’ min taktak pen Edson Cholbi do Nascimento hi a, khamtheih lamsang ah buaina khat vei ka tuah ngei hangin kum tampi khamtheih ka lawng kei a, ka siang den hi ci hi. Edinho pen Pele’ zi masa Rosimeri dos Reis Cholbi kici tawh a tapa thumna hi a, 1990s lai-in Santos club ah goalkeeper in na pang hi. Santos club a khawlsan khit nungin Sao Paulo state sunga club neu khatah Edinho in manager len hi.

Edinho’ pa Pele’ min taktak pen Edson Arantes do Nascimento hi a, 1974 in bawllung suih na khawlsan a, tua khit 1974 hong kimawl kik a, New York Cosmos club ah tawl khat kimawl hi. Pele in Brazil team World Cup ah 1958, 1962 leh 1970 in khatna na ngahpih zo ahih manin bawlung sui khempeuh lak panin a thupi/lian pen in kiciamteh lai hi. Pele in Cosmos club a kimawl dingin New York ah pai-in suai a kaih lai-in Edinho kum nga bek pha a, tu-in kum 46 mi ahi hi. Brazil gam a ciah kik in Edinho in professional football goalkeeper hih ding kipan a, a pa in lamdangsa mahmah hi.

Edinho in 1995 in Santos club Brazilian league final tunpih zo a, final ah Botafogo clubte lel uh hi. Khamtheih hangin vak khia thei loin thong sungah kikem (detention) mun mahmah a, drug gangs tawh kizopna a neih manin Brazil gammi ten lamdangsa mahmah uh hi.

Thongah a kikhum lai-in zong a tapa kimuhpih dingin Pele va hawh mun mahmah hi. Pele pen tu-in kum 76 mi hi a, “Pasian in pha a sak leh ka tapa tungah thuman kibawl veve ding hi. Ka tapa tungah ngawhnate man hi cih lah theihna ding teci om lo hi,” ci-in 2006 in ci hi. Source: BBC/ Thang Khan Lian