Malaysia, Banting ah innkhat meitawh kihalsak, asungah mi 4 si

Malaysia, Banting ah innkhat meitawh kihalsak, asungah mi 4 si

Malaysia, Banting, Tanjung Sepat vengsung aom innkhat tuzingsang in meikanggawp a, mi 4 si cih NST pan kiza hi. Selangor Police te’n agenkhiatna ah hih inn meikangpen akang mawkmawk hilo in, asung aom mi 4 te aki thahlup khiticiangin akihalsak hiding hi ci’n genkhia uhhi.

Police te’n asi te ii aluanghawm hoihtak avelcian uhciangin siluang 3 tepen apumpi tungah ahiamkhat tawh akizep, aki satna paulap Evidence pawlkhat mukhia uhhi.

Thukan uliankhat ahi Selangor Criminal Investigation Department chief Senior Assistant Commissioner Fadzil Ahmat in agenna ah Fire Investigators te’nzong paulap kician Evidence pawlkhat mukhia uh a, hih asi mi 4 tepen aki suamlum masaphot hi cih genkhia uh cihi.

Hih innkang pen tuni Wednesday (Dec 13) zingsanglam 6am hunpawl in akipan ahihi. Fire and Rescue Department te’nzong hih meikang pen amawkmawk hilo, thumanlo gamtatna Foul Play omhi ci’n theikhiapah uhhi.

Asi teng lakah mi 3 tepen meitawh akihalma in aki thatlumkhin cihpen paulap kician tampi om cihi. Ahi zongin aluanghawm te zato ah kikheisak dinga, Postmortem akibawl khitciangin Forensic te ii muhkhiatna zong ki ngaklaiding cihi.

Asi mi 4 te lakah mi 2 tepen akum tamkhin Senior Citizens kici a, kum 73 aphakhin Chia Tee Nang kici pasalkhat leh kum 68 aphakhin Lim Mai Shak kici nupikhat ahihi. Adang asi mi 2 tepen kum 3 aphakhinpan khatleh kum 9 aphakhinpan pasalno 2 ahihi.

More: KL khuasung sanginn meikang pen akihalsak cimawk, mi 23 takin sihlawh

Hih innpen meitawh aki halsak laitak in adang pasalno kum 12 aphakhin khatzong innsung ah aom hi a, tuapa pen suakta cihi. Tuapa ii genna ah inn buluh in amai atuamcip pawlkhat innsung ah honglut uh a, ka sanggam pasal 2 teleh kapi papu te hong thahlupsak uhhi ci’n genkhia hi. Amahpen dailenbuk “toilet” sungah kabucip in, tua innbuluh te ataikhiat khitciangin meikuanglak panin ka taikhiathei hi ci’n genkhia cihi. Sawltak #zomidaily