Bank of England te £10 leh Lai-at minthang Jane Austen

Bank of England te £10 leh Lai-at minthang Jane Austen

(I declare after all there is no enjoyment like reading -Jane Austen)
Englandsum Sawm-laidal(tenner) pen Bank of England te ciaptehna ah 1759kum pan kihawm khia-in, a kizang toto a hi hi. Tulaitak aa pen bel laidal hinawnlo in, a sikdo zawdeuh ding in, Polymer kici plastic namkhat tawh kibawl a hihi. England ah kizang sumdal £5, £10, £20 leh £50 namli a omna sung ah, Sawmlai pen sumkihawmkhia khempeuh ii sehli-suah sehkhatphial bang a hipah hi.

A hunzui in sumdal leh a tung aa tuang limte’ kikheelkheel in, a diakdiak in kumpi-hilo midang limte kikheel phadiak hi. A kiciaptehna ah 1975 kum in Florence Nightingle kici numei cina-kepsiam-nu kisuaksak aa tuazawh tulaitak aa limtuang pen England numei lai-at minthang Jane Austen a hihi.

Tulaitak aa Sawmlai kizang(circulation) pen Jane Austen sihzawh kum200 cintawh kituak in, September 14, 2017 aa kihawm khia a hihi.

Sumdal mailam-ah a ngeina bangin, Kumpinu Queen Elizabeth II om aa, tualeh Jane Austen kivuina Winchester Cathedral (Biak innpi) leh taanghlai-a kizang vasakha/meei laikung (Quill) ki tuangsak hi.

Sumdal nunglam-ah Jane Austen maitang, a lai-atna sabuai(writing table) ah lai a at laitak , a omna Chawton Cottage leh a hawhzeelna, a sanggampa’ Edward Austen Knight ii inn Godmersham House leh Godmersham Park paak-huanpi cihbang te kisuaksak hi.

A limte ban-ah Jane laibu Pride and Prejudice sung pan “Laisim sang’ a nuamzaw bangmah a omnawn kei hi – I declare after all there is no enjoyment like reading,” cih kammal zong Jane maitang limnuailian ah kigelh linlen hi.

Kawlte’n “kampauza leh laimal khat” (Nohtaya satalone) a cihbang in, sumdal langkhatbek aa, lim-om teng-in nuntaakna khat lakkhia cih kimuthei ziau hi.

Jane Austen pen Steventon khuaneu, Hampshire khawk, England ah December 16, 1775 ah suak hi. Unau giat a pha uh hi. Lai-at a kipatcil in, kum11 pha liamliam aa, kum23 a phak in Pride and Prejudice, Sense and Sensibility cihbang laibu minthang pawlkhat te’ at khinta hi. 1816 kum aa kipan damlo in 1817kum July 18 ni-in, a zato kilahna Winchester khua pan hong nusiata hi. A sihkhit nung ah a laibu-at nih ki hawmkhia beh aa, a nunung laibu pen bel atbaang in a omta hi.

Jane laibu te pen leitungbup ah ki deihmahmah aa, kampau nam40 bang in kiletkhia khin hi. Tuaban ah limta’ngthei (film) inzong kibawl a hihi. A lai-at te’ a kideih mahmah hang’in, lai-at min kitheilo vive in laibu hawmkhia a hihman-in, a sihkhit nung ah kitheibek-in minthangsaan pan a hihi.

Bank of England te sum £10 pen England bek hilo, United Kingdom bup ah kizang aa, gamdang sumlei-sumzuak na-ah zong mannei hi. England lai-at minthang William Shakespeare, Charles Dickens, Jane Eyre leh Wuthering Heights at Brontë numei-unaute mahbang -in, Manglai leh Mangkaang ngeina (English Literature and culture) a kinte’ aa ding’ Jane Austen lai-at te zong theihloh phamawh phial hong suak hi.

Eilehei-thu bang hileh, ih sumtung ah kuabang te’ ih tuangsak tam? Nantal’suan

Source:

• Bank of England- https://www.bankofengland.co.uk/banknotes/polymer-10-pound-note
• BBC History – http://www.bbc.co.uk/history/historic_figures/austen_jane.shtml
• The Mirror – https://www.mirror.co.uk/money/new-ten-pound-note-release-9034532
• Standard – https://www.standard.co.uk/news/uk/new-ten-pound-note-10-things-you-need-to-know-a3634651.html