Bang hangin galkap tum lo hiam?

Bang hangin galkap tum lo hiam?

Hih tangvalpa pen kamsiatna hang hiam khat tawh tansawm kia hi. Tua hunlai takin galkap lut ding mi lunglut mahmah uh ahihman in a nulepaten zong a tapa uh galkap tum dingin genpih uh a, ut vanglak bilbel hi. A zingciangin galkap kilakna munah va pai pah a, mi na kigual diudeu khin uh hi. Amah zong anung penah ding pah tiuteu hi. Adin khit phetin a nai a et leh zingsang nai 9am na sat khin hi.

Aman zong a din kawkawm in thu tampi tak hong ngaihsun hi:

Kei pen galkap lut kei leng laitan lah nei lo ingh a, ka innkuante bangci vakzawh mawk ding ka hiam. Hibanga galkap sung lut ka sawm pen gam leh lei ading nasem lah kihi, khasum zong sang thei lai ding ka hihman in siasa keng, ahi ding mah hi. Ngaihsun khial kisa keng.

10am hong sat ta

Galkap tum leng Training om ding, Sentary din sungin nai 10 sung bang thau tawi kha ding. A thau lah gik ci lailai. Ka thadah mai e, kileh kik mai ning. ( Hong ngaihsun deda phot hi) A bangbang hileh Training zong tuazahpi in hamsat tuak kei ci ve uh aw. Thau zong gikmah taleh thumvei livei khit ciangin ki ngeina seh ziau lel ning e. A hamsa lua ding om kei, ka khasum thupi zaw. Ding ding lai hoh dih ning.

11am hong sat ta

Kumpite hong kilem kei leh gal kidona hong om dinga kei lah galkap nautang hipan lai, tungsiahten gal antah in hong nei ngel ding ahiteh galsung a ka sih liang ding ngaihsun zo keng. Ciahkik mai ning. (tawmvei hong ngaihsun deda leuleu hi.) Bangbang hileh ka sih lezong kumpiten ka luangman ka innkuanpihte na pia dinga, amau nungta thei tuam ding. Inah bangmah sep kician nei lo a ka om sangin hoih zaw veve. Ding lai hoh dih ning e.

Sun nai 12 hong sat ta

Guai aw kei galsungah si peuhmah leng ka luanghawm munkhat peuhah hong kiphum ziau dinga, ui vakvai khat peuhin ka gimnam zaleh hong kiphumna leiphil khuatkhuat ding a, ka luanghawm mu leh a duhna teng ban nek ding. Ngaihsun zo keng, ut kei lua ingh. Ciahkik ning. (tawmvei hong ngaihsun leuleu hi.)

Aw ka sih lezong ka gam ading a si hiding, sih maimai sangin minphat huai zaw hi. Ka sih khit ciangin ka luanghawm in bangmah phawk nawn tuan ken teh. Ding lai hoh dih ning.

1pm hong sat ta

Kalaisai, galsunga si te luang pen kikai khawmin setpi tawh kigawi peekin laidal in bawl kici hi lo hia. Hih thu migen za ngei ngel veng aw. Thukanten a gen uteh Hitler hunlai bangin misite vun laisai in bawl uh a, tuahun laia ten agen uteh misivun tawh a kibawl laisaite pen to mahmah, nal zekzek in nuam lua ci uh e. Kei luang khawng laisai bawlna in hong kineihsak kha in teh. Hithei sa zo keng, kik leh mai tawng! ( hong ngaihsun teutau leuleu hi.)

Ok, bang bang a piang zongin phamawh kei. Si khin peuh leng bangmah phawk nawn tuan kei ning. Pasal, nungkik lo e maw.

Tua khensatna tawh nehpet teta in hong ding teutau hi. 3pm hong sat petmah ciangin ama interview hun hong cing ta hi.

Zumsung panin pasal uniform silh khat in na sam pah hi.

“Lawm hong lut o, nang hun hi ta ei.”

“Na ngaklai pak o,thu hong ngaihsun phalai pak ning ei.”

A khut tegel tawh taldawm liangin hibangin thu hong ngaihsun hi:

Galsung ah simawk in hileng ka luanghawm tawh laidal na bawl ding uh a, zum thupi khongah laitannei mipilten kei tungah thu tampi na gelh ding, tuabel phamawh sa keng. Lamkim lampaam a vansaiten vantunna dingin hong zang ding. Hong deih nawn loh uciang ninbung sungah ahikei leh hawkguam sung peuh hong denna ding, ahikei leh nelsiakna khongin hong zang ding. Tuazong phadawm lai! Laidal a hong kibawl khit ciangin numeino pawlkhat in kimawlna a hong zang ding, vanleng leh gunkuang peuh hong bawlna dinga, nungak sinpha ngial pawlkhatte bangin hehna nei leh hong balkek daldal ding hilai. Hong balkek daldal ding, hong balkek daldal ding hi ta ngial! Kalaisai hih thu peuhmah bel zaneu huaisa lua ingh, thuak zawh ngap mahmah keng.

“Hello,siapipa aw kei na ciahkik mai ning e. Galkap lut zo kei mai ning, ka lung akia himai ei boss. Sorry maw, byebye”

ciin del liangin ciahsan vingveng hi ci.

(kipuah kawm lah ahi lo, cimphawng maimai takpi hi. Hahaha.)

Francis Lamthang
…Zomi Quavadis….