Babylon luite gei ah… ~ Zomi Quavadis

Babylon luite gei ah… ~ Zomi Quavadis

“Gam dangah kum tampi a om khit ciangin ama pulepa te satsa leitangah ciahkik a, “hih ka gam, hih ka leitang hi” aci theilo mihing namuh leh tua mihing hoihtak ciamteh pah in…”ciin mangkangte mipil khat in latomno POEM sungah nagelh hi. Sim suksuk lai dih ni.

“Tua mihing pen a tenna gamah mi mangthang bang dinga, nopna dahna ah a uap ding kuamah om lo ding hi. Pilin, siamin, hauin gual tungtuang liang mah taleh kamsiam tawh amin bekin miten uap dinga, lungsim tawngpan lungdampihna tawh kuamah in pahtawi lo ding hi.” acih khit ciangin hih latomno gelhpa khawl nuam nai lo lai hi. Aban hibangin hong zomto leuleu hi. ”

Bang hang hiam cileh hibang mihing pen gam leh lei itna nei lo, ama angsung bek a khual,ama minam a thupi sim lo hi a, mi mangthang leh lungsim kician nei lo, a paihphat mihing khat hi cihna a hihi…“ tua teng agelh khit ciang zong hawmthawh lai hiding hiven hibangin laigelhpa mah in hong behlap lai zen hi.

“Hibang mihing pen a omna mun peuhah kuamah in it lo a,kuamah in zong zahtak lo hi. Ama kiangpa’n hamphatna ngah zawhna ding ciang bek tawh hopih in mai-et bek lel uh hi. Deih loh penin sihna manna khat tuak lezong ama sihna hangin kuama khitui malkhat zong luang lo dinga, ama khankuang kimah vul ningniang in atu kuamah om lo ding hi. Ama luanghawm tungtanga thugen ding takpi zong mi om lo ding hi.

Agui ding mi kuamah om lo ahihman in ama omna gammite’n hehpihhuai sakna lel tawh amau ngeina danin gui dinga, tua teng tawh ama nuntakna leh asepna a bawlna khempeuh beisiang ding hi. Mite deihlohna mun awngkhat peuhah kiphum in, kuama phawk khak nawn loh dingin leiham tawh a luanghawm leh a pilna a siamna khempeuh kivuknelh suak ding hi.“ cilailai tazen hi.

Hih latomno ka sim laitak in Babylon laa, Israel mite kah tamlawhna laa minthang (ei Zomite’n akhiatna kan tumteng lo tak a Xmas khong ciang zanhak lianga ih dianpih theih zel) ka phawk veva peuhmah hi. Israelte pen laphuah leh lasak, tumging lam cihte ah na kiva hi ding uh hiven a saltanna gammi Babyloniante’n a cimphawng divua “ Na githa uh tum unla, na laa uh hong sa dih vevua“ acih tak uh ciangin Israel mite’n a githa te uh tum cih thadah singhiang tungah khai uh a, Babylon lui geiah tu didiam in kap ngelhngelh uh hi.

Bang hang hiam cileh, Israel mite genna ah “Ka gamsung, ka leitang tung lobuang vuah hih tumgingte tum in laa ka sa thei kei uh hi “ ci tangial uh hi. Tuahang mah in singhiangte tungah a tumgingte uh bangin Zion ( Jerusalem himai lo dia mete!) thu lungngaiin, mualliamsa hunnuamte phawk uh a, lungleng khuangai in kap ngelhngelh uh hi.

• “By the rivers of Babylon, there we sat down.
• And then we wept, when we remember Zion.”

By the Rivers of Babylon ~ Boney M (with lyrics)

A kihehnem zawzawn ding kuamah om lo uh hi. Tuabek zong hikei lai ei! Israel mite pen khutsiam nam hi uh a, innlam siam uh a, singtong nih leh thum gawmkhawm, belhkhawm in na hoih nono leh a kizang thei van khatpeuh a suaksak theite hi citciat lai uh hi. Tuahang hiding hiven Laisiangtho sungah “ Oh Jerusalem ka lungsim in nang hong mangngilh peuhmah leh, ka lei pen ka kamsung tunglam ah belhsuak henla, ka khut tegel in a siamna khempeuh mangngilh ta hen.

Ka khuak sunga om pilna khempeuh zong mangsiang sitset tahen,,oh Jerusalem nang kong mangngilh khak ni leh..“ciin kam kiciam ngam tazen uh hi. Kum tampi khit ciangin leitung gambup ah a kizeel Israel minam sawmlenih teng hong kigawm khawm uh a, a gam uh Israel gamah hong ciahkik uh hi. Israel gam leitang a siik phet un khukdinsuk pah uh a,a leitang mahmah nam in tawp dekdek zawzen uh hi. “hih ka gam, hih ka leitang hi”  aci lo kuamah om lo uh hi.

Etteh huai lua sa ingh. Israel mite ken thupi sa ngiat ingh. Ahizongin Manipur a eimi pawlkhat leh Mizote dana “kei Judah minam hi ingh” cia Judaism biakna zui a, Israel gam va tenden liang bel ka sawm loh loh penpen teng lakah sagih kitel kheh leh tuate lakah zong a kihel zo tam aw! Israelte leh Zomite unau khat hihang icih leh gam leh lei, ih minam ih itna zong kibang ngel in um khinkhian mai zaw veng aw. Tua ahih ziak in; “Qua Vadis Zomi?” “Koilam zuan in kal suan na hiam Zomi aw?” mah tawh khup phot ni. Happy Zomi Day, Francis Lamthang