Australia Parliament House Hall ah lungdam kohna nei

Australia Parliament House Hall ah lungdam kohna nei

Australia khuapi Canberra aom Nu. Cing Pak & Sia. Thangboi te nupa vaihawmna tawh Australia aom Zomi te’ Adelaide, Brisbane, Melbourne, Canberra pan palai pai in a nihveina Parliament House Hall, Canberra ah lungdam kohna ni 5/05/2019 Sunday ni zingsang nai 10:00am-1:00pm dong nuamtak kizanghthei hi. 2018 kumin zong khatvei zanghkhin uh hi. Tutung hih hun ah aki bulphuh pen namli hi-a:

1. Pasian hoihna leh thupha hong piakna ahang( Give thanks to our God for His blessing and celebrate His goodness)

2. Australia kumpi in nuamtak, suakta taka hong omsakna uh ahang(Thanks to Australian government for the opportunity to live in freedom in this wonderful country)

3. Australia kumpite leh asung aom mikhempeuh ading thungetakna( Pray for the Australian government and the nations)

4. Zogam ah Khristian Missionary te hong tundan (A brief history of Christianity arriving in Chin State, Myanmar) te ahi hi.

Hun paizia pen la makai Sia. Kap(Emmanuel Assembly, Melbourne) hunuk Pastor. Mangpi(Hope Centre, Brisbane) hi-in hici bang hong piankhiatna Pasian in a hopih dan Nu Pak in thugenna hong nei a, Syamah. Kimsan in solo hong sak khitteh short speech: Peter & Joy(Canberra) in hong nei in hici bang nabawl uh thupi mahmah kongsa uha, ko mangkangta dingin zong, ettehhuai mahmah uhteh ci hi.

Tua khitteh Rev. Do Khan Khai(Agape Mission Church, Brisbane) in Zogam, Chin State ah Christian hong tundan leh Zomite Refugee I suahna ahang, Mangpau leh Zopau tawh gen a, Australia kumpi te’n hi zah nong lakkhit uh lunggdam ung, lamkal ah tampi omlai ka hih manun hong huhlailai un. Tuaban ah hici bang lungdam kohna vai hong hawmkhia, hun hong pia Australia kumpite leh Nu Pak & Sia. Thangboi te nupa, hong buaipih Peter & Joy te tungah ka lunguh dam mahmah hi cih tawh a thugen khum hi.

Tua khitteh Pasain mizat Rev. Dr. Khai Khan Suan(Bethel AG Church) in Lai Siangtho late 118 sung bulphuh in lungdam koh a thupitzia leh Kumpi David nuntakna ah haksatna tuamtuam tampi tuakta leh lungdam a koh veve na tawh thapiakna nasia tak in hong nei a tha kingah mahmah hi. Tua khitteh Zomita ding thungetsakna, thupha piakna leh Malaysia, New Delhi, Thailand lamkal a omlai I mipihte ama uh aki hon nang khitui, naptui luangin thungetna tawh ma honna neihsak a, lungkimhuai mahmah hi.

Hici bang a bawlma uh a zanni 4/05/2019 Saturday ni zingsang nai 11:00am-1:00pm kikal in Canberra Parliament House sagihvei kimkot uha, thungetna nei uh hi. Hun khempeuh ki patma in Pasian mizat Rev. Dr. Khai Khan Suan mah-in Lai Siangtho simin thungetna tawh apmasa a, nuamtak zothei uh hi. Hun a mankhit uhteh thungetna mah tawh Siapa in lungdamkohna neihsak in a paikhempeuh in tha ngah mahmah uh cih thu kiza hi.

Tua ban ah tukha ni 3-5/05/2019 sung, nitak sim TUGGERANONG BAPTIST CHURCH ah tulai khangthak lasiam minthang te’n makaih in Pasian phatna leh biakpiakna nei ziahziah uh hi. Pasian mizat Rev. Dr. Khai Khan Suan mah in nitaksim kha ann vakna nasiatak in nei den in Music leh la lam tawh kisai nitak masa hong makaihsak Kawlgam pan Sia. Khaipi, Sia. Mungtawng leh Australia pan Sia. Thangboi, Pa. Hau Piang leh Syamah Kimsan hi-in nitak nihna hunuk Syamah Cingsen, Music leh la hong makaihsak Esther Sian, Tg. CS Sangpi leh Mebourne Emmanuel Pawlpi khangno te hi-a, nitak thumna hunuk Sia. Kap hi-in Music le la lam Melbourne Emmanuel Pawlpi khangnote mah in hong makaih in tha kingah mahmah hi. Hici bang hun nuamtak hong zawhpih I biak Pasian tungah lungdam mahmah hang. To God be the glory. Khaibawi