Athupi mahmah Thangsgiving leh Pasian tawh akizom USA gam

Athupi mahmah Thangsgiving leh Pasian tawh akizom USA gam

Dear Zomi ulehnau teng, Nov 27 pen America gam adingin Lungdamkoh pawipi ( Thanksgiving Day ) ahihi. Hih thutawh kisai in athupitna leh abul omzia pawlkhat konggelh khia a, hongbehlap i omleh kilungdam mahmah ding hi, iphawkkhak leh ingaihsut khak teng agelh pak ihihi.

Leitung bup aom Zomite adingin zong thupi mahmah kasa hi.

1. US gam sungah Kum 1774 Dec 15 ni-in Rev. William Gordon in amasa pen Thanksgiving Sermon nei hi.

2. Kum 1492 in Columbus in America gam tung hi.

3. Kum 1639 Jan 14 ni in Rev. Thomas Hooker in Thuhilhkikna 1:13,15 tawh makai kiteel zia ding leh makaih zia ding sermon pia hi.

4. Kum 1776 July 4 ni in State 13 in letmat thuh in gamkhat in dingkhia uhhi.Tun State 50 pha ta hi.

5. Kum 1787 Sept 17 ni in Constitution apna leh pulaakna nei uhhi.

6. Kum 1939 in Social Security Number zat kipan ta uhhi.Avaihawm masa kumpi Franklin D Roosevelt ahihi.

Hihpa pen term 3 kum 12 kisem sak hi.

7. Kum 1969 July 19 ni in Khapi tungah vatung to in hongciah kik thei uhhi.

8. Jan 20 pen US kumpi te Laisiangtho nam in akiciamni in kingaihsun hi.Anungpen 2009 Jan 20 Obama ahi a,Laisiangtho tawi Rev. Rick Warren ahihi.

9. USA kumpi sem masa pen George Washington hi in kum 1789 in nasep kipan hi.

Apa Augustine in atapa kum 11 aphak in sihsan hi.Tagah dinmun pan kumpi inndong atun Pasian ahihi.

George pen kum 65 dam hi.

10. Kumpi 44 in sem ta a. kumpi 8 kithah sawm in, kumpi 4 in mikhutlum tawh thahna thuak uh hi.

11. Laisiangtho bulphuh in America gam makaih uhhi.Abulphuh deuh uh Laisiangtho mun te anuai abang ahihi.

1. Makai ding tawhkisai in- Thuhilhkikna 1:13,15 .

2. Ki ukna ding tawh kisai in- Pau 16:32; ITim 3:5;Rom 14:12.

3. Neih lehlam tawh kisai in–Isaiah 43:7; Rev. 4:11.

4. Kipumkhatna tawh kisai in- ICor 12:12; Ephe 2:19,20.

5. Gambup kalsuan zia ding – Late 11:3; IIKhang 7:14.

12. Kawlgam tawh kizopna:

1813 July 13 ni in Adoniram Judson Pasian nasem dingin Yangon hongtung hi.

13. Zogam leh Zomi te tawh kizopna:

– Zogam ah missionarynupa kop 7 hongpai uhhi.

– Carson te nupa; Wooden te nupa; Strait te nupa;East te nupa;Cope te nupa; Nelson te nupa leh Johnson te nupa ahihi.

– Lai hongbawlsak Cope hi in Siampi na asem masa pen Dr. East ahihi.Hih Dr.East pen kum 1897 pan 1901 dong Southern Baptist Theological Seminary,Louisville ,Kentucky ah sang nakah a manphet in Zogam Zomi te kiangah hongpai in,Pu Thuam Hang leh Pau Suan te ,Rev.Vial Nang te tui hongphum sak pa ahihi.Sangmang lak ah sauvei adam pen Nelson tonu hi in kum 2013 Dec 19 ni in Norton khua Kansas State pan hongnusia hi.

14. Banghangin US gamsungah Zomi te 10000 val ki om thei hiam?

– Kum 1948 in Rev.ST HauGo Philadelphia khuapi ah sang nakah masa hi.

– Kum 1987 ciangin Rev. Eddie Gin Hang te sangna kah kik a,

-Kum 1991 ciangin Rev.Dr.Cin Do Kham te cihbangin tuni dong akizom toto ahihi.

Hihte sangin amasa zaw mi aom leh honggen un kilungdam sem ding hi.Ka theih khak pak teng agelh kahihi. Pasian itna thu Lungdamna Gospel thu hongkipuakna gam ah Zomi te tam i teenpen na thu ingaihsut ciangin Kha thu ah inu ipa kiangah Topa in hongtam puak pen hidingin ka um hi. Iraq gam khawng ah kuamah i pai nuam kei ahangpen amau kiangpan itna thupha isan omlo zong hikha ding hi.

15. USA gam ah ei Koici om ding?

Anungtap Pasian it den in, amau kianga pilna , hauhna leh thuhoih thupha te ingah sawm ding hi. Amau gama ahoihlo ngeina leh dan tuamtuam te ei adingin ilakei ding hi. Amau gam adingin thupha isuah zawh nadingin thu ngen in ma ipang ding hi.

Topan USA gam leh gamtuamtuam a om Zomi te khempeuh Thanksgiving thupha hongpia ciat tahen.
Lungdamna leh lunggulhna tawh, Rev.Pau Khan Khai. Southern Baptist Theological Seminary. Louisville , Kentucky