Asiading Honkhia in ~ Sia Kam Thang

Asiading Honkhia in ~ Sia Kam Thang

Thumasa – Sen te’paunak ah “kum khat kikhualna ding tupna naneih leh lokho in, kum 10 nuntaknading natup leh sing nosuan inla, kum 100 kimang ding tupna naneih le Naupangno te pantah in” cih nei-uhhi. Ei Tapidaw te in zong Paunak khat inei-a, “Naupang limtak apantah pawlpi pen thahat in khangto a, naupang apantah lo pawlpi ahihleh kum 15 ma in beikik hi”, icihi. Tua ahihleh Pasian kammal Paunak in bang ci leuleu hiam, endihni. Paunak 22:6 ah “Naupangkhat aneulai-in Lampi man tawnsak lecin atek dong in lampial nonlo dinghi” na ci ahihman in naupang pahtah na pen athulian mahmah nang le kei i vaipuak ahihi.

Mivakvai peuh hongsuak ma-un na-olmawh khalo, na donkhalo, na pantah khalozek ihidiam, cih kingak sut huai kasa mahmahhi.

Nu le Pa te, na tano pen mithupi khat ahongsuah ding leh mi vakvai khat ahong suah ding nang le kei pattah na tungah kingahi, cih phawkni. I gam sung, I Pawlpi sung le i-innkuan sung ah khangno pawlkhat i-et ciangin , akilawm lopipi a gamtatna, a zum huai gawp gawp a omna, thu-um lo te ading Pasian’ mindaina apingsak, thu-um mite muktusak, khangthak momno tampi hongom mawkna pen atamzaw in kipattahna hoih zolozek hidingin ka umhi.

Mipawl khat te in I Ta te khawng deihbang in honggamtalo in zukham zakham peuh in hongom uhciang, innsung guta cihbang peuh hong suak in, nu le pa zahnonlo, sang gam te olmawh nonlo cihbang peuh in hongom uhciang lungkham in aantang in biak inlam zuana, thungetsak nalianpi ineih pen hoih mahmah hi. Ahizong in iphawkding kadeih khat ah tuabang hongsuak ma-un na-olmawh khalo, na donkhalo, na pantah khalo zek ihidiam, cih kingak sut huai kasa mahmahhi.

Naupangte apattah huaizia

Naupangno te lungsimpen bangmah akigelhnailo gelhlohbu, aw bangmah akikhum nailo tape cassete, khaici bangmah aki tuhnailo lociing tawh kibangin siangtho sinsen mahmah lai uhhi. Tuahi-a, hihnaupang tetung, nagelhbangbang,nakhum bangbang , natuh bangbang, asia apha, hong kigelhkhia, hong ki lokhia, hong gahkhia ding ahihi. Mipil te in naupang no tepen tungman in nagenteh uhhi.

Tungmanpen anawilai in deih ciacia ki hekthei, deihbangbangin kibawl thei a, ahizong in hongkeu ciangin bangmah kihek, kibawl theinon lohi. Naupangno te ciaptehtheihna ana kan mipil te-in ‘naupangno kum4 apha khat in akhan tawntung atheihzawh zahding alang (50 percent) pen theikhin uha, alang pen tuanungsiah ah abehlap tohding uhhi’ ci-in pulak uhhi.

hihnaupang tetung, nagelh bang bang,nakhumbang bang , na tuhbang bang, asia apha, hong kigelhkhia, hong ki lokhia, hong gahkhia ding ahihi. Mipil te in

Naupang te-hun amanphatzia

Sumtampi anei tesangin hunsaupi aneite enhuai-in thupizaw thamhi. Tua ahihleh kuain hunsaupi neilai pen uhhiam? Thupi isakmahmah US President Obama, hampha isak mah mah mihaupi Bill Gate, I en mahmah bawlungsuaih siam Christiano Ronaldo cihte sangin hihnatano keiukeu in hun hauzawtham lai mawkhi.

Mitampi in hun tawmnei kisalua, azatbeisa-uh hunte lakiknuam in thumthum, tautau in aomlaitak, hih natano in hun khem peuh maituah sa in hak hiuhiau cih mawkpen bangzahta thupi-in man phahiam? Tuazahta hunmanpha khem peuh amai ngat natano bangci zatding nahia leh? Nang khutsungah Pasian in hong koih hi. Nazatkhialhding pen lauhuai luahi.

Ahuampi in genle’ng Nitumnalam te-in napicingzawuha, atate peuhmahuh zingsang, nitak Lai siangtho simna, thungetna cih tetawh pantah in, thumanna, cihtakna, makai lungsim neihna ding cih te nakpi in sinsak uhhi. Judah mite in naupang pattahna thupisakuha, nipikalkhat in nai 7 sung nau pangpattahna in zanguhhi. Roman Chatolic pawlpi inzong naupangno pattahding thupi koih mahmahuha, kalkhat in nai 4 sung naupangpahtahna inzanguh, cihi.

Adang Pawlpi dang tampi te-in zong naupang pattahna thupisa mahmahuha, kalkhat sungah naikhatcihbang (nipinizigsang bek) naupang pattahna in zanguhhi. Adang Pawl pi tampimah nau pangpattah na aneilo zong om vevehi. Pawlpisung genloh innkuan sung mahmahah Lai siangtho sim khawma, kihilhna azang mi tawm mah mahhi. Atamzaw in Inn kuan laisaing tho sinhun kinei lotek zaw hi. Sanginn te ah zong Pasian thu nasin khahet lozaw uhhi.

Mitampi in hun tawmnei kisalua, azatbeisa-uh hunte lakiknuamin thumthum, tautau in aomlaitak, hih natano in hunkhempeuh maituah sa in hak heuhiau cih mawkpen bangzahta thupi-in manphahiam?

Naupang te kisap masak

Tuana khutsunga om nangpattahzia, nang mikhekle, nang kamsuah hong ngak kiukeu tua natano amasa penpen in siale pha hongkhen theihtung phetmah, Zeisu hong muantheih tungmah in Pian thakna hongneih theih dingsang athupi masazaw omlohi, tuading nakpi thu nget sak le hilh tawn tung ding kisam hi. Aneulai panmaha anapiang thaka Pasian’thutawh lim tak kipantah tepen Pasian in muibun takin nazang tohi-a Leitung nuntakna mahmah azong Pasian’ading hun tampi neizaw pah uhhi.

Leitungbup ah sangmintahng mahmah khat ahi Bop Jones University phuan khiapa Bop Jones Sir pen kum 5 aphak in napiangthakhi, kum 15 aphak akipan Pasian’thuhilh in leitungah miminthan pen telakah khat hongsuak in Evangelist Bop Jones zong kicihi.

Thuhilhsiam Pasian mizat khiamahmah Prince of Preacher akici zawzen pa Charles H. Spugeon pen kum 12 aphakin napiangthaka, kum 16 aphak ciangin Cambridge gei-ah thuhilh kipan tahi. Khangno luamahmah lai ahimanin Nuapang thuhilhpa (boy Preacher) kicihi, leitungah thugen siampen pahtawina ngahhi.

Kumzalom 17 sunga, Kha Khanlawhna lianpi tunnading Pasian mizat thuhilhpi Jonathan Adwards pen kum 8 aphak in piangthakkhinhi. I labu sunga Pasian phatna Hynm tampi aphuakpa laphuak siam Pasian’ mizatmahmah khatahi Isacc Watts, apain thakin kum 9 bek phapanhi. Laisiangtho hilhcianna tam piagelhkhia Laisiangtho siam Matthew Henry zong kum 12 aphak teh piang thakhi.

Misana telak-ah sang mang sem Jim Elliot apiangthak in kum 6 bek phapan hi. Tuabanah Banjamin Flankin, David Braned, John Wesly, Chares Wesly, William Cary cihte akipan Pasian mizat tampi tak tepen aneutungmah pan un pianthakna nei-in Pasian’thu lela mahtawh ana kimakaih, ana khankhiato te vive nahi-uhhi.

Mipil te ciaptehna-ah Pasian’ thutawh limtak akipantah teleh kipantahlote pen Khalam, pilnalam, khantohnalam ah kilamdang pha mahmahhi, cih mukhia uhhi. Lei tung tangthu akikan ciangin mi that 90 percent te pen kum 12 pan 24 kikal vive hi-uha, aneu lai uh Pasian thutawh lim tak akipan tah lote vive hi, ci uhhi.

Thukhupna

Tuni a naupangno tepen zingteh makai dingte hi-uha, mihing te pen atheisa, asiamsa asuak omlo ahihman in pattah kul ,khalhkul, vei le cin kulhi. Tuni in naupang te hoih phatak ipattah leh zingciang igam hong dai, hong nuam dinga, Tuni a naupangte in Pasian hong zahtak le zingciang I innkuan, ipawlpi hong khangin hong nuam ding ahihi. I pawlpi tuzawh kum 15 ciang bangci ding cih pen tu-a naupang te ipattah zia tung zong hong kinga pah dinghi.

Nata no tuni donlo-in, na awlmawh kholkei-a, na pattah khak kei leh, mivakvaipeuh hongsuah nungciang, Pawlpi mindaisak Pasian’ mindaisak le innkuansung lungkham sak peuh hong suah ciang eima’ gitnatlohna eima liangkotung hongtu veve dinga, eima gitnatlohna eima tate tekmah in hongpholak khia ding uhhi.

Tuasang alipkhap huai zawlai in natano napattah zia tungtawn in Pasian in thuhongkhen taktak dinghi. Tuahi-a Pasian in nang hong ap na tano te na pattah khiat ding nakpi lipkhap huai hi (Mahte 18:6).Agolkhit uhciang zong kikhelzo mengmeng nonlo ahihleh aneu tungphetpah un biakna thutawh pattah ding lohngal adang omlohi.

Tate hoihnading ideihsak takpi leh tumah mah akipan innkuansungpan mahmah Pasian’ thumah tawh limtak ipattahding, biak nathu tawh kipattah namun te-ah ipuak ding, apantah te panpihin Pasian’hong piak septheihna mun ciatciat tawh ipan khop ding thupi phamahmahhi.

Natano sumlepai tampi naguat sangin thumanna lecittakna, pilna bulpi ahi Pasian zahtakna guanthei lecin nakpi manphazawpekhi.

Pasian zattheih, mipil misiam, migina ding pipi kipattah khaklohna hang a mivakvai suak, mite gal, Pasian gal suak tampi omzo cih ngaihsun in! Tua hongkhangthak dingte tuabang in naphal diam? Amau pantah a Khazih kiangtunpih ding in nang le kei mawh puak ahihlam phawkni. Hih in Pasian’ hongsawlna hi lohiam? “Mei phual sungpan dawhkhiatbangin mi dangte nahon khia-un!”(Jude 23).

Asia ding honkhia in, Asi ding don in! Zeisu hotkhiatna thu theisak inla nungzuiman asuah nading pantah in! Kai in lamkhialmite, phong in apukte Sepzawhnang tha hongpiading Topahi.

More: Lei ah daitak in kivui ~ Sia Kam Thang

“Sanggam te aw, note khatpeuh thuman lampipanin pialkhia-in, adang khatpeuhin thumanlampi ah atunpihkik theihleh, tuabangin akhial mite lam man ah atunpihkik mipa-in akhial mipa sihnadingpanin honkhia-in mawhna tampi amai nadingin na asempa ahih nathu na phawk un” (James 5:19-20). Nang Kam Thang – RESCUE THE PERISHING, Gospel for the Next Generation