Articles & Comments

Articles & Comments

Gam khangto khinsa munte ah article pen media te tungah sum tawh kileisak thei uh hi. Ei Zomite sungah media ten zong veina vive tawh a khawnkhong in kisem a, article puak ten zong veina vive tawh a khawnkhong in kipuak hi. Network tungtawn in mail group le facebook groupte ah article hoih nono ka mukha zel hi.

Articles:
Thulu khat guangin lai i gelh teh tua thulu tawh kizawi tawn mah in thu i khup theih ding thupi hi. Biakna lamah nasem thugen pawlkhat in sermon asep ciangin thulu khat guangin thucin thutang gensuk a, a tawpna leh a thulu peuhmah kisai kilkel lo cih bangkhawng om thei hi. I thulu leh etkik zel a lai i gelh theih ding thupi hi.

Lai i gelhna ah galdo bangin kituat hilehang, thauvui, thautang, thau naseh cih bangteng balance tak a i thun theih ciangin Zothau lawng sung pan thautang hong lengkhia thei pan hi. Tua mah bangin lai i gelhna ah a kisam thuguipi thum om hi. Tuate ensuk in mailam ah a kuamapeuh in i zat theih tek ding thupi mahmah ding hi.

1. Thulu limci guang thei ding.
2. A telnop dingin paragraph khen thei sinsen ding.
3. Laimal khialh ningnung om saklo ding.

Lai i sim ciangin thulu ki en masa a, tua thulu in i lungsim honglak leh kisim suk nuam pah hi. Thulu kician mel omlo hileh lai i sim noptha suaklo hi. Thulu a hoih banah paragraph khen mello in apat pan atawp dong kizom suk detdat leh laisimte kibuai mahmah a, mitsi lo lianga khahsuah ding ki patau mahmah cih khawng om thei zel hi.

Comments:
Article khat i simsuk ciangin tua tungtawn in comment i piak nop leh ngaihsut khatna tawh cikmah in piak huailo hi. Thum vei sinsen na ngaihsutna tawh comment pia pan lecin khialh omlo zaw ding hi. Article khat gelh khiat nadingin hun piak kul a, khuak zat kul hi. Tua ahih manin i comment in phat tuamna a piangsak ding hiam?

Pawlkhat in apat pan atawp dong simlo in, mimal kapnopna peuh tawh thu telcianlo in article khat comment suk gawpgawp thei hi. Tua bang peuhmah i zat khak hetloh ding thupi ding hi. Comment gina khat in zong article pen support pia thei lua hi. Support pialo in a susia gawp i suahsak khak ding comment piak ciangin kidawm ni.

Dal Sian Hung
Kuala Lumpur, Malaysia