Annkhing Kham Ih Cih?

Annkhing Kham Ih Cih?

Annkhing Kham (John 6: 12)
(Annkhing a ne kikte annkhing kham kici a, annkhing paite annkhing kham kici thei lo hi. Banghang hiam cih leh annkhing zeek kik, zat kik theih loh manin annkhing ih kham zo nawn kei uh hi).

“A kikhamvalte kaikhawm kik un; bangmah mawk val sak kei ni”
Tuni tuhun in zong Kawlgam ah mihing 20000 sim ii ann kham valte kikaikhawm thei hi leh paipel 12 pha lua mahmah dinga, Kawlgam bup mi phazah ii ann kham valte kikaikhawm thei den hi leh Zogam sunga Zomi te zing le nitak ann hong vak den zo ding ahi hi. Ann a kikhamval ciangin mun nih pan supna om hi. Ann leina sum a lang a kimawk piak tawh a kibang hi a, tua ih leisa ann a lang a mawk paihpaih tawntung tawh a kibang ahi hi.

Zomi te le Kawl mite ih kisap mahmah thu khat pen ih neih zahzah koici zeek ding (How to budget?) Koici zat ding (How to manage?) ahi hi. Hih mun ah a khangto sa gamte ih ban het kei uh hi. Annkhing pai namte ih hi kha a, ann khamval a om sak nuam hamtang ngeina neite zong ih hi se uh hi. Zomi te sangin Kawlte suk zaw lai uh hi.

Gamdang mite in nek theih singgah thei puam khat ih kiat suah leh ih kiat suah zawh second 5 sungin tawm kik man peuh lehang bangmah kihhuai lo a, siangtho lel hi ci-in top kik a kul ahihna thu internet headline khawng ah a suak sak laitak un, buh a tam piang mahmahna Kawlgam mite in a kia sa peuh mah tawm kik lo uh a, annsai khawng ah ann nek ciang le niangtui dawn ciangin kham lo pipi in a langlang tang ding bang nek loh dawn loh in nusia uh a, style khat le hauh lahna hiam khat in kinei se hi. A annkuang zut sitsette le a bawng nawi a niangtui dawn gai sitsette a maizum huai in a kimuhna gam ah a teng ih hi hi.

Mizawngte innkuan ann nekna ah pai lehang ta hau uh a, sabuai gei ah, uino khat kham ding ann neng pak zihziah in kia hi. Ih zawnna thu ih gei ah kilang pah hi. Mipil taktak lote le mihau taktak lote in a ann kuang sungah ann khamval tampi om saka, ann neng tampi kia sak uh hi. Ahi zongin mi khangtote in ann kuang sungah ann neng zuut siang sitset in tang khat zong om sak lo a, a nekna kuang nangawn sawp kul lo zah in ne gai-in siang sitset sakzo uh hi. Tua pen a zawn man uh hi lo, a mai zum huai zong hi loin bangmah a mawk val sak lo minamte ahihna uh a kilang sak hi zaw a, annkhing khamte suak zaw uh hi. Ann pen ih nau ih tate’ tungah na kham val ding uh thuk kei un, na kham zah ding uh ann a vai khak thei, a ne theite ih hih ding thu pi hi. Ih kuang a zut siang sitset minam ih hih mateng annkhing kham ih suak zo kei ding uh hi. Ih khamvalte kaikhawm sakin, tuun saka inn ah a pua ngamte ih hih mateng in annkhing kham minam ih suak zo kei ding uh hi. Ann khamval ih zum pih leh annkhamval in zong hong zumpih ding hi.

Khuapi sungah kumpi nasem mi khat in, ann huan loin lei ziauziau a, ahi zongin a khamval a lang bang cian denin ninbung sungah pai ziauziau leh a kha sum Ks. 200000 a sanna lak panin Ks. 100000 a pai-pai suak hi. Kawl mite’ muhzia ah gamdang mite gamtat zia ahi, zeekna le zatna (budgeting and management) ih et ciangin cil ih sa mahmah a, ih neu muh nuam kha deep hi. A taktak in ci lehang a khangto gamte in ei mizawng gamte tua khamval paipel 12 tha tawh hong huh huh uh na hi bek hi.

Zomi te zong ann khing pai ziauziau pawl ih hi hi. Vok ann dingin ih zat theih pen pha dawm lai hi. Kawlte’ daan mah in, a val om sakna, a kia sa top kik lohna, annkuang zut sitset loin tampi pi kikham val sakin gamtatnate ah ih mai zum kei uh hi. Ahi zongin minam dangte lak nangawn ah saguh a kei ziahziah ngamte ih hi bilbel hi. A taktak in ci lehang saguh pen keih vamvam ding kilawm lo a, ahi zongin ann tang khat zong val sak lo a ann ne tui dawn thei ih hih ding kisin huai ta hi. A maizum huai ann khamval kineihna panin a lungdam huai annkhing zeekna, zatna le annkhing kham gamtat zia ah kalsuan ta ni. A nuai ah Kawlte ann nek zia le miciim pa ann nek zia na mu ding uh hi. Mihaite ann nek val eu-au sak uh a, a inn uah pai lehang lah a zawng pi ahi uh hi. (A kineih nuntakna). Mipilte’ ann nek siang sitset a, ahi zongin a inn uah pai lehang annkhing khamte na hi uh hi. (Ahi ding banga nuntakna)

Leitung ah a val cih bangmah a om loh lam, anntang khat tawh annkuang khat a piang thei pan ahih lam, a siangtho zia tawh ann khamval a piang khia sak theite ih hih ding a thupit lam cihte a thak in phawk sak ciat ni. Khamval om sak lo ding hanga, khamval a om leh zong val sak lo ding hi hang. A kikaikhawm kik thei dingin a khamval thei ih hih ding le tua a kikhamvalte a kaikhawm a zeek kik a zang kik thei minam ahi dingin Topa in lam ong lak ta hen!!!

Evan. Suang Dal