Zomite a muanhuai leh a picing minam hihna lamah ~ Khup Lian Thang

Zomite a muanhuai leh a picing minam hihna lamah ~ Khup Lian Thang

Leitung-a om mihing khempeuh, minam khempeuh in amau’ mailam ding, amau nuntakzia ding leh amau pen bangci pianzia anei hi a, mite in a bangci minam in na ciam teh ding, cih pen mimal khatciat in teeltawm theihna a khut sungah nei ciat uh hi. Lai-at siam Arthur Friedman in “Mipil mahmah te ki zahtaak a, mihau te thupi kisa in ki eng mahmah hi. Ahih hangin mihoih midik te ahih leh ki-it in ki muang hi” na ci hi. Hih a tunga mihing nam 3 sungah koi zaw pen na ut hiam? Koi bang mi in hong ki ciamteh dingin na ut hiam? A huampi in leitung ah mihing a tam zaw in mipil leh mihau hih tegel ki ut pen le thupi kisapen ciat hi. Tua mah bangin Zomite’ lungsim puakzia limlim ah zong pilna leh hauhna mah thupi nasa penpen uh hi.

Sangkah na ah a pil pen te mah thupi nasa in, nu leh pa te in zong a tate a pilpen a siampen ahih ding mah uh na deih penpen uh hi. Tua mah bangin sum leh paai hauhna zong ki lunggulh penpen a, bang hangin sanggkahna hiam cih ki dong leh , nasep hoih ngah ding, sum leh paai tampi mu ding cih hipi pen zaw pian hi. Biakna upna sungah ah zong nasep daupai na ding, nasep hoih ngahna ding, sum leh paai ngahna ding cih mah bulphuh in thu kingen kha liang hi. A hih hangin leitung nuntakna ah a thupi pen ahi mihoih midik hih ding pen ki hanciam khalo ngaihsut in zong ki nei khalo citciat hi.

Mangkangte Minam Thupite

Kawlgam mite in a theih leh a ki gengen khat ahi General Aung San leh Mangkang galkap mang General William Slim te pen, Kawlgam pan in Japan te a nawtkhiat zawh uh ciangin Kawlgam galkapte mailam kalsuan zia ding tawh kisai ki muhkhopna khat na nei uh. Tua kimuhna ah General William Slim in,“ No Kawl galkap te kong kisam kei hi. Hih Japante zong, ko’ thatawh a dong hi lel ung. Nung lam deuhmah in ko Mangkangte hong nawtkhia in Japan te tawh akipawl ngei na hihna hangin tu mahmah in zong hong man in thong ah hong khia thei ing” a ci hi. Tua ciangin General Aung San in, “Tua bangin hong manlo ding na hihna hong thei ing, banghang hiam cih leh nang pen British u lian khat na hi hi (British te mi thupi, thuman lo in gamlo aci nuam hi.)” ci in dawng kik hi.

Kawlgam in suahtakna a ngah cil in Prime Minister a sem masa pen ahi U NU in, “Yangon University ah sang naupang makai kasep laitak hun lai in, University ah Mikang u liante‘ vaihawmna deihlo in, lungphona ka nei zelzel uh hi. Khat veivei tua lungphona pen a thupi lua in kibawl zolo a, mipi thu kizakna (News) te ah nakpi takin ka suaksak veve uh hi. Tua hangin gambup phial in simkha ahih manin mipi ka lok zo veve uh hi. Tua bang hun ciangin Univeristy ah Professor te in hoihtak in hong kimuh pih uh a, ka deihna te hoihtak in hong kuppih uh hi. Bek thamlo in tua bangin buaina a om sakna hangin Mikang Professor khatpa bang a nasepna pan khawl zezen hi. Tua hun laitak in amau Mikangte pen Kalgam a uk te hi in, a thu neihna te zangin thong sungah hong khum mang leh zong a kingah ahi hi.

Ahih hangin tua bangin gamta hetlo in picing takin gamta uh hi. Hih Mikang te pen mi thupi taktak te a hi hi” na ci ngiat hi. Tua hang mah in Kawlgam bup in amau Mikangte’ tungpan suahtakna a ngah ciangin, Mikang kumpi tawh sum bawlkhawm uh aa huhna tampi ngen in ki nak zop mahmah uh hi. Nidang in sila in hong bawlte hi ci hetlo hi. Kawlmite tungah a metbawl nate maisak lua kisa in, amau tawh nasep khop ding amau’ pattah ding, Kawlgam ah suakta takin sum a bawl suak theihna dingin phalna na pia hi. Tua hang mah in zong Communist te in U Nu na telkhial gawp in galte tawh kipawl in gam leh minam a zuak cih zah dongin ki tawng uh-a buaina lianpi na piang hi. Gennop bulpi in ahih leh, Mikang te’ lungduaina dan te, a picing ziate uh a etteh huai mahmah na, galte nangawn lawm a suahzo mihoih midik, mi thupi leh minam picingte a hi uh hi.

Zomite Mihoih Midik, A Thuman A Citakte

Zomite’ ki ciaptehna pen Vaphual hi in, a khiatna in thumanna leh cihtakna cih limlahna ahi hi. Zomite’ tangthu sungah zong dikna, thuman leh citakna tawh kisai tangthu tampi kimu thei hi. Thangho leh Liando te’ ki itna tangthu ahi zongin, Cingkhup leh Ngambawm tangthu te ahi zong, tua tangthu tungtawn in Zomite pen dikna itna, thumanna leh cihtakna cih bangin thu laigil tak tawh a nungta minamte ahihna ki mu thei hi. Ukpi te’ hun lai in Zogam ah kialpi tung ngei a, Ukpi pa in a neihsa van manphate, Saiha leh a neih leh a lamh teng zuakin a mipihte’ nek leh dawn ding a leisakna zong tangthu ah ki ciamteh hi. A mipihte a makaite’ tung a cihtak mah bangin a mipihte’ haksat hun ciangin zong nusia hetlo in a et kikna, itna bulphuh in nungzui leh makaite’ kizop ziate hangin tanglai Zomite zong a dik, thuman thutak tawh a nungta ngiat minam thupi a hihna kimu thei hi.

Zogam in Shan gam, Kachin gam leh Karenni gamte leh Kawlzang gamte tawh kipawl in Belpawl Gam khat phut ding cih ngimna tawh Mikangte’ tungpan suahtakna lak dingin thukimna na nei uh hi. Thukimna a neih mah bangin gam khat in na ding khawm uh a, suahtaakna ngahkhit ciangin Mualtung mi Karente makaih na tawh Gamsung ah tualgal lianpi na kipan a, tua kawmkal ah Communist te zong Belpawl kumpi na lehdo uh ahih manin a Belpawl gam pen a buaihuai mahmah dinmun na tung hi. Zomi galkap makaite in tualgal kipat cil lamin Karente tawh kikap nuamlo in, Karen tawh ki maituah lohna ding deihna tawh gamgi cing dingin panmun a piakna dingin Belpawl galkap makaite kiangah ngen uh hi.

Ahih hangin kumpi thuneite vaihawmna bangin Karen gal a lauhuai penna mun ahi Insein gal maitang ah a pang dingin vaipuak kipia a, tua a kiseh vaipuak pen hangsan tak leh kician tak in vaipuak na la pah uh hi. Amau kipiak khiatna hangin Yangon (tua hun in Rangoon kici) khuapi na hon khia zo uh a, tua in Belpawl Gam bup a honkhia zo suak hi. Belpawl Gam ii Prime Minister masa pen ahi U NU in zong, amah acing ding amah tawh aki naipen-a aom dingin Zomite bek na deih hi. A motor hawl ding, a nuntakna ahu ding galkap te, a kumpi inn a cing ding galkap cih te ah Zomite bek mah muangin na zang ngiat hi. Zomite pen a hi ziauziau lo, thu tawh a nungta, a dik, a thuman leh a cihtak minam ahihna ki mu thei hi.

Minam Bup Min-Daina

Galpi khatna ahi zongin galpi nihna ahi zongin a kipatna khiatna leh buaina a bulpi pen Germany a hi hi. Amau’ minam bek ii hamphatna ding deihna tawh minam dangte that mang beisak mang dingin vaihawm uh hi. Leitung gam khempeuh zawhthawh thu tawh amau khut sungah tung sak sawm uh hi. Amau paizia a sepzia uh pen dikna itna ki hello, thuman thutak kihel vet lo hi. Bawltawm phuahtawm thu tawh a hang zong tawm in buaina leh gal piangsak uh hi.

Lam khat pen gen leng a gilo mahmah a tatsia mahmah minam khat in tuni dongin ki ciamteh hi. Mimal pawl khat hangin a minam bup lampial uh a, mipite in hoihtak ngaihsun lo in amau’ teelna mah tawh akah amakaite’ hangin a gam bup vut le vai a suak ahi hi. Leitung bup galpi lianpi bawlzo, tua hun laitak in leitung bup ii 25% bang a uk ahi British Empire leh, a thahat mahmah Russia gam ahi zongin, leitung ah gam ahau mahmah khat ahi America te to ngam, do ngam uh ahih ciangin tua hun laitak in Germany gam ii dinmun pen thuneu hetlo ding cih theihsa ahi hi.

A pilna uh, a siamna uh leh a gam hauhna uh pen nasia mahmah ding ahihna ki mu thei hi. Pilna siamna leh hauhna cihte a neih hangun, diktatna leh thuman thutak tawh na gamta lo uh ahih manin leitung’ tangthu ah a bei ngeilo ding leh a ki lipkhap den ding, a ki phiat theilo tangthu a nei uh suak hi. A khasiat huai penpen ah, khangthak a tu a tate ahi Germany minam bup in amau bangin a khialh kik nawnloh ding deihna tawh, tua hun laitak aa a tatsiatna teng khempeuh uh hoihtak in a neu a lian ii muhtheihna dingin nate lahna (Museum) ah kem zen uh hi. Na tu na tate te kiangah nang pen a bangci mi na hiam, na tu nate te in na tangthu a gen ciangin a bangci mi in hong ciamteh leh na ut hiam?

Kawl Makaite Diktat-lohna

A suakta Mualtung mite leh Kawlzang kigawm in belpawl gam phut dingin Kawlmi makai General Aung San in Mualtung mi makaite na zawn hi. Mualtung mi makaite in lungsim siangtho tak leh muanna taktak tawh gam khat in din khop dingin Panlong Thukimna tungtawn in na nei thei uh hi. Upmawh loh laitak in Kawl makaite’ kikal ki hazatna hangin General Aung San ki suamlum a, ama mun ah U NU in makai panmun na la hi. Suahtakna lak hun pan kipan in Kawlte in Belpawl gam’ thukhunpi (Constituition) a deih bang leh amau Kawlmite’ phat tuamna dingin na sawi kaih den uh hi. Suahtakna ngah phet mah in Kawl mite in Panlong Thukimna ki theihmawh bawl in Mualtung mite tungah ciampel pah malam uh hi.

Belpawl gam pen suahtakna angah hun-a kipan in Parliamentary Democracy ki-ukna tawh a kalsuan hi a, sumbawl paaibawlna lam ah a hoih khop ciang khat na tungzo uh hi. Tua kawm kal ah 1958 kum in Kawlmi gam makaite’ kikal ki lemlohna hangin tawmvei sung galkap mang General Ne Win in thuneihna teng na la hi. 1960kum in U Nu in panmun la kik a, ahih hangin a hoih hetlo kalsuan zia tawh na pai kha sese hi. A Belpawl’ pih ahi Karen, Zomi leh Kachin te pen Christian te ahihna a thei pipi mah in, Gambup biakna dingin Buddhist biakna zat dingin Parliament thukimna tawh na kipsak uh hi. Tua tawh kizom in Mualtung mite in Taunggyi khawmpi sam in Panlong thukimna a ngah kik theihna ding vai tawh kisai 1961kum, June kha in kikum uh hi.

Taunggyi thu kikupna bulphuh in 1962kum ciangin Parliament ah hoihtak kikup dingin Mualmi makaite, tua hun laitak Kawlmi makaite in na vaihawm uh hi. A hiang 1962kum March kha nih 2 ni in galkap mang General Ne Win in thuneihna khempeuh la kik leuleu hi. Tua hun pan kipan in mikhat mi pawlkhat thuneihna tawh Belpawl gambup ki-uk cip ta hi. 2010 kum in ki-ukzia kikhel in galkapte in kumpi a sep nawn lianloh hangin thuneihna bulpi te lencip lai veve hi. 2015 kum in leitung bup leh Belpawl gam bup in amuan mahmah Daw Aung San Suu Kyi’ makaih NLD Party in gambup kiteelna ah gualzo hi. Ahih hangin hoihtak leh suakta takin nasem thei tuanlo uh hi. Banghang hiamcih leh galkapte in thuneihna tampi len lai uh hi. 1962 kum pan in 2015 kum dong galkap te in a thu neih hun sungun golhguk ne in, mihau pipi na suak uh hi. Tuni dongin Belpawl gam ah mihau pen te pen hih galkap tawh a kizom te, galkapte, tate a tute vive hi lai hi.

Tu laitak in Daw Aung San Suu Kyi makai in Mualmi thautawi te tawh kilem ding a hanciam hangin tangtung thei mahmah lo hi. Banghang hiam cih leh suahtakna ngah khit-a kipan in Kawlmi makaite in a ut bangin thu khel ziauziau uh a, a kamciamte uh zahtak lo in a ut bangin Mualtung mite nengniam uh ahihna thu pen mi khempeuh in theita uh ahih manin kua mah in Kawlmi makaite um zolo, muang zo nawn mahmah lo hi. Langnih ki muanna omlo tuak ahih manin ki lemna, daihna a om theihna ding pen a haksa mahmah a hi hi. Tuni ciang dong, hih bangin gamsung ah tualgal om in, gal leh sa bangin ki do na a om hangin Kawl galkap makaite in khiap tuak nai tuanlo uh hi.

Panlong Thukimna bangin Belpawl gam sunga om minam khempeuh in liangko kikimna a ngah na dingin vaihawm khop ding hi ziau a, ahih hangin Kawlmite leh galkap mangte in tua a thuneihna, ki minam pi sakna leh a duhhopnate uh taisan zo nai tuanlo uh hi. Tua bang lungsim puakziate a ki laih masiah a dik taktak kilemna leh daihna a om theilo ding ahi hi. Hih Kawlte zia leh tongte pen nidang hun pek pan in tuni dongin ki zom toto lai hi. Zomi Pupa te in paunak khat na nei uh a, “Kawlmang’ thu akpi in phiat nelh” na ci ngiat uh hi. A man taktak ahi taktak paunak ahi hi. Tua bangin minam dangte in ahoihlo lam in a ciapteh, ahoihlo lam paunak in a neih minam khat na hih ding na ut peuhmah hiam?

Minam, Mimal, Kipawlna leh Pawlpi

A tunga minam thudik leh dinmun kician a nei, minam thupi ahi British te pen mite in muangin zahtakin etteh uh hi. Galte nangawn in zahtak in amau tawh nasep khop ding, thu vaihawm khop ding haksa salo uh hi. Alang khat ah itna neilo, dinmun kician aneilo Germany makaite hangin leitung gambup kisia zo-a tuni dongin leitung bup in ki lipkhap zo lai hi. Amau mah bangin Kawlmi makaite’ ciam pelna, angsung theihna leh itna a neihlohna hangin Belpawl gambup kisia cip a, tuni in kuamah in muangzo nawn peuhmah lo in, lungsim taktak tawh kuamah in muang ngam nawnlo hi.

Ni dang lai in Zomite zong mihoih midik dinmun kician anei minam khat in kiciam teh ngei hi. A lung hihmawh huai ah tuhun ciangin Zomite pen namdang te in amuan ding cih thadah in, amau leh amau nangawn a ki muang zolo dinmun tungta uh hi. Zomi te ahih nak leh khemnop, zu hai, haitat, kilemlo, party tampi nei, pawlpi tampi in a ki khenkhen te hi, ci-in mite na kihta nawnlo uh hi. Innkuan lungsim, angsung khualna lungsim, bawngsung bek khualna , kual lungsim, beh leh phung bek khualna lungsim, amau pawlpi bek thupit sakna lungsim a nei minam in na ki ciamteh ta mawk hi.

Hih a lauhuai dinmun pan in thokik in “Dikna, thumanna leh cihtakna, mihoih leh amuan huai ngiat minam, a belh taak party, Pasian thu laigil bek a thupi sak pawlpi, itna deihsakna nei minamte hi”, ci-in minam dangte, pawlpi tuamtuamte leh, Belpawl gam bup in a zahtak, a tuntun gamte ah gam mi hoih leh a etteh tak “Minam muanhuai” cih dinmun ngah kik na ding, “Thu” tawh a nungta minam picing hih zawh na dingin hanciam hun mahmah ta hi. Na tuntun na gam, na omom na leitang, na kim na pam na lawm na gualte in “Mipil te, Mihau te ci-in hong ki ciapteh sangin midik mihoih dinmun anei leh Thu tawh a nungta mi muanhuai te ci-in hong ki ciapteh ding thupi penpen hi.” By Khup Lian Thang Re: The Saturday’ Son, U Nu