Amu khat om ~ Lian Tuang

Amu khat om ~ Lian Tuang

Vatican khuapi sunga Sistine Chapel kawmtung le innkhum khempeuhah mihing sang a golzaw lim 400 val kisuai hi. Tua limte pen tumdangin hoih theih lua mahmah ahih manin tuni dongin limsuah pilna le siamna leh tangthute a kigen ciangin tua limte siksan le dapphah in ki nei tangtang hi.

Tua lim a suai pa pen Italy gammi Michelangelo hi a 1475 kumin piang hi. Pilna le khutsiamna nam tampi nei hi. Ahih hangin ama siampen le a uk taktak pen Suangtom, Sing le buante tawh milim le lim tuamtuam bawl ahi hi. Kum 30 a phak ma in khutsiam in minthang vangvang khin hi. David lim le Pieta lim a bawl pen minthang mahmah diak hi.

Aminthan mahmah ciangin Pope Julius II in Vatican ah sam hi. Abeisa a Pope (nusiasa ) kisial nading bukhoih mahmah khat lam dingin a sap ahi hi. Anunglam ciangin a thu khel in biakinn ah limhoih nono suai dingin sawl kik hi.

Michelangelo a pakta khollo mi pawlkhat in Pope holhthawh in lim a suai sak hi ding hi ci in tangthukansiamte in ummawh uh hi. Bang hang hiam cihleh Michelangelo in Pope sawlna mang kha zenzenleh amah limsuaih uk lo, siamlualo ahih manin a limte hoih loin a vangbei lel ding. Pope sawlna mangkei leuleu leh Pope lungkim loin amah zong a vang kiam pah hanhan ding cih ngimna hi ding hi ci uh hi.

Michelangelo in nasep sang ngam paklo takpi hi. Pope in a lim cih ciangin ka siam tawpin citak takin hanciam lel ning ci in khentat hi.

Amasa in nungzuipi 12 te lim suai dingin a thukim ahi hi. A thu khelkik in thuciamlui piancilna sunga tangthute siksak in lim tuamtuam suaih dingin khentat kik hi. Chapel innkhum tung le kawm tungah mihing sang a golzaw lim 400 val thallup sa in suaisuai hi. Kum 4 sung vilvel sawt hi. Gim mahmah in kiam dikdek a alawmte nangawn in haih zezen hi. A mit nangawn hoih pha nawnlo liang hi.

Limsuaih pen lungduai citak mahmah in khoih ciauciau hi. Zemzem zutzut mai hi. Enkik zel puahkik zel in damdam in semsem hi. Khatvei innsun khawm khua a mialpianna munkhat ah lunglut le hamciam takin lim khat suai ciauciau hi. Lungkim thei loin zut phapha puah phapah ahih manin a lawmte khat in “ Tua lai mun bel kuaman mu zo khollo di ven. Nak hanciam lua si cia”cih san hi.

Adawnkikna ah “Kuaman a muhloh hang Pasian in mu veve in teh” ci kik lel hi.

Kum 4 khit ciangin a nasep zo hi. Pope le mipite in hoihsa mahmah hi. Pahtawina minphatna tampi kipia hi. Tua limte hoih mahmah takpi a, tu ni dongin leitung mun tuamtuam panin lim en dingin kipai ziahziah hi.

Limsuaih pilna siamna lamah Sistine Chapel sunga Michelangelo khutmate tu ni dongin etkak le bulphuh kinei lai hi ci in khutsiampilna le tangthukansiamte in ciamteh uh hi.

Hih tungtawnin i phawk ding thu om hamtang dingin ka lamen hi. (Kyawkyawhliang. Pg 25)/ Lian Tuang