Among omlo Zomite ciin thucin thutang

Among omlo Zomite ciin thucin thutang

Sunglutt
Lawkihun bek hilo tuhun dongin, sunglutt kigenmun mahmahlai hi. Topa Jesu pen Pasian-sunglutt ci uh hi. Pasian tapa mihingin hong suak cihciangin sunglutt mah hilel hi. Tua pen Pasian bek septheih hinapi Satan in zong apengsuah dingin naseem hileh kilawm hi.

Japan gallai-in Kapteel thaupi tawh hong kikaap a, zingtungin galtai-in kisa kheukhou hi. Pu Khan Tualte nupa galtai sialkongmai atun laitakin thaupi in kha a, asinlawt in angawngzang zong khalai hi. Pu Khan Tual in azi khibah aatsat a, tuatawh azi taisan tamai hi. Amaute pen Thang Khawmnu, Thang Khawmpa aa kihopih ahi hi.

Tua khuasung aateengmah ahi Suan Za Thang tanu apautheih ciangin keipen Thang Khawmnu kahi-a, ci-in a thupiang khempeuh kicingtakin sutdeudeu hi. Adipneem ah liamma letmatli sau khat omaa, angawngah zong meimapawm lian simsim om hi. Thang Khawmnu sihhun leh hua nu pianhun kituak sinsen selai hi.

Nidangin Pasian nasemm thuhilhsia Sia Thang Gin pen Sukte gungal teng khuavak puak masa ahi hi. Pawigal dolai ahi hi. Galte pai atheih ciangin khinpi tungah bu hi. A galten mu-a teipi tawh dawt hi. Hongdawtlup phetin kalengkhia pah a, keima luang kamu hi, ci hi. Hong kiguini langtungah hong kilaplap laitakin gawldawnpan ka-en hithiat hi, ci hi.

Miksi-in ka om a, vom, sazul,ngal cihkhawng manin kazawng ngeingai uh hi. A pua panin misi in khaupe zawng peuh hilel, ci-in gen hi. Mihaute sunglut haksa hi, sa mahmah hi. Mizawngte sungpen votin nuammahmah ci’n gen hi.

Pawlkhat ten umphalo hi. Mihing sungah lut cileh uphuai ven, miksi-suak, khaupe-suak mihau sungah lut, mizawng sungah lut cihpen tamkawmlua, Budhist upna tawh kizawitawn aa, hong mengmeng mawk ahitam, a ci zong om uh hi. Ahih hangin lamdang kisasim giugiau tek hi.

Mihingte lakah tua bang apiangthei mah maw, Dawi nasepna maw kuaman tel zolo hi.

Kaunei

Kaunei cihpen Lawkihunin kilipkhap mahmah hi. Tua bangaa ki-ummawhte zi ding leh pasal dingin kideihlo hi. Dawi nasepna namkhatmah hizeel leng ding hi. Agen ciangin, zanin a pumpi panin leengkhia aa, dumdepi bangin vakkhia thei hi. Naungeek khawng amaumuhna ah ompihnuam phalo uh hi. Naungeek limci a iplahte pen zanin naungeekno in nuisak lehleh a, ne hi, ci-in kigen hi.

Pawlkhatte in kauneite pen aluguak vakkhia thei hi. Tua lutang avaklaitak a pumpi kihei leh lutang vaak hong ciah ciangin bulhkik theilo hi. Puakliapliapin bulh bulh hi. Abulh theihloh ciangin leengmang aa, tua kauneu pen si hi, kici hi. Kauneite pen amau leh amau kitheihna nei uh a, kisungsia uh, milakah om nuamsa lo uh hi. Khangluiten kaunei kisungsia ci-in paunakin nei uh hi.

Kauneite pen min lipkhap mahmah napi, ameelhoih nuamdeuh, a ci zong zoldeuh, zong kamsiam deuh uh ci sawnsawn hi. Ka Nu leh ka Pa zong kaunei lipkhaplai mahmah uh hi. Katangvalno lai-in, ” kaunei peuh hong tuak kha kei un maw?” hong cithei uh hi. Kangaihtata kaunei ci-in kilipkhap henla, ken ngahleng ka-ut veh, kacihleh kanu’n ” nakam nalawl kidawm in,” hong ci hi. Lau petmah uh hi.

Christian hong tam semsem a, kaunei tawm semsem a, kuaman zong lipkhap nawn se lo hi. Khuaneu pawlkhat ten gen theilai uh hi. Ahih hangin nidangzahin laang nawnlo hi.

Dawilawmnei

Nidanglai Lawkihun sung Dawilawmnei khua khempeuh phialah om hi. Tua ciangin dawilawmnei tawh a kinaihmahmah zuneeknamun aa asuakthei zel vankah kici pawlkhat omleuleu hi. Vankahte pen misisate tawh kikhawlaa a nungtalaite tawh kikalah kamphen bangin thusung hi.

Kanau Dim Suan Cing ithuai laitak hong si hi. Khuado hun hong tung a, lawm anne-in ki-omkhawm uh hi. Nitak anneek hun ciangin ka Pa-pi vankah hong kipan hi. ” Dim Suan Cing a ni tawh hongton ei, an napia vo,” acih ciangin kanu leh kasanggam numeite hong kapngeingai uh hi. Ankuang lui a, akei ding nihleh thum koih sak hi. Zu khawng suah uh hi. Nitak khuamui ciangin, ” Ciah ding uh hi, piaknop a om hiam” acih ciangin, tuibuk piatawh, zatepzialsa a piatawh, zuha apiatawh, tanghophel pia tawh buai mahmah uh hi. Kanu bang lungkim peuhmah hi.

Vankah cih kammal pen vantungpai, vantung ah vahawh cihna hin ka-um hi. Dawilawmnei pen dawite tawh kikhawl cihna ahi hi. Innbuuk leh Thuamvum Mo kipi uh a, moken in sakhikaang khat pia uh hi. Lampi ah mikhat in naman a, ngahlo hi. Tua ciangin lungkimlo-in kisim uh hi, ci-in gen hi. Tua kumpen meiteigun nidang banglo-in khanggawp aa, suangtum golpipi taai hi. Innbuk mualdung aa singpilian khempeuh kiphukpai zihziah hi. Huihpi nasialua ahihmanin singtehte khut sungaa nuaizan bang hi.

Innbukdawi pen amitthuk anaksau, amulsah a gol thei mahmah hi, cise hi. India kalanam hileh kilawm hi. Gundawi pen a meelneu hi. sansehsawh uh hi. ngaihhuai thei mahmah hi. Gunlamveite pen lungleeng thei mahmah hi.

Kaneulai-in khuasungah Dawilawmnei khat om hi. Tua bang aa dawilawmnei omhun pen Puultun ciang hithei hi.” Tua nu, tua pa, kaneeksa uh hi, siding hi,” ci-in genkhol a, zong sitakpi mawk hi. Sihna munkhatah lasa lua kisa-in pasalkhat eukaka hi. Dawilawm neipa khat in, huapa pen ahawm hi. A sungkuateng kaneeksa uh hi, cingiau mawk hi. Tua zawh kha-4 bang nungtalai hi. Thawng Kim kici pasal thahaat mahmah khat om hi.” Lokuan ciah khuamual hong tunlaitak thaang kasiah uleh hong tuk a, dakkhawnginn a temta hongvik leh kalawmte agilzang lawt tawh, akhut kitan tawh kamanzo kei uh hi,” ci hi. Tua pa adot ciangin apianzia khempeuh avekin gen hi.

Dawiten bang ne ahitam. Mihingsa mahtawh kivak ahitam. Mihingte in dawi kihta aa ih biaknading aa mitphial bawl ahitam, tua ten tun bangsemsem ahitam, kithei khinzo lo hi.

Thang Siangh