Alamdang kipaak huai leh lungdam huai thu – ZTK

Khatvei zingsang khat,
India khuapi New Delhi khuasung aa Reserve Bank of India zumpi aa ong tungthak (transfer) ahi Manager pa’n a office pan adaak suk leh, ground floor ah puteek khat in ama’ tha tawh kituaklo ippi hon khat mawtaw tung a guan niloh mukha citciathi. Hoihtak a etphatphat leh ama’ zum aa darawan pa na hi aa, file lui kum 30 val teng ippi ah guang, khui khawm in mundang aa kipuak khia ding a guanguang ahihi.

Puteekpa akum tamkhin ahihman in atha in dom lianlian zonawnlo in inn sung pan mawtaw kiang lampi dong taal kaih phot aa, mawtaw tung a guantoh ciang zong lawnto zolo, hamsa pitak damdam in khin, puakpaih zo bek ahihman in, lailui ippi khat mawtaw tung atunsak nading tamveipi tawlngak loh phamawh hi. A kawng in zo nawnlo ahihman in tawlkhat sung bang dingdel in tawlnga zelhi.

Hibang tawh hileh mawtaw dim khat sun thapaai semding cih mu ahihman in amah zong a puanban khep tingteng in inn nuai ah tuaksuk aa, a darawan pa kiang ah, “Nang alang ah na pang inla, ke’n alang ah ong pang ning in dom mengmeng lehang tawm vei sungin zo pah ding hihang” ci-in dom pih ding in akithawi leh a darawan pa in, “Sir, hih pen nang sep ding hilohi, kei man sun thapaai damdam in kasem lel dinghi” ci-in phalpak lohi.

Tua cikawmkawm in a Manager/a pu in ipkhat man khin ahihman in ama’n zong alang ah man pah in, abanban in mawtaw(truck) tung lawn mengmeng uh aa tawm vei sung in man pah uhhi. Akhat lah teek khin, akhat lah naham sem ngei hisamlo ahihman in khua ulsa aziat avei ah kaiikeei hihtuak samhi.

Azawh khit uhteh, darawan pa in, “Sir, nang Christian na hihiam?” ci-in dong aa Manager pa in, “Himah in, bang hang in maw?” cikikhi.

Putekpa in, “Hih Bank ah kasep zawh kum 30 bang hita aa, hih nasep pen nisim aa kasep ahihi. Tu in pension a paai ding ka hitahi. Hih Bank ah nang bang aa Manager gengenloh a khutnuai aa nasem dang tampi a omhang tu aa bang aa ka nasep ong huh zong cingam keng ong phawkkha khatzong om nailohi, tua hang in mi lamdang Christian hiding ong cithei kahihi” ci-in dawngkik hi.

Hihthu piangteng tawm vei sung in India gamsung aa Reserve Bank of India bup ah kizel pah ahihman in, amunmun pan pahtaakna, etteh taak ahihna, zahtakna sikhau (telegraph) lut pah ziahziah hi.

Reserve Bank of India makaite mahmah in, agam sung vuah angtang tak in tangko khia uh aa, “I Makaipi Gandhi in Reserve Bank of India ah na sem hi” ciliang uhhi. Mitampi muanna ngahtuam uhhi. Min nei tuam uhhi. Sum khol bek zong nikhan pah hihtuakhi.

Hih Managerpa pen midang hihetlo in Pu Thang Za Muan Hauzel akicipa ahihi. Citak, kuhkal, thuman, lungsim nem, asepna tungtawn in Zeisu Khekhap asuaksak kawikawi, Reserve Bank of India bup ah Zeisu Khuavaak atangsak, akimusak pa ahihi.

I minam sung ah hibang i neih i angtang aa, i kipaakpih hi. I minam atawisang taktak ahihi. Zahtakna zong i piahi.

I laigelh hiciang tawh tawp nailohi.
Pu Thang Za Muan Hauzel, tukum April 23-26 sung aa ihbawl ding Zosuan Tuailai Khawmpi (ZTK) anih veina – Tedim ah Thugenpi ding, zin mang ding khat in ong kihel zoding ahihman in, ong gending thu zong cinai keini, a mi mahmah amuh in i munuam khinzohi.

Adiakdiak kikhel lam a manawh, namdangte zulhtatna in ong vuhcip, tuhun Kawlgam tuailai Khangnote’n i ciinding, i kep ding, i zuih ding, i sinding thu tampi ong keng ding aa i tuailai khangno bup a hampha ding ihihi.

Amahbek hilo Rev. Dr. JM Paupute nupa tawh zong ong kithuah ding uh hilaihi.
Anihveina Zosuan Tuailai Khawmpi ong lawhcing semsem sak uh aa i minam bup hamphatna ahihi.
Tu aa kipan hih ZTK tawh kisai Makaite’n ahunhun in, akisam bang ong zasak ding uhhi.

Hang Khan Lian
Block 646#13-115
Jalan Tenaga
Singapore 410646