Aki suan’… makai hoih ~ Thawn Tuang

Aki suan’… makai hoih ~ Thawn Tuang

Picing ihsak ih muangte makai dingin mipi ten kiteel in ih “suan “, hi. Tuihual huihpi in a nawk kha zongin kip inteh ihcih te bek Gun gei Lui gei ah Singkung ki ” suan’ “, hi. Hih suan’ leh suan cih aw suah ki banglo in, a deihna zong ki banglo hi mahleh etkak dingin hoih kasa mahmah hi.

Makai ki teello in amah mah a ki pia tawm a ki suan tawm ki pawlna thak hong pan khiate bang tawh ki bang hiam cihleh, Gun gei, lui gui ah a po tawm singkung te tawh ki bang hi. Tuate ahihleh guahtui hong tamin huihpi hong nung leh puk pah dengdang thei hi. A pukpah kei zongin a kiim apaam nawng kaisak mahmah thei hi. A khuampi ciak nuai thei hi. A kiim apaam te tungah ki nga in a gei a singkungte gim pia thei hi.

Ki pawlna khat peuhpeuh ah makai ki teel ngiat aa, mipi in makai dingin ih muante bek mipi in ki suan hi. Bang tawh ki bang leuleu hiam cihleh, Gun gei Lui gei ah a kikip ding, huihpi guahpi in a nawk kha zongin kip veve inteh cih ih muan ih suante bek ki suan’ hi. Huihpi guahpi a nangzo a kip a kho ding Singkung pen ki teel in ki suan’ hi. Tuak khial liang ihih keileh puk dengdang cih om khollo zaw hi. Tuak khial ih cihte a Singkung sung tawng ki mu paisuk theilo in a sung tawng na gil keileh ki tuak khial thei hi. Ahi zongin lungkim mah in mipi ten ih teel pen lungkim huai penpen hi.

A ki suan’ Singkung pen agah hunin gah aa, a teh vul ngeilo hi. A ki teel makai khat in a sep khiatna leh a hun atunteh a gah mu hamtang hi. A po tawm Singkung ahihleh gah hun cing mahmah na pi gah theilo, gah mahta leh a gah asung taklo ( hut) thei lai sawnsawn hi.

A ki suan’ Singkung nam om ahih mah bangin, Makai nam ding Galkap lam ah, Minam vai ah, Pawlpi vai ah, Khua sung vai ah a munmun in om dingin ka um hi. Bang hang hiam cihleh Papi ten, “Khuasat ngeilo khat in khua na satnuamse dah un”, na ci hi. Ih pan mun ding pen ei leh ei ki piak sangin mipi lampan amau muhna tawh hong piak pen agah hunin a gah, a teh a vul ngeilo Gun gei a ki suan’ Singkung tawh ki bang ding hi.

Gen siatna, zahpihna…cihte a puazolo a thukkik nuam themthum dente pen Gun gei, Lui gei ah suan’ dingin a ki teel khalo amah leh mah a po tawm Singkung tawh ki bang hi. A lauh huai mahmah khat ah Singkung a ki suan’ lo a po tawmte puk baih a hih manin akiim a gei aten om muan galtuak gige theihi.

Ih gei ah a ki suan’ Singkungpi a om kha hiam, a po tawm Singkungpi aom kha hiam cih velcian huai mahmah hi. Zomite ki hak kilkel ta ahih man ih ngei aa, Singkungpi tangthu ih thei ding thupi mahmah aa, zuihtuak paihtuak te khinkhai siam mahmahta hang.

Makai om na pi mipi(member) neilo ki pawlna peuh Zomi sungah om zanzan hi. Hihte pawlpen phiat siang leng hoih in mu ing. Mipi a pawlpih( member) a tawm penpen 500 aneih kei uhleh minambup thawntuangadingin muan taklo ding hi. Lasa thei peuh mah Lasiam ci-in sam pahpah dahni. Ki pawl nengno khat ah makai asem khat minam makai ci pahpahse dah ni.

Thubullet: Jeremiah 17:8 Amah, gun gei-a a kisuan singkung bang hi a, lui gei-ah a zung a kha hi. A tehte hing den ahih manin nisa kihta lo hi. Tatsat loin gah den ahih manin guah zuk loh kum ciangin zong lungkham tuan lo hi. Late 1:3 Amah pen lui tuiluang gei-a a kisuan ama gah hunin gah a, a teh a vul ngei lo singkung tawh kibang hi. Ama hihna khempeuhah a maa pai mahmah hi. Thawn Tuang