Aki manawh Diamond Jubilee: Tedim sanginnpi

Aki manawh Diamond Jubilee: Tedim sanginnpi

Sakollam veng, Tedim khua sunga om Tedim Sangpi pen 1948 kum panin pilsinna mun dingin kumpi in hong vaihawm sak ahihi.

1998 kum in sangpi pian zawh kum 50 cinna Golden Jubilee kibawl hi. Golden Jubilee laibu kibawl in, tuni dongin khangthakte a dingin go le gamh suak hi. Golden Jubilee phawkna dingin Inn khat lam dingin kigel a, committee kiseh hi. A hih zongin Kawlgam khuahun luanzia hangin deih bangin kisem theilo in, ki mangngilh bawl suak phot hi. Tua pawi sungah Kawlgam mun tuamtuam a om Zomi sungsuak Siapi, Vuandok, Mangpi sem ulian khempeuh kisam in Jubilee pawipi kibawl a, pawisim khempeuh sunan sialsa tangcim tawh lengla kido hi.

2018 kum pen sangpi pian zawh kum 70 cin Platinum Jubilee hun hi ta hi. Tedim khuapi sunga om sangnaupang lui khempeuh in hih Jubilee Pawipi pen bawl huai in, thalak huai mahmah hi. Tua banah tavuan nei lai sang sia/mah khempeuh in hih pawi hunte a nop ci thei penin, sangnaupang maikaite tawh hong bawl zawhna ding uh lunggulh huai mahmah hi.

2023 kum ciangin sangpi pian zawh kum 75 cin Diamond Jubilee hun ahi hi. Hih hun ding pen kum 5 bek om lai hi.
Mihing bang hi leh pitek putek hun hita a, tu le tate vak hun a hi hi. Niten puansilh a hoih pen tawh zep a, ih pahtawi hun ahi hi. Hih sangpi panin mipil, mi siam, mi hau, mi khuasuak tampi ih om khin hi. Ih sangkahna mun puah kik zun kik hun ahih lam phawk tek ding hihang.

Hih Diamond Jubilee hun ah leitung mun tuamtuam om khangthakte in nakpi takin ih pahtawi ding le ih sangpi mahmah ih puah zawhna dingin thupi hi.

Hih pawipi a ding nakpi takin kiging hun a nei lai ih lam phawk huai mahmah hi. Ih puah ih zunding sang huang sung mun tampi om hi.

• Sang siapipa omna mun a kilawm ciang khat in puah sak zo leng.
• Sang huang sungah cycle parking khat bawl sak thei leng.
• Sang huang sungah dinner hall khat lam sak zo leng.
• Sang huang sung a om Library room, Laboratory room cih te hoih tak khuahun zui in a ki sam van le nate behlap sak zo leng.
• Sang huang nawl khempeuh hoih tak in taih tawh um sak zo leng.

Diamond Jubilee bawl zawhna dingin Committee tuamtuam kiseh huai mahmah hi.

• 1) Standing Committee
• 2) Fund Committee
• 3) Publication Committee
• 4) Building Committee
• 5) Information and Communication Committee
• 6) Program Committee

Hih vai ah kua in tavuan pua leh, hoih pen ding hiam? Kuate tawh vaihawmna khuasuak pen ding hiam? Tedim Times