AirAsia vanleng sungah nasemkhat vandawn ah alenlaitak vanleng sungah si

AirAsia vanleng sungah nasemkhat vandawn ah alenlaitak vanleng sungah si

AirAsia te vanlengkhat Malaysia, Kuala Lumpur panin Indonesia, Bandung City zuanin alenlaitak vanleng sungah nasemkhat si cih NST pan kiza hi. Zanni Wednesday ni in thupiang hi a, tua AirAsia vanleng pen Flight AK416 ahihi.

Kuala Lumpur panin alenkhiat khitzawh, vandawn ah alenlen laitak in vanleng sungah nasem “Cabin Crew” khat asihmawk ahih manin, Indonesia gamsung lengsuak saknawnlo uh a, Johor aom Senai International Airport ah tusakphot uhhi.

AirAsia Bhd te’nzong hihvaitawh kisai in Media Statement khahkhia uh a, Flight AK416 pen Kuala Lumpur panin Bandung City (Indonesia) zuanin alengkhia himahleh Medical Emergency hangin Senai Airport ah kitusak phot hi ci’n genkhia uhhi.

Tua AirAsia vanleng sungah nasempa pen Senai Airport atukphet in zatui kibawlpah, Medical Treatment kibawlpah himahleh sikhinta hi ci’n vanlengtual ah Doctor khatin genkhia hi.

AirAsia paninzong hih anasemkhat asupna, asihna hangin kadah mahmah uh a, a innkuanpih tetawh kibangin kadahkhawm uhhi. Sihvui hunbawlna Funeral Ceremony ah akisam bangbang in ka vaihawm pihding uhhi ci’n thunei te’n genkhia uhhi.

Tua AirAsia Flight AK416 pen Johor, Senai Airport panin 9am hunpawl in lengkhiakik thei a, Indonesia, Husein Sastranegara International Airport ah 10:11am in tungtheipan hi.

Kulai district police chief Superintendent Dzulkhairi Mukhtar ii genkhiatna ah hihvaitawh kisai in AirAsia te’n Police Report hongbawl uh cihi. Vanleng sungah asi Cabin Crew nasempa pen Indonesia gammi pasalkhat hi a, kum 46 aphakhin khat ahihi.

More: AirAsia Company aneipa ngiatin vanleng sungah nasem te huhin ninkhawm buambuam

Asihna ahangpen zato panin hoihtak aki kancian laitak hi a, hih thuthang aki gelhkhiat laitak in bangmah kitheician nailo cihi. Tulaitak tua Cabin Crew pa ii sihna pen asivat “Sudden Death” ci’n ki ciamtehphot hi. Sawltak #zomidaily