Afghanistan gamvai pan sinding ~ Bob Tuangpi

Afghanistan gamvai pan sinding ~ Bob Tuangpi

Ki-ukna khat siksan gamkhat kumpi akip nading gamdang gamlian tuamtuamte ( Gtna : USA, EU) huhna, pattahsa bek tawh kipzo paisuak hetlo hi, cih kilang hi.

Gamkhat kumpi in atawntung apualam gamdang mite huhna, puahna, zuunna leh sumtha muanna bek tawh kumsawt ahinloh mah bangin, gamdang sumlom tawdap leitung kipawlna tuamtuamte’ hauhna sumtha ( Gtna : UN, USAID, INGOs, NGOs, WB) bek kimuanpih-in athupi tatak agamsung teeng mipi taangpi taangta mihing tha leh sumthalo, gamdang apualam tha bek tawh atawntung gamkhat uk kumpi khat sawt kimang hetlo ahihna tutung Afghanistan gamvai buaina tungtawn pilna tampi kisin thei hi.

USA makaihna tawh 2001 kumpi gamdang gamliante in tuma kum-20 lai Afghanistan gam ah galvai tawh lut uh a, tuni ciang dong kum-20 bang hun asawt teh gamsung ah athahat US leh apawlte in abeisak sawm Taliban singnuai mite in gambup ukna teng buluah kikzo mawk uhhi.

Bang hang US leh apawlte in apanpih atawsawn Afghanistan kumpi leh galkapte in lel mawk hiam cih ih ngaihsut tak ciang’n abeisa nungdiak ciang kumpi asemte in gamsung aniampen pan asang pen mipi adawldawlte’ lungsim leh nisim nuntakna dong ah itna leh deihsakna, mipi nisim nuntak khuasakzia laptoh nading leh mipi itna tatak ngah ding cih sangin, amau anung vuah sumtha leh mihing tha tawh apanpih gamdang gamliante’lungkim sak nading, maipha ngah nading ciang leh ukna kip nading ciang bek tawh thu na vaihawm uh himawk hi.

Tua ban ah Afghanistan gamsung om, mun leh mual kibanglo gamsung ah thunei mipi nei gamsung singnuai galmang vaisai thuneite ( War lords/Oligarch) tawh kilemna, kitelsiamna bawl sawmlo/bawlzolo ban ah gambup ah ukna kizelhna ( Rule of law) pungkhiasak zolo uh ahihna hang ahihi.

Taliban makaite in tua bang kumpi thanemna teng zatsiam-in amunmun ah om gamsung thunei makai teng leh mun leh mual teng zolzo, luahzo uh ahih manin tu-in US leh nitumnate’ khalimnuai ah akhangkhia kum-20 apha Afghanistan kumpi gamsung tawdap Taliban singnuai mite in hemkhiazo giap-in kumpi innpi leh gambup ukna buluah ta uhhi.

Gamkhat in Democracy lampi tung tawn-in lampi diktak ah ataisuak theih nading pen hamsa mahmah hi. Leitung galpi nihna ven zawh nitumna gamliante makaih tawtawnna mah tawh East Europe gamte, Latin America gamte, Africa gamsung gam tampite leh Asia gamsung gam tampi tak mihing khat thuneihna ( Dictatorship) pan mipi deihna tawh gam ki-ukna ( Democracy) ah kalsuan ding hong kipan napi’n gam atamzaw phial mah nungtolhkik-in akhawkzaw/siazaw ki-ukna ah atungkik tampi mah om hi.

Tuate zongh ih etkik ciangin, gamsung makai mimal khat, party khat leh mi atawmzaw honkhat in thuneihna angah nang anung pan dinmun kibanglo leitung gamliante’ ( Global powers) khutma tampi kimu thei veve hi.

Tua hi a, gamsung dinmun kibanglo gamsung makaite in mailam gam leh mipite’ ading akhual mahmah kei ngel vua hibang dan leitung tangthu ah piangpiang khin-in hong piangto kikkik lai ding hi.

Afghanistan bang dan lian ahihloh hang Democracy leh Federal gam ukna tawh kalsuanthak ding geelna abeisa kum-10 sung Kawlgam ah zongh kihanciam ngei-in tutak ahih leh koilam kalsuan ding cihtheihna omlo, lamka bom ah akidinkhawl cip laitak ahihi.

Gamkhat gamvai lampi man leh khawllo maban anawksuak theihna ding ( Democratization process) ah gamsung minamkee tuamtuam makaite leh gamsung amunmun ah om mipi anei leh kipawlna lianpipite ah vaisainanei ( Key Institutions) cihte kihosiamna, kizahtak tuakna leh sepkhopna a om keh hibang dan gamvai dongtuah buaina ( Political deadlock) gamthu ah omthei tawntung ahihi.

Hih bang Afghanistan gambuaina leh Kawlgam sung buainate ih etkak tak ciangin gamvai ah apiangtheilo thu, omlo hi cih mitmuh theih thu ahihna kilang hi. Ahizongin hih gamnih tegel ahih leh cina damkaang lingliang anne ding a kithawi liamliam khat gimkik-in akin dinmun ( Emergency room) atungkik tawh kibang hi.

Afghanistan kum-20 sung lamkik nading US dollar a Trillion sim bang bei a, Kawlgam zongh Democracy lampi tung ataikik nading gamdang gamliante’ panpih tawsawnna ( WB,JICA, UN, ADB, EU) sumtha, mihing tha tampitak beilawh kisuplawh khin hinapi’n mipi nau taang gammi taangpi taangta te’ nisim nuntak khuasakna leh suahtakna ( Social life/freedom) ahih leh tuma abeisa dinmun ah sunkhat zankhat thu mitphiatkal kileh tunkik ziau hi.

Bangbang ahizong gamkhat akhangtosak ding gam makai gina leh makaih siamna tatak ih cih bel sum leh paii tawh, ” hawh vou ci a pum leitheih kipiaktheih mawk ahih lohna”, tutung Afghanistan leh Kawl gamthu te in hong phawksak kik pha mahmah uhhi.

More: Innteek Hihna ~ Bob Tuangpi

Tua ahih manin, Afghanistan gam leh mipi mailam ding amau leh amau in zingvai hawm uh henla, Kawlgam sung mailam zingvai ding gamsung om minam tuamtuam makaite le gammite in zingvai ahawm mah bangin, gamsung om minamkee tuamtuamte’ minam leh gamthu zingvai amaute in vaihawmna kician a om masiah kilemna/daihna, bitna, avuicing khantohna leh suahtakna tatak omngeilo ding hi, cih kilangh mahmah hi. Bob Tuangpi (017082021)