Adam Kum 930 – Nang le Kei Kum 70/80 bang bek

Adam Kum 930 – Nang le Kei Kum 70/80 bang bek

Nuntak sau pen Methuselah kum 969 hi in, Noah Tembaw kum 120 sung hun la-in kibawl a, Mihing khang khat kum 70/80 ah kiciangtan hi.

Sihna
Sih ding pen a ngeina hi lo hi. A ngeina hilo ahih manin sih kingeina seh cih bang om thei lo hi. A kipatcil in Pasian in Adam pen a si thei dingin a bawl hi lo hi. Sihna pen mawhna hangin ahong piang ahi hi. Leivui ah hong kibawl, lei ah ciah kik ding a cih ciangin, mawhna hangin Pasian in a hehna lei den nading a cihna hi zaw in, leivui ah a ciahkik ding him himin ahong pian sak hi lo hi. Death is not natural. Death is not a biological event. Death is by way of sin. Pawlkhat in Pasian’ ong piak “nuntakna hu” (Gen. 2:7) pen lei pumpi tawh a nungta suak thei lo limlim ding ahi hi, ci uh hi. Hong kipian sak lai-in a si thei dingin Pasian in ong bawl mah na hi a, leitung nuntak pen tom kaal sung bek mah ding hi, ci uh hi.

A ngei bang lo ngeina, “Mawhna”
Ahi zongin Lai Siangtho sungah sihna pen hong kipiangsakte ih hihna tungah a kinga na hi zenzen loin, piansak mite in mawhna na bawl uh ahih manin sihna ahong piang na hi zaw hi. The wages of sin is death (Rom. 6: 23). Si dinga hong kipiang sak hi lo a, nungta dinga hong kipiang sak hi zaw hi. Ahi zongin a nungta kim lai kisi thei ta hi. Kuama’ ong bawl hi kei. Ei le ei’ kibawl hi. Thei gige, hak gige, kitel sitset mah in a si ding ih hi ta hi. A taktakin cilehang sih ding pen a ngeina hi masa lo hi. Ahi zongin a ngei bang nawn lo ngeina khat hong tunga tua pen mawhna thamanh sihna ahi hi. (The seriousness of sin)

A si thei lo ding kisa
Pasian in Adam’ sungah a muap tua “HU” sungah nuntak suak theihna kihel lo na hi lo zawin, tua nuntakna pen mihing in mawhna tawh nin sak ahih manin tua leipumpi a si thei hong suak ahi zaw hi. A kipatcil in Pasian in mihing pen a si kik hamtang dingin ong bawl ahih lohna pen Adam’ khanggui sim lehang kingaihsun thei pah hi (Piancilna 5:1-32). Adam le a suan le a khakte a nungta suak dingin Pasian in ahong piansak ahihna vaang tawh Adam kum 930, Methuselah kum 969, Noah kum 950 cih bangin nungta uh a, a si thei lo ding hong bang liang lai uh hi. Pasian in mihing pen a si dingin ong bawl ahih lohna pen Piancil hun lai-in kum tampipi a na nuntakna uh thuphate ah a liim (the shadow of life) kimu thei lai hi. A kipatcil in a si thei lo dingin ong piansak ih hih manin tua vaang hangin tu ni dong mah in a cidamte a si thei lo ding kisa uh hi.

Nuntak kum kiam
Ahi zongin mawhna gu hangin damdamin nuntak kum hong kiamkiam hi. Lamech kum 777 ah ong kiam sukin, Noah’ suan le khakte bang kum 430, 200, 70 cih bangin nuntak kum hong kilamdang suk hiaihiai a, tuhun ciangin kum 80 bang a nungta zote khansau kisa mahmah hi. Mawhna gu ahi, gitlohna, tuahsiatna, natna le satna hangin kum 70 pha zo loin a kisisi takpi hi ta hi. Nuntak kum 900 lam pan kum 70 lam ah kia suk cih pen mawhna hang ahihna kilang mahmah pah hi.

Ih khangno lai-in kum 70 tam kisa mahmah a, hong tung thei lo ding kisa hi. Tu in, Late lai-at pa in nuntak hun a tom mahmahna thu hih bangin na gen hi. Topa aw, “…ka nuntakna hun uh a tomlam ka theih nadingun hong hilh in,” na ci hi (Late 90: 12). “…Kote’ nuntak sung kum 70 bang hi a, cidam le-ung kum 80 bang hi,” na ci bek mawk hi (Late 90: 10). Tuhun ciangin kum khat zong pha nai lo, nu’ gil sung pan zong suak khia nai lo in, kisi hi. Mawhna khang semsem a, naugil sung nangawn ah kithahna piang ziahziah hi. Khan kitom thei mahmah ta hi. Tua thute ih lungngaih ciangin Topa Jesuh Khrih ong Tatkhiat Lungdamna Thu ih kisap lam hong phawk sak ahi hi. Sihna pan Nuntak kikna na kisam hiam? Kum 70/80 hingtang sihna pan Tawntung Thawhkikna na kisam hi.

Tua hi a, kum 1000 nangawn a bei ciangin bangmah lo ahi hi. Christian te adingin a beisa kum 1000 sangin a nungta lai ni khat thupi (positive) zaw hi. Mawhna hanga sihna in hun sawt pen zong bangmah lo suak sak veve hi. Ahi zongin sihna a om nawn lohna nuntak tawntungna ah ni khat le kum tul khat a kibang ahi hi.

Kum 70/80 in bang gen? (Psalm 90:10).
Mawhna hangin mihing khang kum 70/80 ah ahong kiciangtanna thu hong gen ahi hi. Khang nih nung ta thei lehang zong 140/160 hi bek ding hi. Khang nih nungta na om uh hiam? Khang khat ciat bek kinungta hi. Tua ahih manin khang khat bek thu a khualte in khang tawntung tak thuak dinga, khang tawntung ading thu a khualte’ sungah khang khat nuntak nop mahmah ding hi.

Kum 120 in bang gen? (Gen 6:3)
Hih kum 120 pen mihing nuntak kum phazah ding hi, a ci pawl le Naoh tembaw bawl kum sawt zah a genna hi, ci-in sanzia kibang lo nih om hi. Mihing’ nuntak kum phazah a genna hi leh Late 90: 10na tawh a thu kitukalh hi. Tua banah hih ciangtan kum 120 pen Noah tuicin khit cianga mihingte’ nuntak kum phazah tawh zong kituak lo hi (Piancilna 11:10-32). Tua hi a, hih kum 120 pen Noah tembaw bawl kum phazah hi zaw ding hi cihna ah Lai Siangtho khiatzia (interpretation) kitukalh lo pen hi. Lai Siangtho ih khiatzia a kitukalh leh Lai Siangtho luanzia a tel thei lo mihing’ lungsim kitukalh honkhat om hi ding cihna hi zaw hi.

Pasian in Leitung tuicin tawh a sawp siangma kum 120 hun lai in Naoh tembaw bawl kipan sak hi. Pasian in hih 120 hun sungin leitung mite kisikkik leh cih a lunggulhna hangin a hehpihna kong kum 120 sung hong hi. Tua hun sungin Noah tembaw bawlna tawh tuicin tungsak ding ahihna lak khin hi. Tua kawmkal ah Noah te pata tengin tembaw lian mahmah khat bawl nadingin hun tam sim a lak zek uh zong a kul ding mah na hi veve hi.suangdal

“Noah in teembaw a bawl hun laitakin Pasian in lungduai takin ngak hi napi-in hih kha a nei mite pawlkhat in Pasian’ thu mang lo uh hi.Teembaw sungah a om mi giat bek, tui in a suakta sak hi.” (1 Pet. 3: 20). Hih lai munah lungduai takin cihteh “kum 120” thu tawh kimemat ding hi, ci-in kimu thei hi. Tua hun lai-in Noah tembaw bawl hun kum 120 tawh tuicin tun ding warning pia in, mihingte kisik nading hun pia cihna hi zaw hi. Tua hun sungin Noah in zong a teembaw bawl zo hi.

Noah in kum 120 teembaw bawl a, Pasian in tua hun sung khempeuh leitung mite a mawhna uh pan kisikkik ding lungduai tak in ngak ahihna Lai Siangtho kimematzia tawh kimu thei hi. Hih leitungah sihna ii gu hangin kum 70/80 bang bek ih nuntakna pen eimau’ mawhna hang hi a, ahi zongin ih Topa Jesuh tawh ih kipawl manin Pasian’ hong piakkhong pen nuntak tawntungna ahi hi” – (Rom. 6: 23).

Evan. Suang Dal