A zungkha thei zongsakna hoih lote ~ Khat Thang

A zungkha thei zongsakna hoih lote ~ Khat Thang

Khat vei, Naupangte kikepna aminthang SangInn khatah naupang numeino khat lai khak khat tawi-in Siapipa kiangah hong pai hi. Alai sungah, “Siapipa aw, ka tanu in ahoih lo zongsatna pawl khat nei hi. Ka tanu mahmah in ahoih loh lam thei gigu-in kikhel zo lo mawk hi. Bangmah kigen thei lo ahih manin hong huh in Sia aw” cih lai khak ahi hi.

Siapa in zong lai asim khitteh balkek in paii hi. Kum 12 khawng apha ding tua numei nonu samin Inn nung paak-huan sungah paipih hi. Siapa in amasa penin lopa kung khat kawkin numei nonu bot sak hi. Naupang nonu zong bangmah gen het lo-in akhutme nih tawh manin zung bot ziau hi.

Tua khitteh paak kungno khat kawk leuleu in bot sak aa, numei nonu in zong akhut lang khat tawh manin hong bot ziau hi.

Siapa in amai lamah tawm vei paipihin, sawl bawk khat bot dingin sawl leuleu hi. Numei nonu zong sawlbawk akhut nih tawh manin atha neih zatin hong dok hi, thum vei phet mah deihtak thasanin hong hanciam leh bot zo petpet sam hi.

Siapa in paak-huan kiu khatah singkungpi khat kiang paipih leuleuin “hih singkung bot dih ou tun?” ci-in sawl hi. Numeino in zong alu pei kawmin, “Sia aw, hi thei peuhmah lo ding hi, bot zo kei ning” ci hi.

Siapa in “Ium! Ngeina hoih lo, zongsatna hoih lo kicite zong tua bang mah hi, asuk luatma, aneu lai-in kibot khia zo, kipuahpha zo bek hi. Tua mah bangin, na gamtat hoih lo zongsakna, na ngeina hoih lo lungsim puakte na theih phetin na bot khiat pahpah ding kisam hi. Tua hikei leh, singkungpi agolsa na bot zawh nawn loh mah bangin na nuntakna khel zo lo ding hi teh” ci-in thu gen pih hi.

Naupangnu zong lungsim sungah thumaan thutak hong mankhia thei in, a Nu kiangah hong ciah vingveng hi. Nipi kal nih sung khawng khitteh, Siapa kiangah laikhak khat hong tungin, laikhak sungah naupang khutlam tawh kigelh laigual khat ki-at hi. “Siapipa aw ken lopa kungno azung panin bot khia zo khin ta ing” cih ahi hi. Siapa in kua laikhak hiding cih thei ahih manin lungdamna tawh nuih mai hiuhiau-in hong om hi.

Tu ni Zomite dinmun kei akipan, I nuntakna sungah ngeina hoih lo, zongsatna hoih lo, lungsim puak hoih lo honpi khat kiom mawk hi. Neulai-a kibot khia kha lo zongsakna hoih lote tawh kidim I hih manin, minam sung puahhak zuanhak lua peuhmah dinmun I hizen hi. Ei-te tha tawh I khel zawh loh hoih lohnate Pasian tung ap-in athahat Pasian in hong zunglot khiat sak ding bek mah I ngak kul ta hi. Naupangnu bot zawh loh singkungpi abot zo ding pen set (engine) zaitha om lai sam ding hi. Ei le ei kipuah zawh loh, kilaih zawh loh hong puah hong zuunkik ding Pasian tha bek mah I muang hi.

I minam khangnote sungah tua bang zongsakna ginalote Upate in I vawh khak loh ding, I ta I naute sungah tua bang aom khak leh I theih phet mahin I khel sak zawh ding hanciam leng asawt het lo khang khat sung bangin I minam kipuah, kizuankik zong dingin umna le lametna ka nei hi.

A nungta Pasian in I minam, I khualetui, Innkuan sung le mimal khat ciat athakin ama hoihnate tawh hong puahphat ding I lunggulh hi. A kikheng zo ding zongsakna omte khel zawh sawm in, eite tha-a khel zawh loh ding zongsatna hoih lote Pasian ap-in, kipuah phat zawh dingin Pasian in thupha hong pia ciat ta hen. Amen. Khat Thang