A thupi mahmah mi suahtheih danding

A thupi mahmah mi suahtheih danding

Mithupi cihpen neihtheih ziau cihbang hi lo in thalawh kul ahihi. Tua ahih man in zahtaak bang tak leh mithupi tak aa ih om theih na ding in ento simto ding hihang.

1. Ei leh ei thupi in zahtaak bang kisa ngiat ding

Ei leh ei mithupi khat in ih kingaihsut kei leh mi in hong thupi ngaihsut hetlo ding cihpen telsa hi. Nakhat peuhpeuh pen ei pan kipat kul denhi. Koici bang in ei leh ei kithupit ngaihsut ding ih hihiam cihleh, ei leh ei kizahpih lo ding, kineuseek in ki koihniam ding hi lo hi. Kiphasak pahding cihna hi lo in, kuamah in hong thupisim keita leh ei leh ei kithupi sim ngiat ding hihang. Mihong muhdan pen ei leh ei kimuhdan banghipian pah hi ci-in maan mahmah hi. Tua ahih man in ei leh ei kineuseek in kikoih niam denlo in, athupi in kingaihsut dingkisam hi. Ei leh ei kizahtaak ding kisam hi. Ih pumpi pen Pasian biakinn himawk ahih ciang aa athupi in koihphotphot ding hihang.

2. Midang zahtaak siam ding

Ih piakkhiat bangbang kingahkik hi kici hi. Laisiangtho in zong ih vawhbang tek at kikding ci-in hong hilh hi. Midang ih zahtaak siam leh mi-in zong hong zahtaak kik ding uhhi. Mihing te pen adinmun tawh hilo in amihing hihna tawh zahtaak siam ding kisam hi. Ei sangin azalian zaw, athupizaw in ih tuatte kizahtaak in, zahtaak kineih zong ih hiphial zong in, ahih hang in ei sang aa zaneu zaw, bangmah hongcihthei kik lo ding cihte tung ah ihlungsim puakpen ih lungsim puak dan taktak na hi zaw hi.

Mikhat na thupitsak aa nazahtaak bawl leh hong muten zong hong thupit bawl in hongzahtaak pahding uhhi. Tua ahih man in akuamapeuh tung ah, aneu alian, azawng ahau deidan tuamnei lo in ihthupit bawlsiam aa, ih zahtaak bawlsiam na hangin ih zahtaak bawl te ihthupit bawlte pen, mithupi honghipah, mizahtaak huai honghipah cihna hi lo in, ei azahtaak huaizaw leh athupi zaw ih suak hi. Mikhangto ten midang zahtaak dansiam uhhi.

3. Khamtheih guihtheih

Mihing hong tualniam sak leh hong neukoih suk pen khamtheih ahihi. Bangbang khamtheih hitaleh athupi om lo hi. Zu dawn leh akham kibang lo aa, mikhangto te pen a dawn uhhang in kham nengnang ngeise lo uhhi. Ei ih hihleh kham ningneng mah nuam kisa hi. Tuahang in ih zi leh ih tate leh ih lawm ihgual leh hong thupitmuh ding ih uttekiang ah kham ningnengloh mah ahoih pen ahihi. Zudawn ih hihleh azahla thei hongmaizumsak thei lo ding in azatdan om a, zu dawnkhitciang in lupziau cihdan, apua lam ah khamnengnang lo a om ding kisam hi. Kham nengnang lo aa om na in, ih thupit na kepna ding in hoihpen hi. Kham theih guihtheih zat vetloh na in mi hongthupisak hi.

4. Ih kilatkhiat dan

Hih pen athupi pen khat hi a, laibu pen abu hawng(cover) tawh tehken cih paunak om a, ahih hang in mi khat peuhpeuh leh na khatpeuhpeuh pen apualam kilatdan tawh kitehden thei hi. Banghang hiam cih leh mihing ih hihman in. Mi ihtelsitset khitsa te ahih leh apualam kilat na tawh kitehkhelkhel lo mai thei ding hi. Ahihhang in khat vei kimuhcil lian in bel apualam ih mel ihsa kilatkhiat na pan kiteh denhihang. Ih kizep dan ih om dan in, ih mizia kilangthei ci uhhi. Mithupi azahtaak huai ih hihnop leh kizep kipuah zong ahoihkhop mah in kizep kul hi.

A kidawk lo dingmun teng kidawk dekdek cihte, sexy lua liangaa kizep cihte in ih thupitna hongniamsak thei aa, puan ahoih luakisam lo in siangtho in nawtmam peuhleng hoihmahmah lel aa, kipuahdan siam kisam hi. Tuaciang amun leh ahunzong ih theihsiam kul hi. A mun leh ahunzui in kizepdan ahoihbek na omtek aa tuapen thupi mahmah hi. Tuaciang ih taksa siangthosak den ding, zakhai gimnamsak vatvat cihte, ha balnianua cihte zahtaak bang theilo kithupit ngaihsut thei lo hi. Tua ahih man in ih kilatkhiat dan ih kiphokhiat dan thupi mahmah hi.

5. Kam tam lo ding

Mi akamtam leh gending ahau khiamahmah te pen zahtaak bangthei lo uh aa adiakdiak in pasal te kamtam nainai cihbang zahtaak bangthei lo hi. Akamtam ngiat mibel omsam hi, ahi zong in migensia keibeek leh hoihpen hi. Kamtam cih zong amun leh ahun theih kul veve hi. Banghun bangmun cih omlo pauzauzau denkeei cihpen zahtaak banglo in kithupi muhthei ngiat lo hi.

6. Ih kamciam bangin tangtungsak ngiat ding

Ih kamciam bang in semtaktak zolo bekhi lo, ei kampau mah a zuizolo tepen kithupi muhthei lo hi. Hih ning ihcihnak leh semtaktak leng, ih septheihloh dingpipi khawng genlohziau ding hilel hi. Hilai munsan tak ah nambat(5)na thu hongthupi mahmah hi. Tuaban ah midang tung ah ih kamciampiak bek hi lo ei leh ei ih thugente zongsemtaktak ngiat in tangtungsak ngiat leng ei leh ei kizahtaak na, ei leh ei thupi ih kisak na hong ompan ding hi. Kikhop hun, committee hun, cih aa kipan ciangtan hun lianlian lapzo den leng zahtaak huai in thupi ngiat in, kai denkeei, ngakkul denkeei cih thapai te pen kithupit ngaihsun thei ngei lo hi.

Thudang tuamtuam tawh ihkamciam ihtangtunsak zawh loh na aom zenzen leh ih siamlohna ih cinzawhloh na pulak aa ih thumsiamding hoih hi. Ahihzong in paulap zonden pen hoihden tuansam lo hi. Politic( Nainganzi) lam nasem te pawlkhat adinmun sangmahmah napi’n mipi in banghang in kizahtaak thei taktak lo hiamcih leh akamciam te tangtungsak ngeilo zel den uh ahih man hi. Tua ahih man in kamciam tangtunsak loh na in, ih thupitna leh ih zahtaak banna hong kiamsak thei hi.

7. Ei leh ei ki ukzawh na

Ei mimal thuakna ( feeling) ahi khasiat na, nuamna, dah na cihte hongtunciang in hiluasuk pahcihdan, ki kemlo( control) cih te pen zahtaak bangthei lo uhhi. A nuamciang lah nuamlua khengval, alungkham ciang lah kiguiawk sawm liang cihbangdan aa ih omloh ding thupi hi. Lawmkingai te zong kingaihlaitak kingai lua man(photo) kazaih in ki post denkeei, abangkim kipia liang, hong kikhen teh vulniangnuang in lungtang natna bang ngahlawh liang ta leuleu cih pen picin vailo lua in naupang vai lua hi. Tuabang dan pen ei leh ei ih ki keploh (control) loh man ahihi. Na khat peuhpeuh thukhat peuhpeuh tung ah damtak leh lungduaitak in khinkhai theiden in hileng ih khensat na tungtawn in mithupi, mizahtaak bang hongsuak sak ding hi.

8. Ih ngaihsut na tung ah ih dinkip ngamding thupi

Micih dandan in akawi amam in ih omloh ding thupi pen hi. Ih ngaihsut dan leh ih deihdan zong ih letkip ding kisam hi. Mi cihkhempeuh langdo dending cihna hisam lo hi. Midang in pai dia, hih dia hongcih ciang in aw le.. ..ci pahpah den aa azol abaihlua te pen mithupi in kingaihsun thei lo hi. Ih ut kei aa ih deihkei aa ih man kei leh lemkei, man keng, ai.. cihngam ngiap theihzel ding zong kisam hi. Ih utloh na mun ah midang kinopnehsak loh ding thupi hi. Khatvei hong thuzawh in hong zawhthawh bawl thei leh akik akik ah hong nopneh pah thei uhhi. Tua bangmah in midang zong ih thupit ngaihsut theihding kisam hi.

9. Pilna, ciim na

Mipil leh miciim te pen kizahtaak limlim phot hi. Ciim na ih cihpen pianpih pilna, pianpih B.A cihdan in kigen ziau hi. Tua bangaa mi ciim dingpen leitung ah vaangmahmah,tawm khia mahmah ding hi. Mi atamzaw pen ih muhna pan, ih zakna pan leh kikep kipattah na pan in apil asiam vive ahihi. Mibang in pil in ciim mahmah takei lengzong mikiang ah mawl mengmang aa ih omloh na ding in kisin thei hi. Zong lecin na mu ding hi cihdan in. Pilna cih pen ki zongthei lua hi. Mipil miciiim te thugen, laigelh, video pan zong ki sin kikan thei a, mi in kumtampi asinsin uh en huntomno sung in kisin thei kikan thei hi. Laitan tam theithei bek pilna ciim na hipahsam lo aa, ei leh ei in apualam pan sinbeh denzo in hi leng mi-in hong neumuh tuansam lo ding uh aa, ih thupit na ih zahtaak huai na te zong kikembit zo ding hi. Topa zahtaak na in pilna kipat na hi cihzong athak in ih theihding kihanthawn hang. Saimon Timothy