A thubek a tawntawn lamlam loding ~ Evan. Suangh Dal

A thubek a tawntawn lamlam loding ~ Evan. Suangh Dal

Mi pawlkhat pen a thu beka a lamlam a tawntawn a diangdiangte hi lel uh hi. Tua banga a thu bek tawh nungta-a, Lai Siangtho thuhilhna tawh a kihualkim zolote pen bangmah hi tuan lo hi. Zomi Christian te’ sungah a thu beka tawntawn lamlam sangin “Thu” nuntakpih ding thupi ta hi. Thu pen la-in kisa thei a, ahi zongin la “or aww” pen thu kisuah thei lo hi. Thu and La is not vice-versa. Thu in la hi a, la in thu hi, ih cih ciangin a kileekkim ding cihna hi lo hi. Aktui lo tawh akno piang lo hi, kici tek hi. Ahi zongin Piancil LST ih sim ciangin akpi tawh kipan a aktui tawh kipan lo hi. Tuamah bangin La masa lo a, a thu masa hi.

La pen thu ii gah hi. A kung le a gah a kikhen theih loh hangin a kung a masak zawkna thu ih theih kul hi. Tua khit ciangin a gah le a kung, a kung le a gah ih ci zong phamawh nawn lo hi. Thu om masa a, tua khit ciangin la gah pan hi. Tua ahih manin thu le la pen a kileekkim ding a kul thu nih hi lo hi. Thu and La is not vice-versa. Banghang hiam cihleh tuate gel pen nih hi loin khat ahi hi. A kibang lo nih kikal thu hi leh bel a kim-a hawm sak ding kul mah ding hi. A kibang lo pasal le numei pen a kibeltuah tuak hi. Tuadante vice-versa hi.

Numei pen amah bek hi thei lo a, tua mah bangin pasal zong amah bel hi thei tuan lo hi. Tua te gel pen a khat om loin a khat hi thei lo hi. Tua dante pen kibel tuah “vice-versa” kici hi. Tua ih gen Thu le La pen a kibeltuah nam hi lo hi. It is not vice-versa. Thu ii gah pen la hiziau hi. Thu khat bek hi a, tua pen la-in kisa cihna hi bek hi. Tua thu ih tel khit ciangin, thu in la hi, la in thu hi, ih ci zongin poi nawn lo hi. Zomi te’ sungah thu mahmah ahi lo lasakna le phatna uang lua ahih manin kidop huai zaw hi. Thu mah tawh pai zaw ding hi hang. Tua thu a hoihnak leh a la zong hoih ding hi.

Tuni Christian te’ sungah ih thu-upna le ih lasakzia ahi, ih thu le ih la kihualkim het lo tam mahmah ta hi. Christian te’ thu pen Lai Siangtho bu hi a, la pen Tedim labu (hymnal) ahi hi. Thu (Bible) le La (Hymnal) pualam awging pen pawlpite’ sungah tam simsim khin hi, cileng khial dingin ka ki-um kei hi. A Tedim labu le a Lai Siangtho puahphat pen hoih a, ahi zongin tua banga ih puahphat zah le ih hanciam zahin ih Zogam Christianity sungah tua Lai Siangtho le tua Labu in hong luah zo nai lo hi.

Lai Siangtho le labu pen a bu-in ih nei beka, a thu-in ih nei zo nai het kei hi. Bu neih bek loin thu neih ding hi hang. Zomi Christian te adingin ih thu le ih la ding pen Lai Siangtho le Tedim labu ahi hi. Hih Thu le La ih Christian nuntakna ah a thunei penin ih koih masiah picinna om zo lo dinga, a thu bek tawh a tawntawn a lamlam ih hi ding hi. Evan. Suangh Dal