A theihhuai upna laang (No. 9) ~ Langh Khan Mung

A theihhuai upna laang (No. 9) ~ Langh Khan Mung

Prosperity gospel leh damna (The gospel of Health) :: Eite hong it mahmah, hong hehpih lua mahmah Pasian’ geelna-ah thu-um mite cina ngeilo-in, hih leitungah i nuntak tan ding khitah Khazih sungah i ihmu ding hi ci uh hi.

LSTho in i taksa pumpi damna ding hong gen mah hi. Hih taksa pumpi pen Kha Siangtho tenna Biakinnpi hi (1Kor.3:16) cih asangte in a taksa pumpi damna ding kin ding ahih manin midangte sangin damzaw mah ding uh hi.

Pasian hong tatkhiatna (the redemptive work of God) sungah pumpi damna ding zong kihelmah hi (pumpi damna ding bek hilo).LSTho in pumpi taksa damna ding hong hilha, Zeisu leh sawltakte’ sep ding nasepte lakah kihel hi. Cina damsak theihna letsong zong om hi (1Kor.12:9). Cinate ading thunget ding hong kihanthawn hi (James 5:14-15).

Hih bangin cinate ading thu a kingetna in: I pumpi taksa pen tulaitakin a siathei, a sithei, a muatthei ahih hangin a thokik pelmawh dingte ihi hi.

Korin Masa 6:14 Pasian in sihna panin Topa thokiksak hi. Tua mah bangin eite zong ama vangliatna tawh hong thokiksak ding hi.

Pasian in hong damsak ciangin mailama pelmawha i ngah ding Pasian nasepnate hong tungkholkhin ahi hi.

Ahi zongin hih prosperity gospel-te in damna tawh kizom a thugenna uhah Isaiah 53 bulphuh uh hi.

Isaiah 53:5 Ahih hangin eite’ khialhna hangin amah kiliamsak a, eite’ mawhna hangin amah kisatnim hi. Ama gim thuakna hangin nopna i ngah a, ama liamna hangin damna i ngah hi.

Hih LSTho pen taksa pumpi damna dingin khia uha, adang khempeuh in kha damna-in khia uh hi. Zeisu hong sihna (atonement) in damna ding mah ahi hiam? LSTho mun tampi in Zeisu hong sihna leh sihna panin a thawhkikna in i mawhnate tungah a gualzo hi hong ci hi.

Matthai 8:17 Kamsang Isaiah in, “Amah in eite’ natna teng thuakin, eite’ gimna teng puakhia hi,” ci-in a genna thu a tun nadingin hih bang a piang ahi hi.

Hih Matthai in Zeisu hong sihna pen taksa pumpi damna ding hi ci-in hong gena, tua in Messiah’ i nasep dingte laka a kihel khatin mu hi.

Peter Masa 2:24 Eite, mawhna lamah misi bangin, thuman lamah nungta-in i gamtat theih nadingin Khrih mahmah in eite’ mawhna ama pumpi mahmah tawh singlamteh tungah a pua hi. Ama liamna hangin note in damna na ngah uh hi.

Peter in Isaiah 53 pen gentehna (metaphysical) hi ci-in gena, Zeisu hong sihna leh a thawhkikna (atonement) pen i mawhna (natna) damna ding hi ci-a, Isaiah mahmah i hong gen thu zong hipah hi.

Pumpi taksa natna pen mawhna hang mah hilo ahi hiam? Zeisu hong sihna leh a thawhkikna-ah pumpi taksa i damna ding zong kihel hilo ahi hiam? cihtheih ahih hangin, thu-um mite pen dam sinsen den ding(perfect health) cihna omlo hi. Zeisu hong sihna leh a thawhkikna in mawhna tawh kizom natna damsakna ding a kihel hangin a picing pumpi tatkhiatna-redemption of our bodies ngah nailo ihih manin, thawhkikni hong tunma tengin natna-satna, gentheih haksatna leh sihna i thuaklai dingmah ahi hi.

Hih bangin LSTho khiatdan a khialh manun, thu-um mite nuntakna-ah natnate leh cinatnate a omlo ding hi ci-in a hilhkhial uh ahi hi. Langh Khan Mung