A theihhuai upna laang (No. 5) ~ Langh Khan Mung

A theihhuai upna laang (No. 5) ~ Langh Khan Mung

Prosperity gospel-te in LSTho Thuciam lui a Pasian leh a mite’ kikala kibawl kiciamnate (Covenant) bulphuh uh hi. Pasian in Abraham leh a suan-a khakte hauhna dingin kamciam pia hi. Tuhun thu-umte pen Kha thu-ah Abraham’ suan leh khakte mah i hih manin hauhna leh nopsaknate zong i ngah ding hi. Ei a hi ci uh hi. Leitang zong a nei ngiat dingte hi hangci uh hi.

Kenneth Copeland in a laigelh “The Laws of Prosperity” ah Pasian tawh i kithumin khit leh hauh ding pelmawh hi. Thu-um mite in a hau ding ahih mam a kiphawk ding uh hi ci hi.

Pasian’tate cih pen Kumpipa’ tate ci-in khia uh a, Kumpipa’tate in atuam hamphatna a ngah dingmah uh hi ci-in Haroad Hill in a laibu “How to be a Winner” ah gen hi.

A genpite khatah ” Khaici vawhdan-the principle of sowing seeds” cih ahi hi. Khaici vawhdan tawh kizom a bulphuh LSTho munte in:

1. Galati 6:7 Pasian a kikhemzo dingin ngaihsunkha kei un. Mi khempeuh in ama vawh nam khaici mah ngahkik ding hi.

2. Marka 10:29-30 Jesuh in amaute kiangah, “Hi mah hi; ke’n kong cihin-ah, keima hang le lungdamna thu hangin a inn, a sanggam pasalte, a sanggam numeite, a nu, a pa, a tate, le a leitang, khat peuhmah a nusiate in tukhang hunin a zah zakhat innte, sanggam pasalte, sanggam numeite, nute, tate, leitangte ngah ding uh a, bawlsiatna zong ngah ding uh hi. Hong tung ding hunah zong nuntak tawntungna ngahlai ding uh hi.

Taksa leh Kha nopsakna dingin thuciamlui Thuhilhkikna 28:1-14 bulphuhin Johan Thumna 1:2 Ka lawm it Gaias aw, nang na ci damin na vai khempeuh zong na maa pai ding hi, ci-in ka lamen hi. Kha thu tawh kisai lamsangah zong bangmah lungkhamna om lo ding hi, ci-in ka thei hi.

Thuhilhnu Gloria Copeland in “God’s Will is Prosperity”-Pasian’deihna in Hauh ding ahi hi” cih a laibu-ah amau’Pasian nasepna dante-ah Dollar 1 na piak uh leh $ 100 ngahkik ding; $10 na piak leh $ 1000 ngahkik ding; Vanleng 1 na piak uh leh Vanleng 100 man tawh a kikim sum ngahkik ding; motor 1 na piak uh leh na khan tawntunga zat ding motir hong kipia ding ci-in gen hi.

Hih teng pen i gensa Gal.6:7 bulphuhin thuhilhnate hi-a, a mangngilh uh ahk a simzomloh uh pen Gal.6:8 hi.

Galati 6:8 Mi khatpeuh in ama leitung pumpi deihna khaici a vawh leh sihna ngah ding a, Kha Siangtho deihna khaici a vawh leh Kha Siangtho tung panin nuntak tawntungna ngah ding hi. Langh Khan Mung