A migi Doctor (Tualgal: Gam Suplawhna) ~ Nk Khanno

A migi Doctor (Tualgal: Gam Suplawhna) ~ Nk Khanno

(Tualgal hoihloh zia le minam aading kipiakkhiatna, nang khitciang (after you) cih tawh angsung lungsim neihlohna cihte le thu tampi tak hong lakkhia lai khat ahi hi.)

(1) Ka sangkah pih ka lawmte khat ka phawk hi.

A tun tom, a kamtawm, thu khat peuhpeuh dai takin a ngaihsun danin a om tawh akibat hang kimawl siam khat ahi hi. Amah pen Mandalay MC (Siavuan sinna sanginnpi) teltuam taihat sangnaupang khat ahi a, University kiim kimawlna kidemna ah zong Champion khat ahi hi. Khatvei lai in Mandalay kulh kimkot tai kidemna Mandalay Medical Sanginnpi in a bawlna ah amah in akhatna a la hi. Anihna ngah pa tawh nai lang bang kikhia uhi. Amah pen a thazan tuak mahmah hi.

Sang kah kumnihna ah ko a neu khante aading in tai kidemna ah Gold medal mah hong ngah in, a khatna akici teng ngah ngeingai ka hih manun ka manggilh thei kei hi. Kei ka hih leh mithum tai kidemna ah a thumna, a nihna te ka ngah hi. Aki manggilh theilo siamsin sangkah lai hunte ahi hi.

Amah pen kimanggilh theilo phadeuh hi. Amel muhna limlim in ama thu thang khin mahmah hi.

2nd MB (sangkah kumnihna) kipat kik kum 1981 May kha in amah tawh sanginn ah ka kimu kha hi. Amah pen Ha Cidamna Sanginnpi (University of Dental Medicine) panin sang hong kituah phei khat ahih man ahi hi. Amah pen ahi thilthel khat ahi hi.

Sanglutna a siauh tungin amat in Ha lam ngahzo bek dingin ki um ahih manin Ha (dental) lam a siau ahi hi. Mualmi khat ahi, dik hichiat in khuaval lo amah pen tua hun lai in sanglut nading kamdot kibawl ciangin Siate in “Lawm nang namat in MC ngah zo ding hilo maw, na ut leh MC sang kah theih nading hong vaihawm sak nung” acih ciangin amah utna tawh kizui in MC sang lam ah akituah ahi hi.

Ama thu gen ding hileng gen ding tampi tak a om hi. Tua hun lai in amin thang mahmah ahi Zii-Kuat-Sein kici pi 7 asang numei nu asih khit ciangin a guhte Anatomy khan sungah kikhai hi. Tua guh kikhai te kua ahia ci’n a kidot leh aman thei kei ing zong za ngei kei ingh ci hi. Ahi zongin amah bel lai nangh tuanlo hi. Lai siamlua ahih loh hangin Laivuan sim in ong hi. Lai pil hi.

(2) Kei pen sangkah kum 2na ka man ciangin Mandalay panin Yangon sang ah ka kituah hi. Ka lawm tawh ka kigamla ta uhi. Tua zawh kum 5 khit ciangin ka lawm pen leinuai/singnuai ah gamtang (Kawl Kumpi Leh do) in om ci’n ka za hi.

Tua thu pen ahi takpi ahih lam 1989 kum Myitkyina Zatopi ah AS (Assistant Surgeon) kasep ciangin ka thei pan hi. Kumpi na kasep masak na zato pi zong ahi hi. Myikyina khuapi ah Mandalay MC ah ka kahpih ka lawmte ahi TunTunPaing, Ja Aung, Brang Aung te tawh ka kimu uhi. Myitsone lam kipai theilo ahih manin Karengnaw ah amau hong paipih uhi. Ka lawm N Lam Aung om ahih manin paikul lo hi ci uhi. Kei ngaihsutna ah ahih leh amau mi, kei mi cih bangin gi ka nei kei hi. N Lam Aung omna lam zong galte lam ci’n ka ciamteh kei hi. A vekpi in lawm vive ahi lel hi. Ahi zongin Gal le Pawl ci’n kikhenna a om lam ka phawk hi. Aw hih pen Gamvai hizen ven maw.

Zato cih pen kikhenna, kideidanna omlo hi. A vekpi in kibawl hi. Khatvei lai in Zato ah a lawmnu a en in a pai khatpa nung ah pawlkhatte in zui pah in zato kongkhakpi gei ah kikapna nasia tak a om lam zong ka thei hi. Kachin gam ah kum 2 le kha3 sung na kasem hi. Hia lam te in hong sap phial leh zong N Lam Aung lawm hi’ng ci’n gen ning ci’n na ngaihsun hi. Ku amah in zong hong sam samlo hi.

Pa Ju Nar Phawh kikapnate, mine sikkha cih bangin zato ah cina adim in a om hi. Zato ngak Puteek pa Pension la khin ta mah leh zan nai 9 sat khawng aa tawhtang ngen in cina gimte aading kikheina a honsak in a inn aa a zi bek a nusia zel hi. Nasepna ah acitak, a kuhkal ahih lam ka thei hi. Sister nu in hoihtak in genpih thei zel hi.

Mei pailoh ciang mei set hong in cina te at, cina vel, datmei tawi in pai kawikawi cih bangin ka sem hi. Zum mawtaw in hong sap leh zong ka zui hi. Zan ahih hangin zong bangmah cilo hi. Kumpi nasemte omna inn kiim te ah dum kito ngeingai kawikawi in bangkhat peuh hileh kibuk theih nading cih dan ahi hi.

Hi hun lai in galkap te le KIA te khat le khat nasia takin akikap laitak uh ahi hi. A langtuak aa Siavuante pen ka lawmte ahi hi. Khat vei Galkap lam pan in Ka lawm MyoMit Aung in gal kido khit a KIAte leen khat lak na vuah a om vante a sitna ah ‘Bailey and Love’ kici Henry Hamilton Bailey gelh amu hi. Tua laibu nei tungah N Lam Aung ci’n sign kithu ahih manin a lungnop hetlo in a dah mahmah lam kei tung ah hong gen ngei hi. N Lam Aung ahih leh KIA lam ah a liam abai te a bawl a migi siavuan pa ahi hi.

(3) A kum kician in ka tel lian nawn kei a, ka upmawh in Siavuan ka sep zawh kum 6 khit ah ama thu kagal zak hi. Tua hun in kei pen Yangon ah ka om ta hi.

Galkapte in sim zel uh a, amah zong mi cina te kem in khawi in galtai in a om hi. Khat vei amah leh cina gim mi 15 kiim ding a om lai tak un lui tui thakhat thu in hong khang vat hi. A tai zo cina te tai uhi. a tai zolo te amah in pua in luitui a kan pih in ahon hi. Tai hat champion khat ahih hangin amah tai lo hi. A tai zolo cina gimte nawn kawikawi in a om hi. Gal sung ahih manin nek le dawn kicing lo, mei tawh kihuan anne lo, nisim in a liam a baite bawl, at cih bangte hangin tha a nei kei hi.

Tua ni in ama tha in zo nonlo hi. A tawpna pen cina pa apua in lui gal a tunpih khit ciangin amah kitom zo nonlo hi. A tha san zo nonlo in lui tui a nang zo non kei hi.

• Amah pai ta hi.
• Aman ahoih pen in hanciam hi.
• Leitung in thei hi.
• Pasian in zong thei hi.
• Cina te suahtakna ding aman semkhia hi.

Cina te suahtak ding a thupi pen hi. Tai hat champion khat himah leh amah suahtak nading tai sawm lo hi.

Lui a ngap zolo cina te luitui ngap in kanpih hi. Luitui in a cina te taisak lo e, a hih zawh zah in a hoihpen in hanciam ning….

N Lam Aung icih pen hi bang mi ahi hi.

A migi, adik, a thuman, a citak, ama nuntakna khual masa lo in mite aading a piak khiat ama hutawp n ate..
Hun tawpna ah cina te a vekin suakta uhi. ahi zongin amah ahih leh a suahtak nading thasan zo nonlo hi.
Lui tui in tai ta hi.

(4) Tual gal pen tudong in mansiang thei nai mahmah lo hi. Amah ka phawk hi.

Tuni in N Lam Aung om bang hileh bang a gen tam kaci hi. Ama gennop ken thei ding in ka ki um hi. A dik mahmah, a cihtak mahmah, a thuman kuhkal mahmah N Lam Aung bang dan mitampi ei te in isup lawh khinta hi.

Tual gal bei ta hen!

N Lam Aung bang mihoih mi manpha te sumh nuam nonlo hi hang.

Khawmpi te ah thu tampi kigente Radio pan in ka za zel hi. Amaute N Lam Aung thu ka gen nuam hi.

N Lam Aung nungta lai hileh bang a gen zen tam?

Ka lawmpa tawh a nungta sa in a kimu ding hileng dong nuam tak ingh..

Lailet: Nk Khanno (Zingsol)
Laigelhpa : Dr Tint Tint Kyi, 3.9.2016
Theih ding: hih lai at Dr. Tint Tint Kyi pen Professor (Medicine) General Physician ahi hi.