A Maanpen I Minam Min “ZOMI” ahi hi ~ C. Thang Za Tuan

A Maanpen I Minam Min “ZOMI” ahi hi ~ C. Thang Za Tuan

Guai, Dr.Dongno in Wed, Oct.14, 2015 ni aa atung a i min thulu tawh kisai ong pulak khiat kik pen i vekin i lung akim mahmah hi. “Zomi leh Chin Min Zatna” cih thulu tawh May 17, 2011 ni in Tedim Kipawlna makaihna tawh in Zomi Seminar 7 na Yangon khuapi ah kibawl a mi 104 kah hi. Tua ni in “Zomi leh Chin” cih min apiankhiatna kibullot in ki pulak hi. ZOLUS No.15, 2011 issue p.76 -89 ah akim in mipi muhbehna tawh kisuaksak hi.

Chin pen 1886 January 1 ni in Kawlgam leh India gam pen Queen Victoria in British Dominion sung ah aguanna apulak khiat lai in a kizang cil hi. 1896 Chinhills Regulations pan in akip paisuak ahiphot hi. Tua zawh in Kawlgam ah 1947, 1974 leh 2008 Constitution ah kizang suak ahihman i official name hong suak in tudong aki paikhia thei nailo mah ahi lel hi. Legal name hiphot in original name hi zenzen lomah hi,

I theihsa ciat mah bangin “Chin” cih kammal pen Kawlte onglawhna apaisuak hi a ei kuamah in “Chin” minam hing aci omlo in, Asho, Cho, Khumi,Matu. Laimi, Laizo, Zomi, Mizo(Lusei) in akilo ciat ihi hi. La i phuah ciangin zong ei kilawhna tek mah tawh kiphuak in “Chin: cih kilo/hel khalo hi. Gtn. Pianna i Zolei hi e phal siing e…cih bang in la iphuak a i lungsim hong lawng mahmah na in i minam tatak ahihna akilatna hi.

Zo cih kammal pen bul mahmah in atung a min tuamtuam tawh akilo ngeingaite teenna sung ah “Zote, Zotung, Zophei, Zo ci in amunmun ah min kivawhna in zong akizang lai hi. Gtn. in U Lian Uk , Dr. Lian Hmung Sakhong bang Zophei akilote hi. Tulaitak a Matupi pan MP U Paw Lian Hlun, Bohmu Cia Khe te bang Zotung hi. Dr. Hre Kio, U Zing Cung te bang Zokhua te hi. Prof. F.K. Lehman ii “The Structure of Chin Society “1963 pp.7-10 bang ah Zopheite bangin phui asam uh ciangin “Vai ram” leh “Zo ram” ci in amau leh amau akilawhna dong in gen siang hi. Tua kimlai Zophei ah Zo cih kammal deih non kei le-uh “Chinphei” cih zawzen ding kilawm loding hi.

Dr.E.H.East ii “Burma Manuscript” laibu pp.168-169 ah agenna ah Suntla khuagei a om Lailun kua pan in leitung mi numei pasal a piangkhia masa ding in um uh a, tua Lailun kuahawm pen leitung bup ii alaizang pen (centre of the earth) ding in um uh ahihman Laimi acih uh ciang leitung laizang aa piang dingin aki-ummawh uh hizawzen ci hi. Dr. East mahmah in zong leitung mi masate pianna pen mun leh leitung ii a laizang dingin umlo in”very interesting as it reveals a knowledge though faulty of the first human couple” hi ci hi.

Dr. Dongno in akicing tak in English tawh hong at khiahenla, Pu Lian Uk a tawh gawm in abu in bawl khia lehang deihhuai kasa hi.

ZOLUS Vol. 18 , 2014 ah Mungpi Suantak ii at “What does the word Chin Implies” tetawh zong etkak beh theih ding hoihpah sa ing. C. Thang Za Tuan