U.S News Update: A lahuai mahmah Covid-19 natna thak “Omicron”

U.S News Update: A lahuai mahmah Covid-19 natna thak “Omicron”

South America gam ah anasia mahmah Covid-19 natna thak (a new coronavirus variant) khat kimukhia aa, natna kilawh manlang mahmah in gam tampi ah zong kilawh in kimu ta hi. World Health Organization (WHO) in Covid B11529 variant nam hi ci in ciamteh aa, amin dingin “Omicron” cih ka pia uh hi ci in November 26 ni in taangko khia uh hi. Abeisa hun aa akimu khia Delta variant (India) leh Apha variant (UK) te sang azah tampi natna kilawhna manlang zaw ci uh aa, UN leh Leitunggambup linglawng keei ta uh hi.

US, UK, EU leh gam tampi tak in South Africa gam pan hong tu ding Vanleng (Airlines) khempeuh khawlsak (cancel) uh aa, adang Africa pan hong lut ding te zong lut sak nawnlo phot uh hi. WHO leh cidam nalam thu nei (Health authorities) ten Covid-19 natna thak Omicron variant pen tulai tak aa akisun Covid-19 vaccines te in do zong maw, do zo lo cih pen akan sanlai tak uh hi aa, akitheih khiat nang ni tampi sawt thei lai ding ci uh hi. South Africa gam ii cidam na lam makai (health authority) ten belh hih Omicron pen natna nasia lua lo “mild symptom” nei hi ci uh hi.

WHO in Covid natna thak Omicron hong tangko khit zawh lian ciang Stock market kiam suk aa, Swe (gold) man zong khang pah hi. Omicron natna South Africa ah akimuh zawh asau vei lo in Netherlands gam ah zong Omicron Covid natna ngah thak 13 kimu aa, UK ah zong 3 kimu in Denmark leh Australia gam te ah zong kimu hi ci in Reuters news in taangko khia hi. Tua bek thamlo in Belgium, Botswana, Germany, Hong Kong, Israel, Italy, France, Canada gam te ah zong natna ngah thak kimu hi ci in WHO in genkhia hi. Mipil expert pawlkhat in belh hih natna thak pen US gam sung hong tung khin ding hi ci in um mawh uh hi.

Hih natna thak tawh kisai US gam sung ah zong kidal nading leh kikep nading White House pan geelna kinei ci uh aa, U.S. infectious disease official khat ahi Dr. Anthony Fauci in belh Omicron tawh kisai thu leh la te akikan lai tak hi aa, athu cing theih khiat zawh nang nipi nih bang sawt ding hi ci hi. U.S gam sungah lockdown bawl ding cih te khawng gen ding hi nailo hi ci in Dr. Fauci in gen beh hi.

U.S National Institutes of Health (NIH) Director Francis Collins in tulai tak asun Covid vaccines ten dal zo ding maw, dal zo lo ding cih pen kitheih khiat zawh nang ahun nipi tampi sawt thei hi ci hi. Pu Biden in zong hih Omicron natna tawh kisai Monday ni ciangin White House pan thu genna nei ding ci hi.

Sen. Tom Cotton (R-Ark.) in belh hih natna tawh kisai Pu Biden ii geel dan leh travel ban te abawl dan zekai lua ahih manin US gam aading lahuai mahmah hi ci hi. Hih Covid natna thak Omicron pen aomsa Covid natna te sang kilawhna baih zaw, manlang zaw cih ahih manin akua mapeuh kidawp lai ding leh Maituam (mask) thuah tek ding hong thupi mahmah ding hi ci in cidam na lam thu nei ten genkhia uh hi.

More: Covid galdona tuamtuam ~ Sia Do Khup

Tua ahih manin I ciah I kuan kidawp lai tek ding leh Kumpi thu nei lam te genkhiat te I ngai tek ding hong thupi mahmah ding hi. Ref: CNA, Epoch Times, Reuters, CDC, ** Tu nipi sung US & Kawlgam News update LIVE kikhah khia ding ahih manin kimu tek ni… Thomas On Sian Mung (Thomas Mung Guite) Washington D.C November 29, 2021.