A hehpih huai Cora Pelaez nuntakna ~ Pau Tun Thang

A hehpih huai Cora Pelaez nuntakna ~ Pau Tun Thang

Kum 1990 January kha a ni 4 na hong tun tawh kituak in Cora Pelaez zong Manila pan in lungdamna tampi tawh Kuwait hong tung hi. Cora pen a pa in kum sagih (7) bek a phak lai in sihsan hi. Tua akipan in a innkuan uh gentheihna tawh kidim hi. Cora- in a nu banah naupang nga(5) te neek leh dawn silh leh teen ding a ngaihsut hong kuul ta hi.Nasem dingin naupang lai sim mah leh seploh phamawh ahihmanin lo kuan zel hi.

Kum 1988 akipan Cora ii’ u pasal khatin Dubai ah motor hawl in tuaciangin a nuntakna uh hong nuam tuam zaw deuh hi.Khasimin dollar 150 khak zel hi.Tua tawh Cora- te innkuan in cik mah a amuh khak ngei loh uh buhsih leh aksa kaal khat in khatvei ne zo uh hi.Nuntak ngeina hong ban kik uh ahihmanin lungddam mah mah uh hi.Cora nu ingankhawi ding vawk thum leh lawi nih lei hi.

Nuam lua kisa in kalkhat sung tua a lopna nei uh hi.Kum 1989 August kha ciangin a innkuan sung uah siat tuahna hong om hi.Cora ii’ sanggampa Dubai ah Car accident in si hi.Cora ii’ nu in a tapa’ luang Dubai pana amau gam Philipines a lakna ding sum leh paai zong nei lo hi.Hihte innkuan sungthu a khasiat huai zia Arab mihau khat in za kha hi.A bei khempeuh tua mihaupa in piaksak ziau hi.

A sanggampa sih khit ciangin Cora a unau lak ua upa pen hong hi ta hi.Manila khuapi a midangte nasep a zawnsak thei Agency khat ah Arab gam mun khat peuh a ompih nasem thei ding in a min va pia hi.Tua Agency ten Cora kiangah ama maiah nasep nop loh a nei lo mi 500 bang om ahihmanin lam-et huai lo cih gen uh hi.Ahizongin a lemtang a om zen zen le lah zonpih veve ding uh cih gen beh lai uh hi.

Tua kum November kha ciangin Cora ii’ nu a nawi ah aktui cia ding khat a bawk om hi.Sia vuan ten at – a chemotheraphy hih pah ding hoihsa uh hi.Tuabang hih nang sum lah Cora nu adingin vana gah mah bang hi.Siavuan ten ki-atna ding sum a neih kei leh sikdo taka a natna a thuak kuul ding cih ciang lo-ngal banagmah gen thei tuan lo uh hi.Tua pen Cora te innkuan adingin lungkhamna lianpi khat ahi hi.

Cora-zong Manila khuapi a nasep zong thei Agency te kiangah paikik hi.A nu nawi cancer a atna ding sum a neihloh lam uh leh a innkuan haksatna khempeuh uh va gen hi.Ama adingin nasep ding deihteel cih om thei lo in a muh bang bang a sep kuul hi.Sum manphatna Arab gam khawngah sep ding mu thei leh tua pan a nu kikep nang sum khak thei ding hi.Tua lo ngal bangmah lunggulh dang a neih loh lam gen hi.

Tuabanga a innkuan sung haksatna thu uh a gen tak ciangin tua Agency a sem Lebanese pasal khat in hehpih huaisa hi.Midang min aki gelhsa khat phiat in Cora ii’ min Arab gama nasem ding list ah hel sak hi.A passport zong office ah thehlut pah ding leh ni sawm khit ciang Kuwait ah a paitheih ding thu hilh hi.Cora in nasep a mu hi ta hi.

Cora, Kuwait a paima ni nih hunin a nu cancer ki at hi.Cancer nasia simta ahihmanin Siavuan ten Chemotheraphy tawh a dam zo diam cih gen hak sa uh hi.A ki-at khitciangun Siavuan pa’ sum dollar 5,000 Cora ii’ nu in bat a hi.Tua pen kha simin dollar 200 ta a louh ding hi mawk hi.Tua banah a meet za ah sawm nih(20% interest) sia vuan pa in lakbeh sawm lai hi.Cora in na asep ma in leiba Dollar 5,000 nei pah phot hi.

A sepna ding Kuwait ah khasimin Dollar 300 sang ding hi.Tua lak pan 200 leiba louhna in pia leh 100 bek cian lai hi.Tua pen a innkuanpihte khak sawm hi.Kuwait pai dinga Vanleeng tungah hong tuan ciangin Cora a mittui hong luang hi.Tua pen lungdamna mittui hi zaw hi.Ama ngaihsutna ah anu sih ngaka om pen ki at ahihmanin a nuntak hun sawt tuam ding hi.

Lungdam mah mah ahihmanin Pasian kiangah kunin lungsim thu-ngetna nei hi.Kuwait a tun ciang a nasepna te pahtaakna a ngah theih nanga nasem dingin a lungsim bawl khawl hi.Tuabanga a sep leh khasum hoih ngah dinga, den cianga a unau nu college kah na ding sum khawlman dingin ki ngaihsun hi.

Cora-ii nasepna pen Kuwait gama Jahra kici mun ahi hi.A inn neinu pen mi hoih mah mah khat hi in maitai siusiau den hi.Cora adingin zong lawp huai diak leh kilawm hi.Innteek pa lah mi lungduai mah mah khat hi zawmah lai hi.Tua ahihmanin Cora adingin a noplohna ding bangmah om lo hi.Tuabang mi hoih a tuahkhak pen Cora zong lungdam mah mah hi.

Khasim ni 28 hunin a khasum Philipines ah khak man den hi.A sum khak khit ninih sung khawng lungdam takin a nasep kawm in la bang sa thei hi.A ngaihsutna ah a sumkhak a innkuanpih ten na ngah ding, mehlim khawng lei dingin a inn uah na ne ding uh cih thei hi.Tua te a lungsim mitkha ah kilang ahihmanin a lungdam hi.July kha hong tun ciangin Cora ii’ awmna te nupa kum sima a zat zel bangun France gamah pai uh hi.

Tua inn lianpi sungah awmpih(nasem) mi li bek om uh hi.Huan cing vai(Indian) pen Cora leh midang ten zong tam hopih ngei khollo uh hi.Bazar ah a lawmngaih nu Sri Lanka (Sri Lankan)te khat tawh a ki muhnop manin paulap zongin paikhia ngitnget hi.An huan nu pen Pakistan(Pakistani) te hi in amah lah atate teng tawh buai khawp hi.

Tua lo midang khat Cora ii’ nampih (Philipinos) zong om in amah lah Cora sanga upa zaw tham khat hi.Tua ahihmanin Cora tawh ki tamthuah ngeilo uh hi.Tua Indian pa in lah Cora kiangah na meelhoih zawk man in hong hua ing.Ka lawmngaihnu pen nang tawh the in bawngpi mah bang hi ci mawk hi.Tua nasemte a pi leh pu zin kal in kitam hopih het lo uh hi.

Cora- pen lawmngaih zong a ngaihsun nai lo leh a nei nai lo nungak siangtho khat hi.Neek leh taak ding zongin kitaaklah ta dih hi.A khua uah a vengte un a melhoihna phat uh hi.Aman a meel a et nangin limlang gina zong neilo hi.Melhoih leh melhoih loh tawh buai man nai lo hi.July kha beikuan ciangin huan cing Indian pa in Iraq President Saddam Hussain-in gamgi kimah galvan tampi koih khol, Kuwiat hauhna meitui deihgawh ahihmanin sim(attack) vat thei cih gen hi.

Cora patau lua amuh ciangin vaipa(Indian) mah in Arab te pen a kam uh pha pongmawk in a tak in gamtang ngam ngei kei uh ci kik hi.Cora lau ahihmanin thuthak khawng ahih theih zah in ngai hi.A ompih a nmpih nu Arabic paua thuthak kisim te letkhia (translate) sak zel hi.A lawmnu pen kum 8 bang Kuwait ah om khin ahihmanin siam vanglak hi.A pu leh pi khualzin kaal in nasemte zingsang tho hak thei uh hi. Ka thu a kizat theih laitak ci mawk in sawt pipi ihmu bihbiah uh hi.

August kha ni nih ni zan in Cora khanglo in lupna tung pan tho khia nai lo hi.A ging zei zai khat za hi.Thudon meel lo in mitsi kik hi.Kum nih ciang leave kha khat sung ngah thei bek ding ahihmanin a inn kuampihte kum khat leh a lang sung mu lo ding hi.A nu leh a sanggamte a lungsim ah hong kilang uh hi.A khua uah a ciah cianga innkuanpihte a puak ding khawng ngaihsun hi.Lungnuam takin tomvei sung ihmu kik sai hi.Nai kua kiim ciangin patauhna aw khat in phawng leu leu hi.Mang lang takin a lupna pan in tho vat hi. A puantual silh in thawm ginna lam manawh hi.

Huan cingpa sisan naisan tawh tuibualna(Pool) ah a muh ciangin Cora kigaihvat zawzen hi.Galkap bangzah hiam khat thau tawi zong mu hi.Koi lam pana pai uh hiam cih bel theilo hi.Tuabanga cih nang thei lo in a om laitakin ann huan nu ama omna khengin tai phei zeza hi.Galkapte hong pai uh hi paitam lam pan tai khia un ci in kiko hi. Cora lau lua liang ahihmanin a tai sawm leh tang thei lo mawk hi.

A ci liing gawp in taikhia thei lo citciat hi.Iraq galkap ten a taikhia man lo Cora kiang lam hong zuan uh hi.Cora in a cih nang thei lo in a lukun in kap hi.Iraq galkap ten lah hehpih cih thadah nuihsan zaw lai uh hi.Arabic pau tawh ki naak hopih mah mah uh hi.A gen uh thei lo ahihmanin a kikap lum dingsa in a innkuanpihte a lungsimah hong kilang uh hi.Amah lo in a innkuanpih ten ann neek ding bangci muh ding cih khawng ngaihsun man hi.

Cora-in bang kicih ding cih thei pak lo hi.Galkap ten sawn in zawt kawi kawi uh hi.A puantual a suahsak tak ciangun bel ngaihsutna khat nei thei lian hi.A tha neih zah in sihtha tawh kitawm hi.Ahizongin ama tha tawh tai khiat ding pen haksa lua hi.Galkap te amah sangin tha hat zaw banah tam zaw uh hi.Galkap pen a tawm pen in guk kim hi ding uh hi.A sawt lo in Cora in a puantual tangzo nawn lo hi.Galkap ten hawk khiatsak petmah ta uh hi.

Guaktangin sual laitak a lum hi mawk hi.Galkap ten a thau te uh koih hoih phot zaw zen in 4 in a khut leh a khe ah len in adang khat in buan ta hi.Cora -a aw neihzah in awng gawp a, galkap ten ama’ puan tualpi mah tawh a kam hum sak uh hi.Cora pen nungak siangtho tangval a luppih ngei nai lo ahihmanin a sisan hong suak hi.Tua hangin galkapte a heh uh hiam a lawp uh hiam cih kithei lo a zongsang uh hiam kipan kik zel uh hi.Thum bangin nih vei tek buan(rape) uh hi.Mun tuamtuamah amau lemtan dan ciata buan uh hi mai veh aw, ta lawm lawm zen.

Cora-in amah a buante a khawl thei lo ding uh sa man hi.A sawt ciangin gim lua ahihmanin khua phawk nawn lo hi.Tuaciangin galkap ten zong paikhiatsan thei sam uh hi.A khanlawh ciangin huan cingpa nasa a tau a zak masak pen ahi hi.Et sawm in haksa pi in hong tho to in va pai phei hi.Huan cingpa in khua mel tui meel nap hawk nawn lo hi.A kam pan in sisan hong luang khia hi.A taksa pumpi liing hi.Tua khitciangin huan cingpa ‘ thawm daaita hi.

Cora in a si ahihlam thei siam hi.Galkapte hong kileh kik kha le uh cih ngaihsun ahihmanin haksa pi takin huan pan paikhia hi.Lopa bawk kawmah bu sim hi.Tang vet lo in tua ah a zingciang zingsang dong om hi. Cora-in zatu zatang tawh kikep a kuulzia thei hi.Ahizongin bangci hih ding cih leh kawilam zuan ding cih thei siam lo hi.Tua ahihmanin haksa pi takin inn sung lam manawh kik zaw hi.Kisialna kuangah tuilum dimsak in kidiah hi.Tuaciangin a liamna pan in si hong luang hi.

Tua kisilna ah a kidiahna pan a nawi muk vei lam om nawn lo cih phawk hi.A nu in tuivawt in tuivot in sisan luang khawlsak thei cih ahilh phawk ahihmanin tuilum pen tuivawt tawh khek hi.A tai leh a taw banah a gil na lua ahihmanin a nawi muk a petkhiatsak uh zong a phawk paklo ahi hi.A man lang thei thei in a liam mate tuam hi. Nat dawn zatang a zon leh aspirin(naungek neek ding) bek mu hi.Aman zong ne pong sam hi.Ahizongin picingte adingin a kitheihna om tuan meel lo hi.

Cora-in a man lang thei thei a Kuwait paikhiatsan ding hoihsa hi.Neek ding a muh bang bang ne in a puan te silh hi.Khua lakah patau pipi in paikhia hi.Khuasung lah Bandh om mah tawh kibangin dai dide hi.Cora inn tuam tuam ah lut kawi kawi hi.Kamphatna tawh a nampih Filipinos te va mu kha hi.A nampi numei ten Cora a muh ciangun heh cihtakin heh uh hi.Ahizongin bangmah cih thei tuan lo uh hi.A nampih numei dang khat zong Iraq galkap ten buan uh hi.

Ahizongin amah bel Cora zah in liam lo bilbel hi. Filipinos pasal te zong heh lua in amau awm mun pan Iraq hamsiat gawp uh hi.Cora lam thak ten Cora Kuwait pan Jordan lam ah paisak ding vaihawm uh hi.Tua a theih ciang Cora a natna te hong dam tuam heel hi.Ama ading in a gam ua ciah a, a nu meel muh ding lo ngal adang lunggulh bangmah om lo hi.A paikhiatna lam uh lah gawtmun lampi mah banga a haksa khat ahi hi.Lamkaal ah Iraq galkap leh galkap ahi khollo te nangawn in motor khawlsak in sum leh van a laksak tampi om hi.

Jordan a tun ciangin tui tawmkhat leh apple pum nih bek nei lai zen hi.Lamkaal ah Cora a nampih a lawm ten hehpih mah mah uh hi.Amau te laka khat pen nurse na hi vanglak hi.Tua nu in a liamma te limtakin khawii hi.A paikhit khit uh ni li ciang Cora nawi muk vei lam bawk hi.A naai khawng luangin tua in a khua sik sak hi.Jordan a tun ciangun thunei ten Cora mun muanhuaina lama kikem dingin paipih uh hi.

Cora’in a nu a muh ciangin lungdam mah mah hi.Mangngilh thei in ki um nawn lo liang hi.A nu lah anatna hangin a paima sangin na gimzaw lai hi.Cora in Iraq galkap te khutlum thuak cih ciang bek gen phawt hi.Adangte gen ngam lo in a puan a kikhelciang bangin a nawi muk a om nawn loh lam a theih khak ding lau hi.Cora in zan simin mang hoihlo(mangsia) man den hi.A mumang ah mi khat milim Pasian banga khut tampi a nei in thah sawm den hi.Khanglo in a innkuanpih te a et ciangin tua a mumang sangin khasiat huai zaw lai hi.

Thulakna: Hih thu pen “The rape of Kuwait” kici laibu Jean P. Sass ii’ gelh sung pana laksawn ahi hi. Kum 1990 August kha in Iraq dictator Saddam Hussain in Kuwait a sim(attack) mana mi si, bawlsiatna a thuak leh a kibuan te’ innkuanpihte a munah dong ngiat a, tua pana kigelh laibu ahi hi. Pau Tun Thang