A gammang dektak Zomi te ~ Khup Lian Thang

A gammang dektak Zomi te ~ Khup Lian Thang

Zomite pen Mongolia gam, Tibet gam, Kawlzang leh Kalay Kabaw zangkuam cih bangin a tenna mun ki khel toto hi. Lo no na lam zuan, khua hun nopna lam zuan leh gal le sa tawmna lam zuan in kikhin toto ahihna tangthu kan siamte in gen uh hi. AD 1400 Kum pawlin Zogam lam ah kikhin to uh a, tua hun-a kipan in tuni dongin Zogam ah kiptak kho takin na teng uh hi. Amau khua ciat ah hausa , upa te, ukpi te cih bangin kingakna kician a nei minam khat in na om uh hi. Khua tampi in kikhen uh himah ta leh, hausa upate makaite, ukpi te’ makaihna nuai ah ki thutuak takin na teng khawm uh a, ngeina hoih a nei, thumanna leh cihtakna, itna bulphuh in zingvai nitak vai na hawm khawm khua na sa khawm liailiai uh hi.

A Kipak Huai, A Mulkim Huai Zomi Nam Ni

Mangkangte in Leitung gamte la kawikawi uh a, 1885 kum in Kawl kumpi ukna teng laksak in a kumpi Thibaw Min zong man uh a, a khantawn in inn sungah khum cip uh hi. Tua pan in Zogam lam zong na sim to uh a, a sawtlo in Mangkangte’ ukna nuai ah Zogam na tung hi. Mangkangte in Zogam lam ah a lut ma hun ciangciang pen Zogam ah Zomite in amau’ leitangh tungah thu neihna ukna nei in, amau’ zingvai ding amau na vaihawm khin ta uh hi. Galpi nihna a ven ciangin Mangkangte in amau khutnuai-a om gamte tungah suahtakna piakkik dingin gelna na nei uh hi. Kawlte’ makaipi General Aung San in Zomite, Kachinte , Shante na zawn a, suahtakna ngah khitteh hih a suakta gam nga teng kigawm in Belpawl Gam khat phuh dingin 1947 kum Feb 12 Panlong thukimna tungtawn in na kipsak uh hi. A nung lamteh Karenni te in Belpawl Gam ah kihel dingin khentat uh a, a suakta gam 5 teng kigawm in Belpawl Gam khat in na ding uh hi.

Tua tungtawn in 4th Jan, 1948 kum ciangin Mangkangte in Belpawl Gam suahtakna pia hi. 1948 kum Feb 19-22 hun in Falam khuapi, Zogam ah suahtakna ngah lungdamkohna pawi, ki-ukna thak tawh kalsuanzia dingte mipi tungah theihsakna mipi khawmpi na bawl uh hi. 1947 kum Panlong thukimna tungtawn in ki-ukna ki-ukzia kikhel ding pen Ukpi te mahmah in lungkim tak leh gam le mipihte adingin deihsakna taktawh a thukim sa uh ahi hi. Ki-ukzia thukhun a thaktawh kalsuan hun ciangin mipi tangmi, Gambup innpi (Parliament) ah a kah dingpen Ukpi te bek hilo in mipi in a deihnak leh mi khempeuh in suakta takin ki dem thei ding, cih pen Pu Thang Za Kai’ thusunna bulpi ahi hi. (Gentehna; Shante bangin Ukpi Sawbua te or amau telte bek mah mipi tangmi dingin innpi (Parliament) ah kah uh hi.)

Pu Thang Za Kai’ thu sunna leh 1947 kum Panlong thukimna tungtawn in Mangkangte a bawlsak Chin Hills Regulation Acts (1896) thukhun tawh kalsuanna pan in Belpawl Gam thukhun thak ki-ukna thaktawh kalsuan dingin mipi in thukimna na nei thei uh hi. Tua ni tua khawmpi siksan in Zomi Nam Ni ci-in Zomite adingin ni thupi pen khat in a ki ciamteh ahi hi. Minam kician, ngeina kician a nei, leitangh a nei minam khat in gam le lei itna, minam itna, leitang itna, Zomite in amau’ zing vai amau mah in a vaihawm theihna ding lunggulhna lungsimte paai dending deihna tungtawn in, a khang a khang in a no suah den ding leh a kiphawk den ding cih a ithuai mahmah ngimna tungtawn a ki phuankhia leh a kikipsak Zomi Nam Ni, Feb 20 ni ahi hi.

A Gammang Dektak Minam

Suahtakna ngahkhit aa kipan in Belpawl Gam uk makai pawlkhat hangin Belpawl Gam ah mimal a tawmzaw te ki nengniamna na khauhpai mahmah a, tua in gam sung mimal a tamzaw Kawlte leh mimal a tawm zaw mualtung mite kikal ah lungsim ki nopmawhna tampi na om hi. Tua bang thute hangin tualgal pen suahtakna ngahzawh tuni dongin bei zo nai lo a leitungah a sawt pen tualgal in kiciamteh hi. Belpawl Gam makaite’ siam lohna hangin Belpawl gam zong leitung ah a zawng pen gam khat in kiciamteh hi. Zomite’ nuntakna zong khangto hetlo in na niam mahmah a, a nuntakna uh haksa mahmah hi. Leitung khuahun luanzia kikhelna tuihual in Belpawl Gam leh Zomite na ban kha a, 1990 kum khit lamteh mundang gamdang ah sum zong sum thalawh dingin na kuan khia uh hi. 2010 kum khit ciangin gam ki-uk zia damdam in kikhel a, nuntak khuasak zia zong a nop lam ah manawh semsem zawdeuh ta hi. Zomite tampi tak zong gamdang mun 36 val bangah tungta uh a, amau’ zon sa sum leh paai mah tawh innlam-a om innkuanpihte’ nuntakna tampi noptuam in meh huanna ah sathau zong nel zo tuam, an lim tui lim ne kha zaw deuh uh hi.

A Kisam Tawhtang

Hun beisa Zomite nuntak khuasak zia, ki-uk ki makaihzia, gam makai kikhelna hangin Belpawl gam, Zogam Zomite a tualniam nuntakna pan in dingto in a khangto leh a picing minam khat hihna lam ah a kalsuan theihna dingin, ngaihsut huai thu tampi kawmkal pan in a thupi diak thu 4 tawh khatvei a lunggaih kik dinguh thupi ding hi.

1) Lungsim Ngaihsut Ziate Sangsak Kik Ding

A suakta gam, minam kician ngeina kician,leitangh tungah thu neihna a nei ngei Zomite pen gam uk kumpite ngaihsut siamlohna hangin minam a tamzaw te in a tawmzawte simmawh in neng niam uh hi. Gentehna; Zomite in suakta takin Zolai sin theilo uh a, a sin uh hangin zong kumpi in panpih lo ahih manin tan 4 ciang bek sin kha uh hi. Tua khit a om laiteng pen amau pianpih pau leh lai ahilo Kawllai leh Manglai bek tawh sinkha uh hi.Tua hangin Kawlte leh Kawllai Kawlpau a zang minam dangte tawh tehkak na in Zomite pen lai na siam zolo uh a, tan 10 nangawn haksa sa lua in ki ong zolo mello hi. Tua tan 10 in khangno te’ miliam nuntakzia ding thu tampi na gen sawnsawn ahih manin Zomite pen minam dangte sangin na khangto lo zaw tham pah uh hi.

Belpawl Gam a phut, gam le leitang a nei kimlai, lengla pemta bangin Zomite leh mualtung mite na kibawl hi. Kum 70 val sungbang nenniamna simmawhna a thuak khin Zomite pen amau theihloh kalin a lungsim puakzia uh na kikhel in, nidang laidan hi nawnlo in a hangsan’ nate khahsuah in a thuman a cihtaknate uh damdam in bei hiaihiai ta hi. Amau leh amau ki neusek in minam dangte, Zomi ahilo te limlim khawng thupi sa gawp uh hi. Minam dangte thupi sa lua ahih manin tua in hazatna lungsim guan a, tua hazatna lungsim in minam dangte a kisam ding zah sangin thupi sa gawp kihtak gawpsak hi. Tua in amau leh a mau ki neu etna om sak a, a kisam lo pi in minam dangte mudah thei uh hi. A kisam lo leh a kheng val thei minam itna lam ah kalsuan dekdek uh hi. (Nang minam itna hangin minam dangte khat, na u na nau na beh naphung na mipihte khat na muhdah zenzen khak leh tua bek a langlek a khengval minam itna ahi hi.)

Lungsim neu den uh ahih manin mite in thupi a sak ding, nasia mahmah asak dinguh ut lua uh a tua in angsung bek theisak in, khat leh khat kipawl theilo a tangtat, a sim tat minam khat hihna lam ah kalsuan pih hi. Tua ahih manin Zomite in a lungsim ngaihsut ziate ki puah pha kik in, minam lian minam thupi, pemta hilo inntek lungsim, upi lungsim thukhual kalsuanzia tawh a kalsuan kik ding uh thupi ding hi. Amau leh amau ki neusak tawm nawnlo in kimuanna taktawh hangsan takin a tenna Zogam Zolei, Kawlgam vaigam ah a gamtatna a kim le pam aa om minam dangte lakah hangsan tak in om in a maciat uh a nawt ding uh ahi hi.

2) Vaphual Lungtang, Thumanna leh Cihtaknate Vawhkik Ding

Minam kician khat hihna dingin a thupi khat ahi ngeina kician neih ding hi a, Zomite zong ngeina kician anei minam khat ahi uh hi. Tua ngeina hoihte lakah a thupi pen khat ahi thumanna leh cihtakna pen Zomite’ hihna, Zomite tawh a om khawm ngiat hi in, tua hangin minam ki ciaptehna ding Vanphual tawh a kiciateh ngiat minamte ahi uh hi. Itna a nei minamte hi uh a, khut khial ban khial in a si a liam nangawn a om phial hangin itna tawh mawh a kimaisak minamte ahi uh hi. Mangkangte in Zogam a uk lai un a galkap dingin muang ngiat uh a Zomite tampi tak galkap dingin na zang uh hi. 1917 kum in Piantit a pai Zomite’ cihtakna hangin Mangkang kumpite lungkim lua in a kumpi innpi ah a hawh dingin na sam ngiat hi.

Belpawl Gam sungah tualgal lianpi a pian ciangin hangsan takin ma na pang uh hi. Ahih hangin tua thumanna leh cihtakna cih te , Zomite in thupi sa nawnlo uh in na taisan pianpian ta uh hi. Angsung bekbek kikhual in sanggam unau, mipih sapih cih omlo in Zomite khat le khat a ki itna uh pen dau mahmah ta hi. Kumpi nasemte, Company nasemte, sepna bawlna tuamtuam ah vaipuak tuamtuam a neite sungah golhguk nekna, zulhzau nopna cihte in mun la pian ta hi. Sep ding vaipuak khat peuhpeuh hoihtak ginatak in a ki seplohnate in zong golhguk nekna namkhat mah ahi hi. Zomite khempeuh in hih bang ginatlohna, cihtak lohnate taisan in manlang takin kikhel kipuah phat kik ding hunta hi.

3) Lam Pial Pahpah, Hi Kisa Lua Pahpah Lohding

Kum tampi sung gam ki-ukna a hoihlohna hangin Belpawl Gam pen leitung ah gam a zawng penpen khat dinmun ah om hi. Tua Belpawl Gam sungah a zawng penpen in Zogam hi sawnsawn lai hi. Tua ahih manin Zogam le Zomite pen leitung ah a zawng penpen gam leh minamte hi kici thei hi. Tua dinmun kawmkal ah Leitung khuahun luanzia kikhelin, gam ki-ukzia zong hoih to semsem a Zomite zong damdam in khantoh kipanpan ta uh hi. Zomite tampi tak zong gamdang ah sum le paai, pilna siamna zongin va zin uh in va ngah takpi uh hi. Nuntakna zong nop zaw mahmah ta hi. Innlam ah zong kumpi nasepna ah min leh zate khangin, sumbawl paaibawlna ah lampi kihong semsem-a Zomite in nopsakna lam ah damdam manawh hiaihiai ta uh ahih manin lungdam huai mahmah hi.

Tua bangin nuntakna a nop pian ciangin a kampau dan uh, a gamtatdan uh zong kikhel hiaihiai uh a, ki teisakna kipilsakna ki hauhsakna in a theihloh kalin a sunguh ah mun na la ta hi. Awm pho sa vandak sa in hong pai laulau uh ahih manin cikteh a mai aa suang tum palkha in kituk suk ding hiam cih lung himawh huai simsim dinmun ah tungto ta uh hi. Motor nei, inn leh lo nei, sum leh paai zongzo in duhduh ne deihdeih leizo uh ahih manin beh leh phung lawm le gual pu le pi te a mangngilh ta, mi khempeuh a thusim nuam nawn phalo zong tam mahmah ta uh hi.

Tua bang lungsim puakzia in mi picing hetlo ahihna uh kilang sak hi. Tua bang kiphatsakna hi kisak pah lanlan nate in khantohna sangin kisiatna leh beimangna lam ah tun pih kha thei ding uh ahih manin ki nak dop huai mahmah hi. Minam khangto te in tu ma kum tampi lai in hih dan dinmun na tungkhin, na zo khin, na picing khin, ma na nawtto suakin tua in minam thupi minam picing a khangto minam dinmun ah tung sakzo ahihna pen Zomite mimal kim in pilna in la in a mangngilh khak hetloh ding uh thupi mahmah ding hi. Lam pial pahpah, hi a kisa lua kha pahpah Zomite aw, khanglo unla na ma uh nawt hun ta hi. Neih leh lamh kicing in ki hausak pah, pilna nei in ki pil sak pah, tawm vei nasem thei in sem theilua siamlua kisa pah cihte taisan hunta hi. Gamtat hoihna kihello melhoihna in a mawkna taktak ahihna phawk huai mahmah hi.

4) A Siangtho Ngimna Tupna Kician Nei Ding

Suahtakna ngah pan kipan tuni dong pen Belpawl Gam makaite in ukna thuneihna khempeuh len cip uh ahih manin na khempeuh pen amau vaihawmna bek tawh kisem in kikalsuan bek hi. Zomi makaite in zong a tungsiah-a Belpawl makaite’ thuneihna kheng zolo uh ahihmanin na khempeuh Kawlmang’ khut sungah tung mang khinta hi. Zomite in makai ding, Pa ding , U ding, lam lak ding, minam bup mipite in a kingak na ding neilo uh-a gammang khin ta uh hi. Akno te Akpi tawh a kikhen bangin gam mang ta uh-a tu in kum 70 sung gammang khin ta uh hi. Amah leh amah pil a kisa siam a kisa pianpian te khempeuh in makai, upa, Sia khawng amau leh amau kipia in sem gawpgawp ta uh hi.

A lian mahmah tuipi tungah, a hawl omlo gunkuang bangin huihnunna lam peuhpeuh ah kikhin in ngimna neilo tupna neilo in Zomite gammang ta uh hi. Nu leh Pa gina a neilo innkuan kisia cip te tawh kibangin a ki zahtaak zaw, a thukhual zaw, a lungduai zaw, a lemtuah zaw ding cih bang omlo in , Zomite nuntakna a hih zelzul zawh sawt pianpian ta hi. Zogam Zolei ah zavom, kham theih guih theih kicing zihziah in khuasung ah zong ki zang ziahziah lel hi. Zu le sa te ut bangbangin kizuak in a duh peuhpeuh in ut hunhun in lei thei uh hi. Minam khat, unau khat, beh khat phung khat kimlai muhzia sanzia tawm khat kibat lohna hangin minam itlo, minam zuakte, nang Zomi hilo nang tua minamte, cih bangin minam itna minam hihna khawng baihtak cikzethuai takin khensat in ki deidan ziauziau ta mawk uh hi. Hih bangin kingakna kician neilo in kalsuan toto uh hileh a sawtlo in minam bup in mangthan’na lam ah a manawhnawh suak kha ding uh hi.

Tua hih manin gam leh minam makai dingin a kipia khia makai khempeuh, Pasian tuute a cing dingin a kipia khia makai khempeuh, sum leh paai zongin sanggam u le naute panpih dingin a kipia khia khempeuh, nu leh pa dinmun a la khempeuh, hausa upa khempeuh, sang naupangte khempeuh, Zomi khempeuh in a maban a vaipuak lakna vuah a siangtho ngimna, a ithuai deihsakna man, a kician ngimna leh ki piakkhiat nopna tawh a kalsuan dinguh thupi penpen ding hi. Zomite sungah a siangtho leh itna deihsakna tawh a kipan khia leh ngimna hoih a nei mihoih a tam a tawmna tungtawn in Zomite mailam ding ki gen khol thei ding hi. Tu laitak dinmun ahih leh a lung himawh huai dinmun hi a, ahih hangin tu mahmah in ki ngaihsun kik in kikhel in lampi hoih tungah a kalsuan nakleh uh a hun lap mahmah lai hi.

Minam Picinna Lam Ah

Zomite in Zomi Nam Ni bawl, Minam thupi ngeina kician a nei, lai leh pau anei, leitangh mun leh mual a nei, ci in lungmuang in a om kal un, a tunga thu 4 te awlmawh lo in a om khak uh leh, a pu a pa te in a lunggulh pipen ahi Zomite in Zogam ah thuneihna neih ding cih pen mualmong et bang lel ding hi. Minam itna, minam ni pawite thupi takin a bawl ziahziah laitak un, tua minam a no suak sak ding, pak bangin a palh na dingin tui a buak uh hiam? Zomi nam bup a picing na dingin bangdan in bang ci bangin a minam a zun uh hiam? A kisamlo thu neuno te peuhtawh khat leh khat kitawng kiko in, phattuamna a om ngiatlo kikhenna bek a om sak ding thute laite peuh a atat lai uh hiam?

Tua bang thu te tawh hun a beisak a hih loh dinguh thupi dinga, mimal kim a sepna peuhpeuh a hihna peuhpeuh ah sanggam u leh nau beh le phung, khua le tui, pawlpi leh kipawlna adingin phattuamna a om sak gamtat lu heknate bekin Zomite pak bangin palh sak bek ding hi. Zomi mimal kim in minam thupi minam kician Belpawl Gam a phut minam liante ahihna kitel in, pupa khekhap bangin thumanna leh cihtakna te lencip kik a, tawmkhat cihtheih pakna hauhna pilna te tungah lungkim pah hi kisa pahpah lo in a hanciamna uh picing takin zomsuak in, a sepna abawlna a maban khempeuh ah a siangtho taktak itna bulphuh ngimna kician mahmah a neih nak uh leh hun sawtlo sungin Minam thupi, Minam thukhual, Minam picing khat suak taktak ding uh hi. Lungdam, Khup Lian Thang