A deihhuai kimakaih zia ~ Pau Khat Suan

A deihhuai kimakaih zia ~ Pau Khat Suan

Makai panmun lakna pen na lianpi sepnop man a a-ut, makai panmun pen natupna ading a siksan/stepping stone a adeih/anei nahih leh makai ding a ahoih nahi ding hi.

Makai panmun lakna pen natupna a tawpna, terminal ahih mawk leh tuamun natun ciang nang natupna nangimna a tungta himawk nahihman in, nang makai nahih, tua panmun nalak a kipan nanungzui mipi khawlcip ding cihna hipah a, makai cih genloh a huathuai leh a dongkholh maikhak a suak ding nahi hi.

Mipi kal suankhopna, maban vaihawmna khatpeuh ah panmun nalak leh khawlsawm kha kei in. Tua panmun nalak hun a kipan hatzaw sem a mipi taipih ding navaipuak lianpen ahih lam phawk gige in. Tua nangap kei leh midang a ngap leh a hizo om kha ding hi. Awn zaw in.

Mipi’ vai pen nang mimal vai hilo ahihman in mipi mah tawh sepkhop ding ahi hi. Mipi huai in, maban khatpeuh ah pankhop ding hanciam in. Makai i cih nasepna a manager tawh kibang hi a, amah mah in tuzum tupeek liikpah vava ding hilo hi.

Inn golpi lamkhiat nading in nasep uk, nasep makai ( manager ) in tu tawi pawl, hei tawipawl, siksem tawipawl, sek tawipawl, sing-at tawipawl, sik nasem pawl, suang nasem pawl.. khen diudeu a, tuate’ nasep ding, a sephun ding, a sepdan ding a geel pa ahi hi. Lumeel tawmeel phawklo a siksem khat tawh a buai, mi’ nasep zong phawklo a, khua-ul ziat le vei ah kaai a nasep hanciamna thupi a, ahih hang makai leh nasep ukte’ nasep hilo hi.

Makai hoih in mipi’ nasep ding leh panmun ding hawmsiam a, a huai siam ciang bek in makai gina hithei pan in, mipi’ tha, pilna siamna leh hatna huaikhawm gawmkhawm in maban lianpipi ah mualsuahpih hi.

Mipi in ong makaih ding makai utte i tel mahmah ding, theihna leh telna tawh i teel theihding thupi hi. Singkhuah suangtum leh molhtum tawh mipi vau a, lauphawnna tawh makai muntuh peuhmah angsung duhhop huaihamna masuan zia le tong ahihman in mipi in pelhpah diamdiam ding thupi mahmah ding hi. Tuni a na vengte avaupa in zing ciang nang zong ong vaulo ding kici theilo hi. Singkhuah suangtum molhtum suang in vauna tawh na lungmuanna leh na suahtakna ong suksiatsak ding hi. Tuabang mi gilote pelh ding Paunak LST sung ah tamveipi ong hilh hi.

Kua makai ut a, kua in makai semthei ding leh makai ding a deihhuai ahi hiam? Pau Khat Suan