A awlmawh huai i awlmawh loh Politics

A awlmawh huai i awlmawh loh Politics

Democracy hun (or) Hun hoih lai ci a i ciapteh Kawlgam suahtak ngah a kipan Newin’ galkap kumpi ong kah hun kikal (1948 – 1962) hun in Kawlgam pen South East Asia gam khempeuh lak ah a khangto pen, a hau pen, a pil pen, mite’ en mahmah gam, Asia ansaal cih min nangawn a ngah ngei gam ahi hi.

Ahi zong in ki-ukna kikhel in kimakaih zia hoihlo tawh makai gina lo in ong makaih mawk ciang khang khat sung in Leitung a a khangto lo pen gam (Least Develop Country, LDC) dinmun kitung hi. Tua ki-ukna leh kimakaihna in i nisim nuntak ong sukha mahmah hi. Mite’ simmawh leh neu-et pen dinmun ong tungsuk sak hi.

Zogam ah Tedim Tonzang Zomite i lal lai in Zogam bup ah a niampen kihi lo hi. Mite’ pimuh leh zahtakna a ngah ihi hi. Ahi zong in tu-in i sanggam dangte tawh tehtheih loh dinmun ah i om hi. (ei le ei kikhem tawm in, a neuzaw lo dan in kigen kingaihsun kei ni) Tu in mite in ong pahtawi ong lawmbawl leh naupang paithei cil pahtak bawl a khutbet pahtawi dan dinmun a tung ihi hi. Tua bang ahih lam theilo in, pawlkhat in angtang mahmah lungdam mahmah lai hihang.

I politics in nakhempeuh ong sai hi. I zing huan nitak huan nangawn ong sukha hi. I cidamna ong sukha hi. I thumuhna thutheihna, pilna siamna ong sukha hi. Khantohna cinam khempeuh politics ah kinga hi. Kin huai, kin taakcing mahmah thu ahi hi.

Zogam pen Kawlgam kumpi ki-ukna nuai pan kipekkhia thei, kipekkhia zo pak nai samlo ding i hihman in, Zogam leh Zomi tawh kisai politics i gen ciang Chin State Politics leh Kawlgam Politics kinawlkhin theilo hi.

Ngaihsut khop kul hi. Khuahun tuihual, huihhual zui a ei zong i kihei ding kisam hi. Tua khuahun tuihual dawn ah tembawpi bang a ong tuanpih thei, tua khuahun huihhualpi tha zang a vandawn ah muvanlai bang a ong lenpih zo makai kisam ihi hi.

Khuahun tuihual leh huihpi lehdo a Chinte peuh cici, Kawl Ngapikte peuh cici a hate message tawh lehpan keka ding kihanthot ding hoihlo hi. I dinna, i tuanna, i siksan limtak lenkip tinten sa a hihte dawn ah i tuan’, i len’ ding ahi hi.

Khat le nih guak tha tawh minam leh gam kidom zo denlo ding hi. Mipi tha a kisap hun om zelzel ding a, pankhopna tha in mazan’ gualzawhna ong piak hun tampi om ding hi. Politics i cih khuttam kisam nasep nam ahi hi.

Kimakaihna hoih ah makai hoih in ong makaih leh sun khat zan khat kal nangawn in khantohna, kilamdanna tampi piang thei hi. Singapore gam in makai hoih khat leh a panpih ding mihoih pawlkhat a neihkhak man in tuni a a dinmun khang khat sung in tungto ziau hi.

A mipi lehkawk a, nungzuih siamlo ci a a mawhsak niloh makai pen makai gina, makai hoih hi ngeilo hi. Nasep maban khatpeuh mipi in ma pan a makaite’ nungzuih ding lam-etna pen ngaihsutna leh panlakna kibungbu-tun ahi hi.

• Mipi in makai huai ding maw, makai in mipi huai ding?..
• Mipi in makai makaih ding maw, makai in mipi makaih ding?..

Zomite in Minam leh Gam vai kimakaihna a i ngaihsut zia, i pom zia, i kalsuan zia limtak ngaihsun pha mahmah dih ni. En i awlmawh loh kal in a awlmawh midangte in i luzang ong tuancil in zun le ek ong pek ding uh hita hi.

Politics awlmawh taak cing mahmah hi. Kimakaihna hoih bek hilo, makai hoih lunggulh huai mahmah hi. Pau Khat Suan