A (6) Veina TBC Youth Conference kilawhcing

A (6) Veina TBC Youth Conference kilawhcing

Kong it U le Naute,
Pasian’ thupha tawh a (6) veina Tedim Baptist Convention Youth Conference, March 25-30,2015 sungin Phaileng Tuiphum Pawlpi ah nuamtak kibawl thei hi.

Khawmpi hun sungah zin 800 val bang kipha aa,inntekte tawh gawm 1100 kiim bangin thusinna leh biakpiakna kinei thei hi.Hih hun sungah Evan.Langh Do Khup, Rev.Dr.Nang Sawm Piang, Sia Dal Sian Am-te in thusunna hong nei uh hi.Rev.Tuan Khan Mung le Pr.En Khat Muan ten speech hong nei uh hi. Tedim Icon Top (10) teng zong la kidemna kinei sak aa,Tg.En Suan Thang in Tedim Icon hong ngah hi.Top (10)teng DVD Album khat kibawlsak aa, April kha bei lam ah hawmkhiat zawh ding lunggulhna kinei hi.

Nitaksim phatna le biakpiakna nopcitakin kinei ziahziah aa,Malaysia pan TBC Music fund ding hong kipia teng tawh sound system akilei teng kizang pah ahih manin nopci mahmah hi.Huhna hong pia mimal kim tungah lungdamna lianpi iko hi.Topa’n thupha hong piaksak ta hen!

Nitak sim biakpiakna ah Evan.Langh Do Khup in hun hong zang(sermon) aa, tha kingah mahmah hi.Siapa’ makaihna tawh ki-apna hun ah khangno tampi tak khitui tak keuhkeuhin ki-ap ziahziah uh hi.

Inntek Pawlpite zong kician sitset mahmah uh ahih manin apai khempeuh hampha kisa in nuam kisa thei mahmah hi.

Hun tawp nitak kikhop pen 11:30 pm in kiman pan hi.Ahi zongin mipite’n ciah khiat ding lunghiang nei bang keei ahih manin Pasian phatna diang ziahziah kawmin kinei aa zingsang nai 3:30 am teh khat le khat thupha kipaih kawmsa in kikhen khia diamdiam zo pan hi.

Pasian in hih khawmpi zangin i gam i lei leh i minam adingin na lian tampi hong sep ding i lametna le i thungetna hi. Hih khawmpi adingin thungetna, piakkhiatna tawh ma apang khempeuhte tungah Topa’n thupha hong pia kimciat ta hen…Amen.

Lungdamna tawh,
Rev.Cin Khan En
Youth Director