A 3 veina GZA Khawmpi ah deih ngetna ~ Dr. Dongno

A 3 veina GZA Khawmpi ah deih ngetna ~ Dr. Dongno

Zomi Congress for Democracy, Global Zomi Alliance,Tedim Association, Zomi Youth Association leh ZOMI kipawlna tuamtuam makaite tung lunggulhna lianpi khat kohna:

• 1. Pu Cin Sian Thang – Member of Parliament, Zomi Congress for Democracy (ZCD) Makaipi
• 2. Rev Dr, Pau Khan En, Global Zomi Alliance Makaipi
• 3. Prof. Dr C.Thang Za Tuan, Tedim Association Makaipi
• 4. Zomi Youth Association tuamtuam leh adang Zomi kipawlna Makaipite

MRTV channel athak nga ki beklap ding aa company tuamtuamin ong hong ding cih thu ka zak ciangin ei Zomi Program peuhmah hoihtak leh nasia takin i neih zawh nading Zomi kipawlna makaiteng ong kikumin nong vaihawm nading uh lunggulhna lianpi tawh kong thuum nuam hi.( Hih chanel thak nga a kihon beh kei leh zong hih veve ding hi hang.)

1958 aa kipan Burma Broadcasting Service, BBS Radio Progam ah Falampau (Laizo pau) tawh i neih ban ah tu-in MRTV Program sung ah kizomin Falam pau i nei aa lungdam huai hi. A taktakin Laizo pau azang mi pen tam het lo hi. Falam gam sung ah mi pop. 50,000 kiim bang hi bek ding hi. Minam-kee tampi om uh aa, Zangiat, Ngawn, Tlaisun, Khualsim, Zahau cihte hi-in, tua sung ah Tlaisunte pau leh Laizo pau kibang vet lo (ki thei lo) uh hi.

Khualsimte pau zong amau bekin thei uh hi. Lumbang (Zangiat-te) leh Parte tai lang ki gamla bek napi ki thei ngiat lo uh hi. Laizo pau pen nidang aa sangkah ngei leh sumbawl khualzinzinte, kumpi nasemte cihbang bekin thei uh aa, khuata sung aa koimah pha ngei lo, numei naupangte-in zangh lo uh hi.

Haka lamte tawmkhatin Laizo pau thei saam uh aa, atamzaw tu aa khang thakte-in thei nawn lo uh hi. Tua mah bangin Tedim lam panin nidangin Falam ah kumpi nasem leh sang akah ngeite bekin Laizo pau thei uh aa, tuate-in ong nusia khin ta uh hi. Tu aa khangnote-in ki thei lo hi.

Haka gam sung ah Zotung, Zophei, Mara, Senthang, Lautu cihbangin minam zui-in pau tuamtuam om aa, khat leh khat kibang lo-in ki thei lo uh hi. Nidangin, sang ah Haka pau kisin aa, biak inn ah zong Haka laisiangtho leh labu zang uh hi.

Ahih hangin U Ne Win hun ciangin, Haka/ Matupi /Thantlang gam sung aa om Zotung, Zophei, Mara, Senthang leh Lautute-in Haka lai sang ah kisin sak lo ahih baan ah, labu leh laisiangtho amau pau tekin nei uh ahih ciangin tu’n kum 30 gual pan anuaisiah tengin Haka pau thei nawn lo uh hi. Hih atung aa Haka pau athei nawn lo minamte pen Haka gam ii mi 70% val bang hi ding hi.

Asawt vei nai lo-in MRTV ah Mindat pau-in program ong suak ta hi. Mindat gam zong minam-kee tuamtuam vive om uh aa, Cho (Kho), Moon, Mdai, M’kong cih bangin nam khat leh khat pau ki lamdang-in ki thei lo uh hi. MRTV pan aa Mindat pau kizang, Cho(K’ho) pau pen Mindat gam aa om mi 30% bang bek ii pau hi ding hi.

Ei Tedim leh Tonzang gam Cikha khua khung pan Bamboo Camp ciang i pau avekin kibang khin aa, Pasian ong piak thupha lianpi khat ahi hi. Dim, Khuano, Paite, Saizang, Sihzang, Teizang, Zo, i vekpi-in awkaih tawm ki lamdang bek hi aa, i ki thei kim hi. Tua ahih manin, “kamphen kul lo “ i kici hi. Falam gam sung aa om Ngawn minamte pau nangawn tawh zong tampi kibang lai hi. Chin State sung leh Kawl zaang, Tamu dong, Mandalay leh Zangkong aa om, Khamtungmi khempeuh sung ah mi atampenpen zat kampau pen Zopau ahi hi. Mimal-in 120,000 val pha hi. Tua ban ah India gam ah Zopau a zang 200,000 bang om lai hi.

Tua bangin mi atampenpenin azat Tedim Zopau MRTV program sung ah tuni dong a-om nai loh lai pen a ki ngaihsun zo lo, alamdang mahmah thu khat ahi hi. Bang hangin tu dong hih bangin i koih mawk hiam? Mi atam penpen, Pasianin pilna lam, sum leh pai lam, kumpi nasepna lam, galkap sung ah min leh za, gam makai cih bangin atampen mun tuamtuam ah thupha ong piak ngiat minam hi napi hang, hih i kinlo-natna, (thuakzawh hanta) in i khantohna adingin kimanna nei lo bek tham lo-in i maa ong daal, ong khak ahi hi.

Tudong mah Pasianin ong it, ong kamvak, spoon-fed in om-in, ei ngaihsut tawm leh hanciamna zang lo-in i om ngiungeu lai ding hiam? ngaihsut huai kasa hi. Radio khawng TV program sung khawng ah ei pau om takei leh phamawh asa zo nai mahmah lo Zomite-in athak aa i phawk ding deih huai kasa hi. Hih pen athupi mahmah leh alauhuai mahmah thu khat ahi hi.(A lauhuaina thu hih lai ah kikum kei ni)

Ngaihsun pha mahmah dih ni. Midangte khat pepeuh pau kibang ei zah pha peuhmah leh Radio, MRTV program ah hun asaupenpen nei hamtang ding uh hi. Ei sang aa a tawmzaw thamtham te’n tun Radio leh MRTV ah program nei ta uh aa a zum mahmahin zong maizumhuai lua ta hi. A mau aa sut ding i hi kei hi. Amau neih hoih isa aa i lungdam pih hi. E’n zong i neih loh phamawh ta hi. Hun hoih tampi in ong kheng khin ahih hangin zekai nai lo hi.

Zopau pen, Myamyo Defence College ah galkap htauh-hlan-ye, MI -te-in i paute limtak akan khit uh ciangin Zopau thupipen ahihna mu-in kisin sak ngiat hi. Sagaing ywathitgyi, Taingyintha Phwenhphioye Theihpan sang ah zong kum 50 val pek aa kipan tuni dong kisin hi. Tua ahih ciangin, bang ngak lai ding i hi hiam? Kumpi-in Zopau thupi sa aa hih bang sang thupite ah kisin sak zawzen ahih ciangin Radio/MRTV program peuhmah ah ei pau i suah sak ding bang zahin thupi cih muan leh suan Zomi makaite-in nong ngaihsut ding uh ka lunggulhna kong ko hi.

Tua ahih ciangin Zomite-in nu leh pa-aa kong neih uh ZCD, GZA,TA, ZYA makaite-in i minam aading aa thupi mahmah hih thu, khatvei ong tu khawmin ong kikum peuhmah le uh cin ci-in lunggulhna lianpi leh veina lianpi tawh kong thuum nuam hi. No lo adang Zomi makai om lo hi. No nong sep kei uh leh nidang ciangin khangthakte mawhsakna i thuak teekteek ding hi.

Athu ala ong kanin, tu mahmahin announcers / news readers ding nungak-tangval navak, atei zong kholin training i kipat ding leh akisam dingte khempeuh nong vaihawm nading uh lunggulhin muanna lianpi tawh kong ngen hi. Deihsakna takpi tawh, James Suan Za Dong (Sydney, Australia)