75th D Day Landing – 6th June (They will never grow old)

75th D Day Landing – 6th June (They will never grow old)

They laid down their lives so that we might have a better life and build a better world – UK PM Theresa May

1944 June 6ni-in, Britain leh apawlpih uh USA, Canada cihbang gam12 pan gaalkap 18000val te’ Hitler leh Nazi te a vado ding-in Francegam Normandy piauneel ah tuilam leh, a diakdiak in, vanlam tawn-in a vaitunna uh, tuni-in kum75 cingta a hihi. Hih Normandy mainawtding-in tuigaalkap aa kipan, a dang gaalkap leh naval ship 7000 ban-ah gaalvan tampi mah-in mapang uh a hihi. Tua hi-a, gaalkapte’ bek hilo taangpi-taangta tuultampi te-in, anuntaakna uh pia-in, France leh Europe hotkhiat nading a kipatni zong a hihi.

Hihni a pianna ding-in, Lieutenant-General Frederick Morgan makaai-in kum5 sung bang genteltak-in, a geelkholh khit-uh teh, operation Overlord cih mintawh Liberation Force in, Hitler gaalmai a hongnawtna uh ahihi. Hih mainawtna-in, nisuahna lam ah a na mapang Soviet te’ naak nuamtuamsak hibek lo-in Hitler-in a lianmahmah gaalmaitang nih hong neita a hihman-in, a hong thazawmsak mahmah hi. Tuadungzui-in a kumkiik 1945 May 7ni-in German General Alfred Jodl in Nazi Germany taang-in gaallel-in a hong ki-apkhia ta uh aa, WWII a beilam hongsuak hi.

D Day pahtawina pen, a nungtalai veteran pawlkhat tawh June 5ni-in Englandgam ah kibawl in, tuni-in France- Normanday ah thupitak in kibawl hi. Tukum pen a lamdang in, a semlaitak US President inzong vamuakthei ahihi. Pahtawina cihciang in, lungdamkohna hizaw a hihi. Medal te piakna ban-ah flypast tawh zong kipahtawi hi. Phawkna leh Patawihna ah US President Donald Trump, France President Emmanuel Macron leh UK PM Theresa May in tua-gaalhunsung mite’ thuakna a khuangaihna te uh pulaaksak kiik in, a manpha leh a gaalhang a lungtangte’ uh pahtawi in, aki mangngilhloh ding-in kamkhaam uh hi. Lungdamna thu tampimah a suutkhit nungciang inzong,“Thank you”cingiat lai uh hi.

Gaalkuan ding’ gaalkapte atuam cihbang hi-lozaw in, midangte’ suahtaakna ding leh lungnoptak-in a khuasak theih nading-un, a ma nuntaakna nangawn’ a piakhia-ngam itna hoih neite a hi uh hi. Nikhat sihna veve hikan-in a manpha sihna a omnawnkei hi.

Britishte’ gamkeekte bek hilo, kipawl khawm-in midangte suahtaakna a piakhia gamthupi khat a hihban vuah, lungdamna a mangngilhlo gamthupi khatzong a na hihi. Tu-in, Zosuan pawlkhat zong British misuak in, a kumpinu liimnuai ah lungnuam in, khuasa uh a hih man-in, hihthu tawh Zomite kizopna a omta hongsuak hi.
Ginakei ih cihnop Kawlte nangawn-inzong “ngilhmawh ankamkhat- Taloh saabu tuhcyayzu” cibuang hiven. Nantal’suan

Etkaakpakna munte:

• 1. https://www.iwm.org.uk/history/the-10-things-you-need-to-know-about-d-day
• 2. https://www.huffpost.com/entry/germany-surrenders-allies-date
• 3. https://www.telegraph.co.uk/news/2019/06/06/d-day-commemorations-theresa-may-prince-wales-attend-normandy/