2021 Mangpha, Dammaw 2022 ~ Sia Do Khup

2021 Mangpha, Dammaw 2022 ~ Sia Do Khup

“Tuhun pen hun hoih lo hun ahih manin na hun neih khempeuh uh a hoih lamin zang un.” EFESA 5:16 TDB

PUL NATNA LEH GAM BUAINA

Tuhun pen hun hoihlo taktak ahi hi. Covid 19 pulnatna leh gam buaina in i it i ngaih tampi hong laksak a khitui tampi luang hi.

NA HOIH KISEM NGAM LO

Cimawh huh nangawn lau sain a kisem hita hi. Sitsuk sittoh tam mahmah ta a, khualzinna khempeuh lauhuaina vive hita hi. Thaugingte i za a, “Sisan bangzah a luang diam maw” cih dipkuatna tawh i kidim hi.

OXYGEN ZONGIN TAI NGEINGAI

Hunsia mahmah kawmkal mah ah nahoih sep ding i hanciam a i kihuh ciat hi. Khua sungah thautang leh Covid kihtapi mahin i Nu ading i Pa ading i itte adingin oxygen zongin i tai ngeingai hi. Bangmah sem loin om kha hileng tu a sangin tam sizaw lai kha ding hihang.

THUSIA TAM KIZA

I minam sungah kilemlohna a mulkim huai mahmah kammalte online panin i sim kha den hi. Zomite’ mailam khimzing lua ahih manin cih nading theiloin Pasian maiah khukdinin i kap hi.

NUNGKAIH VEI KAWMIN

2022 sungah i tonpih theih nawnlohte hangin lungzuang khuangai, nungkaih vei, lunghei nei giauguau pi-in 2021 mangpha i khak ta hi.

NANG HONG DEIH HI

2021 tawh a bei khawm tampite lakah nang leh kei hong kihawi lai a 2022 ah Topa in hong galkah pih hi. “Topa aw, bang sem dingin hong deih nahi hiam?” ci-in ki-ap phapha-in Lungdam ko ciat ni.

2022 in Zogam Kawlgam leh leitung bup ah nopna daihna hong pian kum hita hen. Topa i muang hi. Deihsakna lianpi tawh; Evan. Langh Do Khup (Khuata mipa)

LAWMTE TUNGAH LUNGDAM KOHNA

Topa adingin mapan zawh kum 31 sungah;

1. Thungetna tawh hong huhte,
2. Tha leh ngal tawh hong huhte,
3. Thu leh la tawh hong huhte,
4. Zin hong dote,
5. Pulpit hong zangsakte,
6. Van leh nate tawh hong huhte,
7. Sum leh pai tawh hong huhte khempeuh tungah lungdamna lianpi kong ko uh hi.

A beisa hun sawtpite zong lungngai kikkikin note kong phawk uh a, kong ngai mahmah uh hi.

Mailam hunte ah zong

Topa’ gam adingin note tawh mapang khawmin lawhcinna lianpipite mu khawm lai ding cih pen i upna leh I thungetna ahi hi. Lungdam takin; Evan. Langh Do Khup (Khitui Gospel Team)