ZTK-2 Taangkona No. 6

ZTK-2 Taangkona No. 6

6. Kawlgam ah kum 60 val kilemna, daihna a om lohna a hangin minam tuamtuamte in amau tenna leitang tungah thuneihna a neihloh man hi ci in kamu uh hi.

Zomi ulehnau,
Tutak ong uk kumpi in mulo, theilo cihna hipeuhmahlo hi.
Leitung ah mihingte kithah, kimat, kikap, kido. kisia ngeingai den i cih pen, agualzo, a uk, athunei, avaihawm, ding kituh i hi aa, banghang tuading kituh ihihiam cihleh, angsung lianlua cihna hilelhi. Angsungthei nih ong kituah ciang, khat leh khat kihazatna, kithangpaihna ong piang aa, kido, kikap, kithat, kibuan, kisia hipah hi.

“Hawmsem nungta”
Angsung huaihamna omlo cihna hi aa kisiat omlo, kithah kimat omlo, nuntak lawh ciat.
“Ne bum si”
Angsung lian, huaiham, amah guak in nenuam, sihlawh, amahbek zong hilo sihlawh ciat.

Kachin gam, Karen gam, Shan (Wa, Palaung, Lahu, Kokant…) gam ah Kawl Kumpi leh pupa hunpek aa gamnei te kum 60 val (akum aa lawh sang Mangkangte ong nusiat aa kipan cihhuai zaw kasahi) kido, kikap, kithat, kibuan abeitheih mahmahlohna pen a thunei ding kithatang tuh, a netum nuam kituh, avaihawm nuam kituh, agualzo ding, atungtuangding kituh napan hilelhi.

Ei mun ciat ah thunei ciat lel in, Kachin in Kachin mun ah, Karen in Karen mun ah, Wa in Wa mun ah, Zomi in Zomi mun ah, Palaung in Palaung mun ah, Shan in Shan mun ah, tuatung tawn in i kisapna cat kihuh, kipanpih, kipia lel lehang buaina a om mahmahlo thu hi aa baih mahmahhi.

Kamkei, gialbem samat sa hyena hon in a thatang suh tawh akibang ahihi.
I huaiham zia, i angsung theihzia tawm enpak hileng, Leitung aa ruby & sapphire hoihpen pianna Mogok suangkhuk iplahna tawh Mandalay region gamgii kikaihzia bang a zum theite aa ding a zum huai mahmah zah ahihi. Kachin gam piang Jade zah aa hoih leitung bup ah na omlo zel ahihman in tuateng lunggulh, a thunei ding kituh ihihi.
Scottish te a gen uhciang, “a ipsung aa lingmaw(orange) khehte” ci-in guallelsak uh aa, ahawng khehna gimnam nangawn a kiim aa te zaakding phallo zah aa angsung thei cihna hihtuakhi.

Mangkang kumpi zong leitung buppi uk phial cih pen namdangte sang huaihamna lianzaw mahmah cihna hi aa tuipi pan aa piang ci(salt) nangawn siahkai cih nungsang bel huaiham mahmah takpi cihna ahihi.

A huaihamlo, angsung theilo omlo ahihhang ahuaiham deuh angsung theideuh bel om tuak mahhi.

Zomite tawm khat phadawm zawdeuh i hitam? kaci ngei aa, hoihtak ka sittel ciang phadawm zawdeuh nahihetlo in, kihazatna lianlua na hizaw hi. Hyena hon anne, ama gilpi aa ding ne manlo liang aa alawmte neekding aphallo, alawmte ban peh tawh kibang linlian hihang. I theihtheih ciang, Tedim khuapi tuni dong akipuah hetlohna, Zozumpi i ngahlohna, 1944 aa mawtaw lampi tuni dong angei abatna hihhang ahihi.

Nidangin Kawlpi pan aa kipua to ci(table salt) ciitciat pen ka Pi’ ci, al deuh hihtuakhi. Ei aa ciat sathei lua mahmah cihna ahihi. Ko atute in genkik in ka nuinui uhhi. Tuni dong hih lungsim bei nailo i hihman in i min i puam nangawn a lokhawm theilo, ko Tedim, ko Zo, ko Sizang, ko Teizang, ko Thado, ko Paihte, ko Vaiphei, ko Simte… thupisa mahmah ciat hihang. Ei’ ci ciat mah alzaw satek. Ataktak i pianna na kibang peuhmahhi. I zolapi te kibang hilohiam? Ka min uh ong tuhsawm uhteh, cihkhat om hilai. Banghiam i lawhtak?

Kaptel khua mawtaw tuncil, mawtaw pei khaap, bangmah theilo naupang te’n, “hipan hidong kei aa” ci aa akituh tawh kibang kasa aa, tua kawmkal ah mawtaw neipa’ tapa in, ko mawtaw khaap ahihman in a vek in kei aa acih sawnsawn, kiguallelh sakna aa kigen linlian dinmun hilai hihang.

Ataktak in hih leitang, hih logam, hih gam leh lei pen sisan luan nading hilo, sih nading aa kibawl zong hilo, nuntak nading aa kibawl ahihi. Sisan malkhat leitangh tung a kiat teh, akiat nading hilo ahihman in kikohi (Piancil 4:10b).

Leitang i nuntakpih kei aa i sihlawh leh, nopsakna ong tutkei aa gentheihna ong tut leh, hauhna ong tut kei aa zawnna ong tutleh, lungdamna ong tut kei aa hagawina ong tut leh, angtan pihna ong tut kei aa hazatna ong tut leh lampial khin cihna ahihi.

Ahuaiham deuh, angsung theideuh i om ciang buaina, sihna ciang dong ong tun pih ahihi.
Rev. Dr. Paupu in, “Leitangh pen sihpih nading hizenzen lo in hin pih nading hizaw hi” acih pen hi kasa peuhmahhi. Leitangh itlua in sih lawh lehang akimanna bang om hiam?

Kawlgam gam makaite in hihthu atheilo hilo uhhi. Theilua hizaw hi. Huaihamna, angsung in zozaw ahihman in sisan luanding cikzia zolo uh ahihi. I tukhawm aa (dialogue), i kikum aa i gelkhawm phial ahizong in hih huaihamna, angsung theihna i khiatsawm tuan kei leh a utut a piangzong in cih in ong vuknelhkhin ahihman in si leh nai luanna kamh ngeilo ding cihna hipahhi. Nungtolh akul leh nung tolh zawding cihna hipahhi.

Ahuaiham, angsung theite tawh i kituahkhaak sese kamsiatna lianpi hi aa, tuabang mite tung i thangpaih khialh luat khaakleh kamsiatna behlap hikha thei ding ihihman in hihbang hunciang kalsuanzia ding kikup tanghtangh ding, kithuman ding thupi in ka umhi.

Hang Khan Lian
Block 646#13-115
Jalan Tenaga
Singapore 410646