ZRA maban limci

ZRA maban limci

ZRA in tutung Myanmar gam kumpi thak NUG (National Unity Government) ka muak uh hi, ci-in thusuah hong bawl uh pen nai khat sungin share 200 val pha hi. Mipi lungtang sungah ZRA deihna leh lametna lian mahmah hi, cih hong phawksak hi. Dr. Sasa leh Kawlte nangawn in nung sung teng gen belin a neih uh Zomi galkapte himah ai ve.

A beisa leh mailam ah ZRA pen:

1. A beisa hunin biakna Pawlpite in ZRA panpih nai lo uh a, tu-in thungetsakin panpih ding ahih manin maban limci hi.

2. A beisa ah ZYA in gina takin panpih nai lo a, tu-in mihing tha leh a kisam bangbang full support ta ding ahih manin maban limci hi.

3. A beisa hunte ah Zomi kumpi nasemte, adiakin uliante in ZRA panpih nai lo bek tham lo zum huai sa, hai vai sa mawk uh a, tu-in a sim a langin panpih ta ding uh ahih manin maban limci hi.

4. A beisa hunah Siamsinte in ZRA a panpihna uh kimu lo himah ta leh tu-in kei mahmah ZRA makai ding hi mawk ing, ci thei ta ding uh ahih manin maban limci hi. Minam thautawi makaite pen Siamsin ahih laitakun thautawi vai khaici amau sungah kituh khin zo hi. I siamsinte i lamen mahmah hi.

5. A beisa hunah sum neite in ZRA panpih nai lo uh a, tu-in sum tha tawh khasim kumsim panpih ding uh ahih manin maban limci hi.

6. A beisa ah gamdang tung Zomi Innkuante in ginatak panpih nai loin sum kaikhawm lo uh a, tu-in panpih mahmah ta ding uh ahih manin maban limci hi.

7. Politics ka sem hi, a ci i minam party ZCD nangawn in ZRA pen daipih ngam lo, tawsawn ngam lo leh seppih lo uh a, tu-in minam party bek hi loin Zomi kihelna party khempeuh in a sim a langin panpih ding uh ahih manin maban limci ding hi.

CRPH tawh ZRA Eastern Command te official takin thu ana kizaza khin uh hi gige mate! Lungdam huai taktak sa ing. Hi ciang a tunna dingin i theih kim khol loh ma ana pang kha khempeuh tungah i lungdam hi. Federal gam nuam hong pianna ding leh mainawt nadingin Zomi galkap thapia ciat ni. NUG kumpi hun sungah gam leh minam kepbit nasep lianpi a lang tangin sem thei ta ding ihih manin lawp ngiat hang.

A beisa hunte ah ZRA makai ding a hoih tata in zahpih zawsop mawk ahih manin mi i bat nai kei leh ahi ding mah hi phot hi. Tha i piak loh leh i thusim loh i minam galkapte hong ginat kei leh eimah tek mah i ginatloh man ahi hi.

Tu-in ahih leh i gambup dinmun pen 1947 kim dinmun phial tawh kibangin hun hoih hong kiheikhia ta ahih manin a zawng ahau, a pil a hai, ulian uneu i vekin pang huanin kibawk huan le hang i nawk lah luat lawmlawm ding om lo hi, ci-in ka ngaih muang phiuphiau ta hi.

Mite in hun tampi neihsa tampi bei-in a sialsa uh lampi tawnin a pai uh ciangin ei pawl lam sial thakuan nuamlo pawl in hazat bek tawh hun bei loin nasep i kipat nak leh ni khat ni ciang saupi a tung veve ding ihih lam phawkin kipumkhatin pang huan dih ni. ZRA phungvuh ciat ni!! Rev. Thang Van Lian