Zomite’n Politics gah a lawhnop pawlkhat ~ Hau Za Cin

Zomite’n Politics gah a lawhnop pawlkhat ~ Hau Za Cin

Gamsung ah vaihawmna nei dinga hanciam pawl Political Party tuamtuam om a, tuate in mipi tawh kithuza in a sepnop uh leh a sep ding uh gel in tuate a sep theihna dingin mipi telna tawh tawh kumpi tokhom ah kilawnto in vaihawmna khauhual a bulpi pan len in a kisam bangin thuneihna tawh gamsung vai hong hawm uh hi. Amau vaihawmna tawh gamsung kipuah a, amau gelna tawh mipi phattuampih ding na lianpi kisem hi. 

Zokam a “Kumpi” ci a i lawhte tung pan mipi khempeuh in lamet nei ciat uh hi. Gam khat sungah minam tuamtuam om a, minam tuamtuam kisap leh deihna a kibang tampi om a, tuate lak ah nek leh dawn kicing ding, paisuk paitohna nuam ding, kizop kihona a nuam ding, vanzat a hoih leh a tangzang hiding cihte hi. Tuate lak pan zong gamkuam leh minam tenna tawh kituak in a kisap uh leh a lunggulh uh a tuamtek om suksuk hi. 

Zomite adingin gam vaihawm leh mipi nasem kumpite kiang pan i lamet tampi lak ah a lian mahmah diak pawlkhat gen pak leng. 

1. Zomi State: Zomite adingin gam tuam ei leh ei kivaihawm a gamke khat ah i om mateng i khantohna a hunlap in kivei lo ding hileh kilawm hi. Zomite tenna gamteng a tuama kiukna Zomi State a kineih ciangin District thum in khen in gamsung vaihawmna ah khantohna ding na lianpi kisem thei ding hi. Zomi state khuapi dingin Tedim hi dinga, Tonzang district leh Cikha district khuapi ding amau khuate hipah ding hi.

Minam khat a gamke (state) nei thei dingin mihing leh gamkuam in cin ahih manin a kisam banga Zomi political party te in a nawk ding uh, a sep ding uh a kisam hikhin hi. Mipite tawh vaihawm in gel in sem lehang hong piang lel ding hi. Tua ahih kei leh Zomi te tenna gam khempeuh tuma, tu laitaka kumpi a sem kuamah in hong puah vetlo ahih manin ki-ap, kibuah lua den ding hi. State khantohna dinga sum lut khempeuh mun khat ah kisungkhia den lel ahih manin Zomi State pen i neihloh a phamawh dinmun hita hi. 

2. Zogam Border Trade: Zomite tenna pen leitung gamgi in hong khen ahih manin tua paikan in kizopna a om kisam hi. Tua ahih kei leh Zomi gam tuamtuam a omte kizopna deihzah in ollo ahih manin i pau, i ham leh i ngeinate kidang hiaihiai hi. Zomi hi napi i kizop loh a sawt luat ciangin ki itna, kingaihna, kikhualna kiam thei hi. Zomi teekteek nung kum in Zomite mah English hilh dingin amau sum tawh hong kuankhia, Zomi teekteekte mah in a ciah baihna dingin na vaihawmsak uh hi.

Zomi tuaktuak ahih lam uh a kitheilo uh hi kilkello napi a ki itna uh leh kideihsakna lian nawnlo suak cihna hi. Mihing pen kimumu, kihoho, kikhawlkhawl leng ki itna lian semsem a, kimu ngei kei leng meltheih nangawn kingaihna kiam hi. Tua manin Zomite tenna gam sunga Leitung Gamgi kikhung (international boundary line) paisuak in kizopna noptak a om theihna dingin Zomi political party te in a sep ding uh ahi hi. 

3. Zogam Zinna Kongvang: Zomite omna khempeuh nuamtak a khualzin a olna dingin lampi khempeuh ah nawngkaina a piangsak check gate cihte a kiphiat ding ahi hi. Ahi zongin mi ut bangbanga Zogam ah hong lut ziauziau lohna dingin a encik gamkem bel a om kul hi. Zomi ahilo, khualgam pan a zin lut a pusuak peuhmah in Zogam a nawngkaisak lohna dingin mipi khempeuh in vaipuak kinei hi.

Gentehna in, Zangkong pan Kawlpi vanleng tawh a kituk ciangin gamdang mi peuhmah a passport a ki sit kikkik pen a kul nawnlo ahi hi. Tua banga kisit ciangin gamdang pan hong zinte adingin nopmawh mahmah a, vai tamsak lel hi. Tuate ah kumpi sem political party te in a kisam leh kisam lo khinkhai in bullam ah a policy kheksak ding ahi hi. 

Tua mah bangin gamdang zinna dinga kizang gamgi tawn in zatui hoihlo, vankham hoihlo, a ginalo van puak, van zuak khempeuh limtak a a kisit, a kietcik theihna dingin political party te in a gelsak, a gelpih, a vaihawmpih ding ahi hi. Kumpi nasem khat in ama hoihsak banga peisuk peito hiden cih pen a kikhel hun hita hi. Mipi tungah nasep dan ding pulak in ‘hih bangin kisem ding hi’ ci a genkhiatna tawh nasep in zuihsak pahpah ding hi. Pilna tawh gel in pilna tawh sem in mipite zong a pil in ngaihsun in a pil dingin zong pattah ding hi. Mipi khantohna ding programme (vaigelna) neih den ding hi. 

4. Zokam, Zolai, Zongeina: Minam khat a khantohna dingin a pau a ham khempeuh a kiciamteh thei ding, a za lote in zong a kigen thute a theihna dingin a kigelh kul a, tua a kigelh khempeuh a sim thei dingin mipi khempeuh pattah kul hi. Zomi te in zong tua dingin Zolai nei hanga, Zolai limtak kisinsak ding ahi hi. Naungek a pian tung pan a nu in a hopihna kammal mahmah tawh a theihding thute hilh kik lehang theibaih in ciamteh nopsa hi.

Zomi naupang khempeuh in a nu pau Zokam tawh a suah pan kum 14 a phak dong a sim theih dingin Zolai a kisin hamtang ding ahi hi. Tuma in Zolai Tan 4 kinei a, tua mah a kizop kik theihna dingin Zomi political party khempeuh in mawhpuak ahi hi. Tua ahih mengmeng ding Zomi bup lametna leh deihna, lungsim tawng deihna ahi hi. 

Zokam leh Zolai a kisiam khit ciang, Zongeina khempeuh kihilh, kipattah leh kisinsakna baihno hita dinga, Zongeina a thei Zomi vive hong khangta ding hi. Mihing khat in ama hihna leh ama pau leh lai a theih ciangin a bukim hi a, a theih kei leh bel a kisin kul cihna hi. Tua dingin a neusen pan sinsak in pattah pah lehang a haksa hetlo, nung buai a kullo nasep a kizo hipah ding hi. Tua dingin Zomi political party te in vaipuak nei uh hi. Nupi papite sunmang hi a, naupangte maban ahi hi. Pitek putekte adingin a go, a gamh uh a kip toto suak cihna hi. 

5. A tuamtuam omlaite: Gam khat, minam khat a khantohna dingin tui nek kisam, lampi kisam, anbel ah nek ding a kihuan den kisam hi. Tua pen nuntakna dinga kisam bulpi, a pelmawhte hi a, nuntakna dinga kipaitheilote ahi hi. 

Mihing pen annek bek tawh kisi lo hibek a, a nuamzaw, a gentheilua lo in nuntak ding a kihanciam ciat ahi hi. Tua zong a haksa lua hikhollo a, hanciam in semtek peuh leng a piang thei ahi hi. I cinat ciang i kikepna ding zato kisam a, i khangthakte i pattahna dingin sanginn kisam hi. Pumpi kha leh lungsim damna dingin biakna suakta taka biak theih ding kisam hi. Tua dingin sanginn, zato, naupang pattahna cihte a kisam banga mipi ading vaihawmsak akisam ahi hi. 

Zomi khat a pian, a nu gilsung pan a suah pan a picin dong a kisap khempeuh a vaihawmsak ding, a gelsak ding, lampi a bawlsak ding thuneihna lianpi a nei kumpi leh political party te in tuate hong sep den ding uh Zomi bup lamet ahi hi. A diak in Zomi political party semte vaipuak ahi hi; banghang hiam cih leh mipi in amau level in a septheih uh om a, ahi zongin gambup sumzekna pan a khenkhia thei, gambup sumbawm a sawk thei pen kumpi leh political party te bek ahi hi. NGO leh Biakna Pawlpi te in gambup sumbawm sawk in Zogam khanna dingin sem thei lo uh hi. 

Tomcik a i gen Zomite lamet teng a tangtun theihna dingin Zomi kumpi semte, political party ah mapang nasemte khut sungah vaipuak lian mahmah hi. Hong sep ding uh kilamen a, Zomibup in zong kinungthuap ding hi. Takkheh Zomi!

NB: Zomi political party nasem cih ciangin ‘Zomi min pua party’ bek cihna hilo a, Zomi khat peuh bang party khat peuh ah a kihel khempeuh genna hi. Hau Za Cin