Zomite kipumkhat nading Kal masate

Zomite kipumkhat nading Kal masate

Kipumkhat ding gengen lai ihih manin Zomite kipum khat zo nailo cihna hi pah hi. Hun maan ding i lim gen pian leh hun kiman zo nailo cihna hi lel hi. Kipumkhat ding pen hoih i sa mahmah a, pulpit tung le Seminar tuamtuam te ah i gengen hi.

Laihawm tuamtuam le laibu tuamtuamte ah kipumkhat ding thu bek bek i at hi. Ahi zongin a thu bekin i kipumkhat hi. Zomite sungah kipumkhatna taktak om nai lo hi. Kipum khatna phual hong tun’pih thei ding thu pawl khat kikum ni.

1. Tedim Labu vai:
Pawlpi tawh kisai loin nopna dahna ah i kipumkhat theihna in la ahi hi. Kalsuanzia, thu up zia i kibat loh hangin Pasian min phatna dingin ZBC Labu i zang hi. Tedim kampau te bek hi loin Falam, Hakha, Falamte in zong tua Labu mah zang uhi. La numbat te zong kibang linlian hi. Hih pen nuam mahmah hi. Hih zah in la sungah kipumkhat khin kimlai pawlpi tuamtuam te in lamal them no khel in, labu tuamtuam hong bawl uhi.

Tua themno kikhelna in lungsim kikhenna lianpi hong piangsak hi. Mipil misiamte le sum le pai neite kikop in a kitam kham khin Labute hong gawm tuah kik theih ding thupi ding hi. Tua hi kei leh Labu tuamtuam a bawlte le tua hun sunga nungta nang le kei pen “Zomite a khenkhamte” ci-in tangthu sungah hong kicaimteh ding hi. Kipumkhatna a om sa ZBC Labu zat ding pen lunghiang kei ni. Pawlpi deidan omlo, nopna dahna ah Labu nam khat bek i tawi theih zenzen leh Zomite kipumkhatna kal masa hong hi ding hi.

2. Tedim Pau:
Pau tuamtuam a zang (Sihzang, Saizang, Teizang, Zo, …) i pu i pite Tedim ah hong ten’ khop uh ciangin kuama neih tuan a hilo, vekpi tawh a kisai pau nam khat hong piang a, tun in Tedim pau ahi hi. I inn sung ciat leh u le nau sungah i suahpih pau zangin mipi mai thugenna peuhmah ah Tedim pau zat ding pen khangno te in hong lim gen uhi.

Kipumkhat nadingin kam pau pen thupi hi. Zuih pah huai hi. Thei pipi in kuama hong telpih loh pianpih pau vive tawh mipi maiah thu i gen teitei leh Zomite kipumkhat nading pen mualmong et bang lai cihna hi.

Hih thu nihte bekbek nangawn ah “HI mah ei” i cih kim theih keileh kipumkhat nading i genpen i hu pammaih, i gelhgelh zong laikung laidal pammaih lel hi. Kam tawh hilo, sepna tawh lakkhia ni.

Sia Kung Mung